فوتو: qazdauiri.kz
باس رەداكتورلار كلۋبى ەلىمىزدىڭ تۇكپىر-تۇكپىرىندەگى ارىپتەستەرىمىزدىڭ پىكىرلەرىن جيناپ, «ماسس-مەديا تۋرالى» زاڭعا قاتىستى ۇسىنىستارىن بىلدىرگەن بولاتىن. جاڭا زاڭدا سولاردىڭ 60 پايىزعا جۋىعى ەسكەرىلگەنىن كورىپ وتىرمىز.
بۇرىنعى باق جانە تەلەراديو حابارلارىن تاراتۋ تۋرالى زاڭدار الداعى ۋاقىتتا كۇشىن جويىپ, ولاردىڭ ەرەجەلەرى نەگىزىندە قابىلدانعان جاڭا زاڭ ءوز كۇشىنە ەنەدى. بۇل زاڭدا كوپتەگەن تىڭ ەرەجەلەر قاراستىرىلعان. ءبىز باس رەداكتورلار كلۋبىندا وتكەن تالقىلاۋلاردا جۋرناليست مۇددەسىنىڭ, قۇقىنىڭ ەسكەرىلۋىنە ەرەكشە ءمان بەردىك.
«ماسس-مەديا» تۇسىنىگى باق-قا قاراعاندا اناعۇرلىم كەڭ ءارى اۋقىمدى. بۇعان ينتەرنەت-رەسۋرستارى دا ەنىپ وتىر. سوعان وراي بىرىڭعاي پلاتفورما قۇرىلادى. سونداي-اق مەملەكەتتىك ەمەس باق-قا گرانتتار بەرۋ, اككرەديتتەۋدى جەڭىلدەتۋ ماسەلەسى, ت.ب. قاراستىرىلدى.
جۋرناليستەر ءۇشىن قوسىمشا قۇقىقتىق كەپىلدىكتەر بەلگىلەندى. اسىرەسە ءبىر قۋاناتىن جاڭالىق – ءجۋرناليستىڭ ەرەكشە مارتەبەسى دەگەن ۇعىم ەنىپ وتىر. ءبىز ۇسىنىستارىمىزدا دا وسى ماسەلەگە ەكپىن بەرىپ ايتقان ەدىك. ويتكەنى جۋرناليست – نە مەملەكەتتىك قىزمەتشى ەمەس, نە بيۋدجەتتىك سالا قىزمەتكەرى ەمەس, ورتادا قالىپ قويعان ەش سالاعا قاتىسى جوق مامان بولاتىن. بۇدان بىلاي ولاردىڭ بوستاندىقتارى مەن قۇقىقتارى زاڭمەن قورعالادى. بۇنى ءجۋرناليستىڭ مارتەبەسى دەپ ءتۇسىنۋ كەرەك. ال بۇعان دەيىن ناقتى مارتەبەسى بولماعاندىقتان, كوپتەگەن شەنەۋنىك جۋرناليسپەن جۇرە سويلەسەتىن ەدى. سونىمەن قاتار شەتەلدىك باق جۋرناليستەرىن اككرەديتتەۋ ءتارتىبى دە جەتىلدىرىلدى. بۇنى دا وسى زاڭنىڭ ارتىقشىلىقتارىنىڭ ءبىر دەپ قاراۋ كەرەك.
تاعى ءبىر ۇلكەن جەتىستىك – باق تاراپىنان مەملەكەتتىك ورگاندارعا بەرىلگەن سۇراقتاردى قاراۋ مەرزىمى 7 كۇننەن 5 كۇنگە قىسقاردى. ەندى ارىپتەستەرىمىز جولداعان ساۋالىنا ءبىر اپتا سارىلىپ جاۋاپ كۇتىپ جۇرمەيدى. بۇل ءوز كەزەگىندە اقپاراتتىڭ وزەكتىلىگى جويىلماۋىنا دا سەپتىگىن تيگىزەدى.
زاڭدا جۋرناليستەردىڭ قۇقىن قورعايتىن قوعامدىق كەڭەستەر قۇرۋ تۋرالى ايتىلعان. بۇل ۇيىمدار رەسپۋبليكالىق جانە وبلىستىق دەڭگەيلەردە قۇرىلادى. ولاردىڭ نەگىزگى قىزمەتى نە؟ قازىر, شىنى كەرەك, ءبىراز ارىپتەسىمىز «تيسە تەرەككە, تيمەسە بۇتاققا» دەپ اۋزىنا كەلگەندى جازا بەرەتىن بولدى. مۇنى اسىرەسە بلوگەرلەردەن بايقاپ ءجۇرمىز. وسىعان وراي بۇل كەڭەستەردە جۋرناليستەرگە ارنالعان ادەپ كودەكسىن ازىرلەۋگە بايلانىستى ماسەلەلەر قاراستىرىلماق.
«ماسس-مەديا تۋرالى» زاڭدا بۇدان وزگە دە ءبىز كوپتەن كۇتكەن جاڭاشىلدىق قامتىلىپ وتىر. سونىڭ ءبىرى – مەملەكەتتىك ءتىلىمىزدىڭ قولدانىلۋ اياسىن كەڭەيتۋگە قاتىستى. وتاندىق باق-تا مەملەكەتتىك تىلدەگى كونتەنتتىڭ ۇلەسى 50 پايىزدان 60 پايىزعا ۇلعايتىلادى. ءبىز 70 پايىزعا كوبەيتۋدى ۇسىنعان ەدىك. بىراق پارلامەنتتە 60 پايىز دەپ شەشىم قابىلداپتى. بۇل دا جامان كورسەتكىش ەمەس. «كوش جۇرە تۇزەلەدى» دەگەندەي, الداعى ۋاقىتتا ول ماقساتىمىزعا دا جەتەرمىز.
مۇراتبەك توقتاعازين,
«باس رەداكتورلار كلۋبى» قوعامدىق بىرلەستىگىنىڭ ۆيتسە-پرەزيدەنتى
