ەلشىلىكتىڭ مالىمەتىنشە, رەسەيدە گارمالا دەپ اتالاتىن, ال قازاقستاندا ادىراسپان اتىمەن بەلگىلى وسىمدىك پەن ونىڭ قۇرامىنداعى گارمين زاتى ەسىرتكىلىك زات رەتىندە تانىلعان. وسىعان بايلانىستى ونى ەل اۋماعىنا اكەلۋگە, ساتىپ الۋعا, ساقتاۋعا, تاسىمالداۋعا, پوشتا ارقىلى جىبەرۋگە, وسىرۋگە, وڭدەۋگە, ساتۋعا, تاراتۋعا, پايدالانۋعا جانە ونى تۇتىنۋعا ۇگىتتەۋگە قاتاڭ تىيىم سالىنعان.
«ادىراسپان رەسەي مەديتسيناسىندا, مادەنيەتىندە نەمەسە اسحاناسىندا قولدانىلمايدى. سوندىقتان ونىڭ اينالىمى زاڭسىز, ال ونى ناسيحاتتاۋعا, سونىڭ ىشىندە ينتەرنەت ارقىلى تاراتۋعا تىيىم سالىنعان», دەلىنگەن حابارلامادا.
ادىراسپاندى زاڭسىز پايدالانۋ جانە اينالىمعا ەنگىزۋ ءۇشىن ايىپپۇل, اكىمشىلىك قاماۋ, ال شەتەل ازاماتتارى ءۇشىن رەسەي اۋماعىنان شىعارىپ جىبەرۋ تۇرىندەگى سانكتسيالار قولدانىلۋى مۇمكىن.
ەگەر وسىمدىك نەمەسە ونىڭ قۇرامىنداعى زاتتىڭ كولەمى ءىرى دەپ تانىلسا, قۇقىق بۇزۋشىنى بىرنەشە جىلدان ءومىر بويىنا دەيىن باس بوستاندىعىنان ايىرۋ, سونداي-اق 1 ميلليون رۋبلگە دەيىن (شامامەن 6,6 ميلليون تەڭگە) ايىپپۇل سالۋ جازاسى كۇتەدى.
