ءبىرىنشى جوبا قالامگەرلەر قاتارىنان قۇرالعان ەكسپەديتسيا نەگىزىندە ايماقتاردىڭ بۇگىنگى جاي-كۇيىن ەش بۇكپەسىز زەردەلەپ, زەرتتەپ, تولىققاندى ايقىن كارتينانى سۋرەتتەيتىن شىعارمالار جازىپ, ونى باسىپ شىعارىپ, وقىرماندارعا ۇسىناتىن «جاڭا قازاقستاننىڭ ادەبي-تانىمدىق پانوراماسى» دەپ اتالادى. سونداي-اق اتالعان جوبا اياسىندا 20 جاس اقىن-جازۋشىعا مەملەكەتتىك گرانت تاعايىنداۋ قاراستىرىلعان. جاس قالامگەرلەر ءار ايماققا ءبولىنىپ, وڭىرلەردىڭ جاڭا ادەبي بەينەسىن قالىپتاستىراتىن تىڭ تۋىندىلار جازادى. ناتيجەسىندە, قازاق ادەبيەتىنە 20 شىعارما قوسىلاتىن بولادى ء(بىر گرانتتىڭ سوماسى 4,2 ملن تەڭگە).
ەكىنشى جوبا – جازۋشىلار وداعىنىڭ مادەنيەت سالاسىنداعى 90 جىلدىق تاجىريبەسىنە سۇيەنىپ, وتاندىق جانە شەتەلدىك مادەنيەتتانۋشىلار, فيلوسوفتار, الەۋمەتتانۋشىلار, كينوگەرلەر, تەاترتانۋشىلارمەن بىرلەسە وتىرىپ, جاس قالامگەرلەر لەگىن قالىپتاستىرۋعا, ادەبيەت سالاسىندا كەنجەلەپ قالعان دەتەكتيۆ, فەنتەزي, كوميكس جانرلارىن دامىتۋعا نەگىزدەلگەن «جازۋشىلاردىڭ شەبەرلىك مەكتەبى».
جوبا اياسىندا جاس قالامگەرلەر جازۋشىلار وداعىندا شەتەلدىك جانە وتاندىق ادەبيەت مايتالماندارى وتكىزەتىن دارىستەرگە, شەبەرلىك سىنىپتارىنا قاتىساتىن بولادى. قاتىسۋشىلاردىڭ جولى, تاماعى جانە جاتىن ورنى قازاقستان جازۋشىلار وداعى تاراپىنان تولەنەدى.
ءۇشىنشى جوبا – تمد ەلدەرىنىڭ مۇراعاتتارىندا قازاقستاننىڭ مادەنيەتى مەن ادەبيەتى بويىنشا جاڭا مۇراعاتتىق ماتەريالداردى انىقتاۋعا زەرتتەۋلەر جۇرگىزىپ, «قازاقستان جازۋشىلارى زەرتتەۋ ورتالىعىنىڭ تمد ەلدەرى مۇراعاتتارىندا جۇمىس ىستەۋى» جوباسى نەگىزىندە كىتاپتار مەن جيناقتار شىعارۋ. جوبا اياسىندا اقتوبە قالاسىندا حالىقارالىق فورۋم وتەدى دەپ جوسپارلانىپ وتىر.
بۇگىندە مينيسترلىك جازۋشىلار وداعىمەن كەلىسىمشارتقا وتىرىپ, ءۇش جوباعا قاتىسۋعا وتىنىمدەر قابىلداۋ باستالدى.
