جامبىل وبلىسىنىڭ تۋماسى اسۋ الماباەۆتىڭ وسى سپورت ءتۇرىن سەرىك ەتكەلى 11 جىلدان استى. اسا جەڭىل سالماقتا سىنعا ءتۇسىپ جۇرگەن 30 جاستاعى ساقا سپورتشى سول كەزدەن بەرى 21 مارتە ايقاس الاڭىنا شىعىپ, 19 رەت جەڭىسكە جەتتى. 12 قارسىلاسىن ايقىن باسىمدىقپەن ۇتتى. اسۋ ءۇشىن تەك 2017 جىل ءساتسىز بولدى. سول كەزدە قازاق فايتەرى ماحاچكالادا داعىستاندىق تاگير ۇلانبەكوۆ پەن الماتىدا ازەربايجاندىق مەحماد مامەدوۆكە ەسە جىبەردى. ەسەسىنە سودان كەيىنگى جىلدارى ول جەڭىلىستىڭ كەرمەك ءدامىن تاتقان ەمەس. بىلتىر الماباەۆ UFC-مەن كەلىسىمشارتقا وتىردى. 5 تامىزدا قانداسىمىز يامايكالىق ودي وسبورندى قىلقىندىرىپ تاستاسا, بيىل 9 ناۋرىزدا امەريكالىق سي-دجەي ۆەيگارانى ۇپاي سانىمەن ۇتتى.
الەمنىڭ ەڭ ۇزدىك پروموۋشەنىندەگى ءۇشىنشى جەكپە-جەگىن اسۋ اقش سپورتشىسى حوسە دجونسونعا قارسى وتكىزدى. ونىڭ شەردوگى – 24 جەكپە-جەك, 16 جەڭىس, 8 جەڭىلىس. بۇل باسەكە بارىسىندا قوس فايتەردىڭ دە ايقىن جەڭىسكە جەتۋىنە مۇمكىندىگى بولدى. بىراق قولايلى جاعدايدى ەكەۋى دە ۇتىمدى پايدالانا المادى. دەسەك تە ءۇش راۋندتا دا قازاقتىڭ باسىمدىعى انىق بايقالدى. تىپتەن سوڭعى سەكۋندتاردى ءبىزدىڭ جىگىت دجونسوندى قىلقىندىرىپ تاستاۋعا شاق قالدى. الايدا بەلگىلەنگەن ۋاقىت جەتپەدى. ايقاس اياقتالعاننان سوڭ, بارلىق تورەشى اسۋ الماباەۆتىڭ مىقتىلىعىن ءبىراۋىزدان مويىندادى.
ال سايران نۇردانبەكتىڭ (20-9, 14 كو) بۇل جولى دا جولى بولمادى. ول ءۇشىنشى راۋندتا برازيليالىق ميلكۋيزاەل كوستانىڭ (20-6, 13 كو ) «قىلقىندىرۋ» ادىسىنە ءتۇسىپ قالدى. ءسويتىپ, قىتايدا تۋىپ-وسكەن 30 جاستاعى قانداسىمىز UFC-دە قاتارىنان ەكىنشى رەت جەڭىلىس تاپتى.
