قىزىلقوعا اۋدانى اۋماعىنداعى قازبا جۇمىسىن وبلىستىق تاريحي-ولكەتانۋ مۋزەيى جانىنان قۇرىلعان ەكسپەديتسيا جۇزەگە اسىرادى. ەكسپەديتسياعا تاريح عىلىمدارىنىڭ كانديداتى مارات قاسەنوۆ جەتەكشىلىك ەتەدى.
«مۋزەي جانىنداعى ەكسپەديتسيانىڭ مۇشەلەرى ماۋسىم-تامىز ايلارىندا قىزىلقوعا اۋدانىنداعى ەرتە تەمىر داۋىرىنە جاتاتىن قاراباۋ-2 قورعانىنا ارحەولوگيالىق قازبا جۇمىسىن جۇرگىزەدى. اتالعان قورعاننىڭ ديامەترى – 70 مەتر, ال بيىكتىگى – 300 سانتيمەتر. بۇل قورعان قاراباۋ اۋلىنان سولتۇستىك باتىسقا قاراي 8,5 شاقىرىم قاشىقتىقتا ورنالاسقان», دەپ حابارلادى وبلىستىق مۋزەيدەن.
ال سارايشىق اۋىلدىق وكرۋگىنىڭ اكىمى جانات كەنجەعاليەۆانىڭ ايتۋىنشا, سۋ تاسقىنى كەزىندە ارحەولوگيالىق قازبا ورىندارىنا زاقىم كەلمەگەن. قازىر جايىق وزەنىنىڭ جاعالاۋىنداعى تاريحي ورىندا دا قازبا جۇمىسى باستالدى.
«ارحەولوگيالىق قازبا جۇمىسىنا «سارايشىق» مەملەكەتتىك تاريحي-مادەني مۋزەي-قورىعى» رمقك-دان 3 ارحەولوگ, ح.دوسمۇحامەدوۆ اتىنداعى اتىراۋ ۋنيۆەرسيتەتىنەن 18, باتىس قازاقستان وبلىسىنداعى ۋنيۆەرسيتەتتەن 22 ستۋدەنت كىرىستى. قازبا جۇمىسى شىلدە ايىنا دەيىن جالعاسادى», دەيدى جانات كەنجەعاليەۆا.
اتىراۋ وبلىسى
