فوتو: muftyat.kz
16 ماۋسىم كۇنى قۇربان ايت مەرەكەسى باستالادى. ۇلىق مەيرام قارساڭىندا مال باعاسىن قولدان كوتەرۋ قۇبىلىسى جىل سايىن قايتالانادى. وسى ماسەلەگە دەن قويعان باس ءمۇفتي كاسىپكەرلەرگە حالىقتىڭ الەۋمەتتىك جاعدايىن ەسكەرىپ باعا بەكىتۋدى ۇسىندى.
«حالقىمىزدا «قايىرىمدىلىق جاساساڭ – قايىرىن ءوزىڭ كورەسىڭ» دەگەن ناقىل ءسوز بار. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىمدە كىم باۋىرىنىڭ قاجەتىن وتەسە, اللا ونىڭ قاجەتىندە بولادى. كىمدە كىم مۇسىلماننىڭ ءبىر قايعىسىن سەيىلتسە, اللا ونىڭ قايعى-قاسىرەتتەرىنىڭ ءبىرىن سەيىلتەدى», دەگەن. وسى رەتتە ەلىمىزدەگى بارشا كاسىپكەر ازاماتتاردى قۇربان ايتتىڭ قۇرمەتىنە مال قۇنىن قولدان كوتەرمەي, حالىقتىڭ الەۋمەتتىك جاعدايىن ەسكەرىپ, وڭتايلى باعا ۇسىنۋعا, جۇرتىمىز كۇندە تۇتىناتىن ازىق-ت ۇلىككە مۇمكىندىگىنشە جەڭىلدىك جاساۋعا شاقىرامىن», دەدى ناۋرىزباي قاجى تاعان ۇلى.
سونداي-اق باس ءمۇفتي قۇربان ايت مەيرامىنىڭ باستى ماقساتى مۇسىلماندار اراسىندا ءوزارا مەيىرىمدىلىك, جومارتتىق, قايىرىمدىلىق, قاناعات سىندى ادامگەرشىلىك قۇندىلىقتاردى قالىپتاستىرۋ ەكەنىن ەسكە سالدى.
