فوتو: turkystan.kz
داۋلەت كارىبەك قازاقستان پرەزيدەنتىنىڭ حالىقارالىق ساياساتتاعى بايىپتى باستامالارىنىڭ ماڭىزىن جانە ونىڭ وڭىرلىك قاۋىپسىزدىكتى نىعايتۋعا قوسقان ۇلەسىن اتاپ ءوتتى.
«قاسىم-جومارت توقاەۆ قازىرگى تاڭدا جاھاندىق قاۋىپسىزدىكتى, تۇراقتىلىق پەن ورنىقتى دامۋدى قامتاماسىز ەتۋ مىندەتى «ورتا دەرجاۆالارعا» جۇكتەلگەنىن ايتتى. ديپلوماتيا مەن ارىپتەستىك قاعيدالارىنا سۇيەنە وتىرىپ, ورتا دەرجاۆالار ادامزاتتىڭ الدىندا تۇرعان جاھاندىق سىن-قاتەرلەرگە قارسى بىرگە شىعۋعا ءتيىس. مەملەكەت باسشىمىزدىڭ پىكىرىنشە, اشىقتىق پەن جاھاندانۋعا ۇمتىلۋ, ديپلوماتيا مەن ديالوگ اۋماقتىق داۋ-دامايلاردان باستاپ يدەولوگيالىق جانجالدارعا دەيىن ءتۇرلى كەلىسپەۋشىلىكتى ەڭسەرۋدىڭ باستى قۇرالدارىنا اينالۋعا ءتيىس», دەدى ول.
«Amanat»-تىڭ اتقارۋشى حاتشىسى بيىل قازاقستاننىڭ تۇركى مەملەكەتتەرى ۇيىمىنا توراعالىعى «Turktime!» ۇرانىمەن وتەتىنىنە نازار اۋداردى. سونداي-اق داۋلەت كارىبەك وڭىرلىك جانە جاھاندىق قاۋىپسىزدىكتى قامتاماسىز ەتۋ ءۇشىن تۇركى مەملەكەتتەرى ۇيىمىن نىعايتۋدىڭ ماڭىزىنا توقتالدى.
«گەوساياسي قۇبىلمالىلىق, ساۋدا جانە سانكتسيالىق سوعىستار, جاھاندىق جەتكىزۋ تىزبەكتەرىنىڭ بۇزىلۋى دامۋ پاراديگماسىنىڭ اۋىسقانىن دالەلدەيدى. وسىنداي جاعدايدا تۇركى مەملەكەتتەرى ۇيىمىنىڭ ءرولى ارتا تۇسكەن. الەمدەگى گەوساياسي جاعداي شيەلەنىسكەن كەزدە ۇيىم حالىقارالىق ساياساتتىڭ ۇتىمدى جانە پراگماتيكالىق جۇرگىزىلۋىن, لوگيستيكالىق, كولىكتىك, ديپلوماتيالىق جانە ت.ب. كوممۋنيكاتسيالاردى قامتاماسىز ەتەتىن تەتىكتەردىڭ ءبىرى بولىپ قالۋدا. وسىلايشا, ۇيىم تۇراقسىزدىقتى ەڭسەرۋ مەن شىعىنداردى بارىنشا ازايتۋ ءۇشىن كوپىر بولىپ قىزمەت ەتەدى», دەدى ول.
حالىقارالىق كونفەرەنتسياعا 300-گە جۋىق مەيمان قاتىستى. ولاردىڭ اراسىندا تۇركى مەملەكەتتەرى ۇيىمىنا مۇشە ەلدەر مەن باقىلاۋشى ەلدەردەگى كوشباسشى پارتيالاردىڭ جەتەكشىلەرى بولدى. شۋشادا ۇيىمداستىرىلعان كونفەرەنتسيا تۇركى مەملەكەتتەرىنىڭ قازىرگى گەوساياسي شىندىقتارى مەن ستراتەگيالىق ماقساتتارىن تالقىلاۋدىڭ ماڭىزدى الاڭىنا اينالدى. ءىس-شارا ۇيىمعا مۇشە مەملەكەتتەردىڭ حالىقارالىق ارەناداعى پوزيتسيالارىن نىعايتۋعا جانە ءتيىمدى ىنتىماقتاسۋعا مۇمكىندىك بەرەدى.
