سۋرەتتى تۇسىرگەن – اۆتور
«ەلىمىز سپورتشىلارى بۇعان دەيىن دە كەز كەلگەن وليمپيا ويىندارىنان التىن, كۇمىس, قولا مەدالمەن ورالىپ ءجۇردى. ءتىپتى 2000 جىلى اۋستراليانىڭ سيدنەي قالاسىنان 3 التىن, 4 كۇمىس ولجالاپ, كوماندالىق ەسەپتە 22-ورىنعا تابان تىرەدىك. ريو دە جانەيرو قالاسىنان دا ابىرويمەن ورالدى. الايدا توكيودا جولىمىز بولمادى. نەبارى 8 قولا مەدالدى قاناعات تۇتتىق. ازيا ويىندارىندا دا كورسەتكىشىمىز ناشار بولدى. مەملەكەت باسشىسى قاسىم-جومارت توقاەۆ بۇل كەمشىلىكتەن قورىتىندى شىعارۋ ءۇشىن مينيسترلىك پەن وليمپيادا كوميتەتىنىڭ, فەدەراتسيا مۇشەلەرىنىڭ بىرىگىپ, ۇيىمشىلدىقپەن جۇمىس ىستەۋىن تالاپ ەتتى. شتابقا بەدەلدى ازاماتتار, سپورتتا تولاعاي تابىستارعا قول جەتكىزگەندەر مۇشە بولىپ, پروبلەمالاردى شەشۋ جولدارىن قاراستىرىپ جاتىر», دەدى ەلسيار بايمۇحامەت ۇلى.
كەزدەسۋ ءوتىپ جاتقان كەزدە ەل قورجىنىنا 71-ليتسەنزيانى ۇستەل تەننيسى وكىلى سالدى. مۇنىڭ الدىندا تۋريزم جانە سپورت ءمينيسترى ەرمەك مارجىقباەۆ پاريج وليمپياداسىندا 80-گە تارتا جولداما الۋ مۇمكىندىگىمىز بار ەكەنىن حاباردار ەتكەن ەدى. ەندى سول بيىكتەن كورىنۋگە جاقىن قالدىق. ەلسيار قاناعاتوۆتىڭ ايتۋىنشا, جەڭىل اتلەتيكا, جۇزۋدەن جولداما الۋىمىز مۇمكىن ەكەن.
ء«دال قازىر سپورتشىلارىمىزدىڭ پاريجدەن قانشا مەدال الاتىنىن بولجاۋ مۇمكىن ەمەس. بوكسشىلاردىڭ 10 جولداماعا يە بولعانى بەلگىلى. بوكستان كەم دەگەندە ءبىر التىن الساق, مەرەيىمىزدىڭ ۇستەم بولعانى. وكىنىشكە قاراي, قىزدار كۇرەسىنەن جولداماسىز قالدىق. بۇرىندارى ءدال وسىنداي «اتتەگەن-اي» بولماپ ەدى. دەسەك تە, مەدالعا قول سوزاتىن ازاماتتارىمىزعا سەنەمىز. ءابيبانىڭ پاريج تورىندە مەدالعا قول سوزۋعا مۇمكىندىگى مول. ويتكەنى بۇل قىزىمىز كەيىنگى جىلدارى تۇراقتى ناتيجە كورسەتىپ ءجۇر. ال اتاقتى دزيۋدوشىمىز ەلدوس سمەتوۆ ءوزىنىڭ ارمانى – التىن القاسىنا قول جەتكىزسە, قازاق ەلىنىڭ مىڭداعان جانكۇيەرى بوركىن اسپانعا اتارى ءسوزسىز. ەلدوستىڭ كۇمىسى مەن قولاسى بار. جەتپەي تۇرعانى – التىن مەدال. گيمناسشىلار مەن سەمسەرلەسۋ شەبەرلەرىنىڭ دە سىن ساتتە بار كۇش-جىگەرىن سالاتىنى بەلگىلى», دەدى ەلسيار قاناعاتوۆ.
28 تامىز بەن 8 قىركۇيەك ارالىعىندا پاريجدە پاراليمپيادا ويىندارى وتەدى. قازىردىڭ وزىندە بىزدە 12 جولداما بار. ءدۇبىرلى دوداعا ۇلتتىق قۇرامادان 39 ساڭلاق قاتىسادى دەپ كۇتىلەدى. ۆولەيبولدى وتىرىپ ويناۋدان ەرلەر قۇراماسى مەدال ءۇشىن تالاسۋعا مۇمكىندىگى بار. وليمپيادا چەمپيونى دەنيس دەگتيارەۆ ءوزىنىڭ ەكىنشى التىن القاسىنا قول جەتكىزۋ ءۇشىن كۇش سالاتىنى ءسوزسىز. پاراتاەكۆوندوشى نۇرلان دومباەۆ, نىشان ءومىرالى, كاميلا دوسمالوۆا, ءپاراجۇزۋشى نۇرداۋلەت جۇماعالي, پاراكانوەشى بيبارىس سپاتاي, پاراجەڭىل اتلەت داستان مۇقاشبەكوۆ, تاعى باسقالاردان قازاق ەلى ءۇمىت كۇتەدى.
تۋريزم جانە سپورت كوميتەتى توراعاسىنىڭ ورىنباسارى ازامات يماشەۆ سپورتشىلاردىڭ پاريج وليمپياداسىندا ناتيجەلى ونەر كورسەتۋىنە بارلىق جاعداي جاسالعانىن ايتا كەلىپ, ولاردىڭ سىن ساتتە نامىستى جانىپ, كوك تۋدى بيىكتە جەلبىرەتەتىندەرىنە سەنەتىنىن ايتتى. كەزدەسۋ سوڭىندا ە.قاناعاتوۆ قازاق سپورت جۋرناليستيكاسىنىڭ كوشباسشىسى نەسىپ جۇنىسبايعا وليمپيادا كوميتەتىنىڭ مەرەيتويلىق مەدالىن تابىس ەتتى.
وڭداسىن ەلۋباي,
قازاقستاننىڭ قۇرمەتتى سپورت قىزمەتكەرى
