«ويجۇمباق 2» انيماتسيالىق ءفيلمىنىڭ باستى كەيىپكەرى ءرايليدى بلوگەر اقەركە ەستايقىزى, ءانشى ءارى اكتريسا گۇلنار تىلەبالدى, كينو, تەاتر جانە دۋبلياج اكتريساسى الما قىلمۇقان, كينو جانە تەاتر اكتەرى, رەجيسسەر رۇستەم جانىامانوۆ دىبىستاعان. «Ninety One» بوي-بەندىنىڭ سوليستەرى – ازامات اشماقىن مەن باتىرحان مالىكوۆ, دۋبلياج رەجيسسەرى شاح-مۇرات ورداباەۆ تا جوباعا ۇلەس قوستى.
«Disney» ستۋدياسىنىڭ باستاماسىنا قولداۋ بىلدىرگەن مادەنيەت جانە اقپارات مينيسترلىگى مەن حالىقارالىق «قازاق ءتىلى» قوعامى بۇل قادام كونتەنت جاساۋشىلارعا ۇلگى بولارلىق ءىس ەكەنىن ايتتى.
«جىل سايىن «Disney» كومپانياسى ءفيلمنىڭ ءتۇرلى تىلدەردەگى 30-عا جۋىق نۇسقاسىن ۇسىنادى. قازاق ءتىلىنىڭ وسىنداي ءىرى تىلدەر قاتارىنا قوسىلۋى – ءبىز ءۇشىن ماڭىزدى وقيعا. بۇل – قازاق تىلىندە ەركىن سويلەيتىن ورتاعا دا, ءتىلدى ۇيرەنۋشىلەرگە دە پايدالى, ءارى قۋانىشتى وقيعا. قازاقشا دۋبلياج سالاسى كەيىنگى جىلدارى جاڭا دەڭگەيگە كوتەرىلىپ كەلەدى. ماسەلەن, «ويجۇمباق 2» ءفيلمىنىڭ دۋبلياجىندا قازاق ءتىلىنىڭ قولدانىس اياسىن, اسىرەسە بالالار اراسىندا سيرەك قولدانىلاتىن ءتول لەكسيكانى ورنىقتىرۋعا جول اشاتىن مىسالدار كوپ. انا ءتىلىمىزدىڭ ءورىسىن بالانىڭ سۇيىكتى كەيىپكەرلەرى ارقىلى كەڭەيتۋ – وتە ۇتىمدى ءتاسىل. ءفيلمدى كورگەن ءار بالدىرعان جاڭا ءسوز ۇيرەنىپ, ونى قولدانا السا, جاقسى ەمەس پە؟ مۇنداي باستامانى قولداپ, وزگەلەرگە مىسال رەتىندە تاراتۋىمىز كەرەك», دەدى مادەنيەت جانە اقپارات ءمينيسترى ايدا بالاەۆا.
«فيلمدەردى ءارتۇرلى ەلدەرگە بەيىمدەپ, دۋبلياجداۋ – «Disney» كومپانياسىنداعى كونتەنت ازىرلەۋ جۇمىسىنىڭ اجىراماس بولىگى ءارى بۇرىننان قالىپتاسقان ءۇردىسى. سول سەبەپتى «Disney Character Voices International» ۇجىمى ءار ءفيلمنىڭ ءتۇرلى تىلدەرگە اۋدارىلعان 30-عا جۋىق نۇسقاسىن ازىرلەيدى. ولاردىڭ ارقايسىسىنداعى كەيىپكەرلەردىڭ بىرەگەي بەينەسىن ساقتاي وتىرىپ, ونى كورەرمەندەرگە «جاقىن» ءارى تۇسىنىكتى ەتىپ اۋداراتىن, دۋبلياجدايتىن دارىندى شىعارماشىلىق كەڭەسشىلەر مەن تەحنيكالىق ماماندار توبى جۇمىلدىرىلادى, دەيدى ورتالىق جانە شىعىس ەۋروپا, تمد ەلدەرى, گرۋزيا جانە موڭعولياداعى «Disney» كومپانياسىنىڭ باس ديرەكتورى كاحابەر اباشيدزە.
«Disney» فيلمدەرىنىڭ ەلىمىزدەگى رەسمي ديستريبيۋتورى, «مەلومان» كومپانياسىنىڭ باس ديرەكتورى ۆاديم گولەنكو: «ەلىمىزدىڭ كورەرمەنى مەملەكەتتىك تىلدە كورسەتىلەتىن «Disney» پرەمەرالارىن قاشاندا ەرەكشە ىقىلاسپەن قارسى الادى. بۇل ءداستۇر 2024 جىلى دا جالعاسىن تاپپاق. ۇلكەن ەكرانداردان قازاق تىلىندە كورسەتىلگەن «موانا», «كولىكتەر 3», «كوكونىڭ قۇپياسى», «ارىستان پاتشا» (2019) فيلمدەرىنىڭ قاتارى جاڭا تۋىندىلارمەن تولىعادى. قازاق تىلىندە ەركىن سويلەيتىندەرگە دە, ءتىلدى ەندى ۇيرەنىپ جۇرگەندەرگە دە ساپالى دۋبلياجدالعان فيلمدەر پايدالى بولارى انىق», – دەيدى ول.
«ويجۇمباق 2» ءفيلمى كينوتەاترلاردا 14 ماۋسىمنان باستاپ كورسەتىلەدى. ال «موانا 2» انيماتسيالىق شىتىرمان وقيعاسىن قاراشا ايىنان باستاپ تاماشالاي الامىز. ءۇشىنشى تۋىندى – «مۋفاسا: ارىستان پاتشا» كوركەم ءفيلمى مۋفاسانىڭ بالالىق جانە جاستىق شاعىن, باۋىرى شراممەن اراداعى وشپەندىلىكتىڭ تۇپكى تاريحىن باياندايدى.
«حالىقارالىق «قازاق ءتىلى» قوعامىنىڭ نەگىزگى جۇمىس باعىتى «Disney» كومپانياسىنىڭ ۇستانىمىمەن ۇندەس كەلەدى. ءبىزدىڭ ۇيىم مەملەكەتتىك تىلدەگى كونتەنت قورىن, اتاپ ايتقاندا, بالا ءتىلىن قازاقشا شىعارۋعا قاجەت قۇرالداردان باستاپ, ءار ادامنىڭ قازاق ءتىلى اياسىندا تۇلعا ءارى مامان بولىپ قالىپتاسۋىنا كەرەك مازمۇن قورىن ارتتىرۋعا باسىمدىق بەرەدى. الەمدىك انيماتسيا جاۋھارلارى, قازاق تىلىندەگى كينوپروكات باعىتىنداعى كونتەنتتى قازاق تىلىنە اۋدارۋ باستاماسىن بارىنشا قولدايمىز. «Disney» كومپانياسىنىڭ بۇل باستاماسى وزگە دە كونتەنت وندىرۋشىلەرگە وتە جاقسى ۇلگى دەپ سانايمىز», دەيدى حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى.
