سۋداي جاڭا وقۋشىلار سارايى قالانىڭ پريشاحتينسك اۋماعىنان اشىلدى. ەندى, وسى اۋماقتا تۇراتىن بۇلدىرشىندەر روبوتتەحنيكا, VR ساۋلەت ونەرى سەكىلدى ۇيىرمەلەردىڭ ءتۇر-تۇرىنە قاتىسىپ, تانىمىن كەڭەيتە الادى. مۇنىڭ ارقاسىندا بالالار قالا ورتالىعىنا قاتىناماي-اق, وزدەرىنە جاقىن جەردەگى جاڭا ورتالىققا بارادى.
قالانىڭ پريشاحتينسك اۋماعىندا 12 مەكتەپ بار. مۇندا 8 مىڭعا جۋىق وقۋشى ءبىلىم الادى. كۇن سايىن وقۋشىلار سارايىنا 600-دەن استام بالا مەن ءجاسوسپىرىم كەلمەك.
بالالارعا ارنالعان جاڭا عيماراتتىڭ جالپى اۋدانى 3 مىڭ شارشى مەتردى قۇرايدى. بولاشاق ينجەنەرلەر ءۇشىن HI-TECH تسەح, STEM زەرتحاناسى, ءىntellectum ستۋدياسى بار. شىعارماشىلىق دارىندىلار ءۇشىن Art-جانە مۋزىكالىق ستۋديالار قۇرىلدى. سابيلەرگە ەرتە دامۋ كابينەتتەرى جاساقتالعان. سونداي-اق جاس ەكولوگتەرگە ارنالعان ورتالىق تا بار. ءتىپتى تەلەستۋديا, مەديا ورتالىق جابدىقتالعان. كونتسەرتتەر, كونكۋرستار, جارىستار وتكىزۋگە بولاتىن ۇلكەن اكت زالىمەن قاتار, كوۆوركينگ الاڭى دا جۇمىس ىستەپ تۇر.
مۇنىمەن قوسا, مۇمكىندىگى شەكتەۋلى بالالارعا دا بارىنشا جاعداي قاراستىرىلعان. سەنسوريكا جانە موتوريكانى دامىتۋعا ارنالعان كوپتەگەن قۇرىلعى بار. مىسالى, اۋا-كوپىرشىكتى كولبا كورۋ مەن ەستۋدى, تاكتيلدى سەزىمدەردى جەتىلدىرەدى. قۇرعاق دۋش بالانىڭ ەركىندىگىن دامىتۋعا ارنالىپ, بوساڭسۋعا ارنالعان, ونىڭ كومەگىمەن بالا جاڭا تۇستەردى قىزىقتى تۇردە ەستە ساقتاي الادى. ينكليۋزيۆتى ءبىلىم بەرۋ ءۇشىن دە بارلىق جاعداي جاسالعان. جۇمىسقا بىردەن لوگوپەد پەن پسيحولوگ قابىلدانعان.
«كاۋسار» وقۋشىلار سارايىنىڭ اشىلۋىندا ءسوز الىپ, بالدىرعانداردى مەرەكەسىمەن قۇتتىقتاعان وبلىس اكىمى ەرماعانبەت بولەكپاەۆ الداعى ۋاقىتتا مايقۇدىقتان دا وسىنداي ساراي سالامىز دەدى.
– سىزدەردىڭ جان-جاقتى دامۋلارىڭىز ءۇشىن بار جاعدايدى جاساۋعا تىرىستىق. مۇندا IT-تەحنولوگيا, ينجەنەريا, روبوتتەحنيكا, VR-ساۋلەت جانە ۆەب-ديزاين, سونداي-اق باسقا دا كوپتەگەن زاماناۋي باعىت بويىنشا ۇيىرمەلەر جۇمىس ىستەيدى. ارقايسىسىڭىزدىڭ بولاشاعىڭىز ءۇشىن ساپالى ءبىلىم الۋعا مۇمكىندىك بولعانىن قالايمىز. بۇل جەردە سىزدەرگە جاڭا دوستار تابۋعا, وقۋعا, ىزدەنۋگە مۇمكىندىك كوپ, – دەدى ايماق باسشىسى.
بيگە باراتىن سوفيانىڭ اناسى تاتيانا ريحتەر وقۋشىلار سارايىنىڭ قىزدارىن تاعى ءبىر ۇيىرمەگە جازباقشى.
– قالانىڭ ءىرى بولىگىنىڭ ءبىرى پريشاحتينسكىدە بۇرىن مۇنداي وقۋشىلار سارايى بولعان جوق. بالالار ۇيىرمەگە قاتىسۋ ءۇشىن ورتالىققا اۆتوبۋسپەن قاتىنايتىن. حالىق تىعىز ورنالاسقان اۋداندا ۇزاق ۋاقىت كەپتەلىستە تۇراتىن. ەندى, مىنە اشىق اۋادا ءتۇرلى شارالار وتكىزۋگە بولادى. وقۋشىلار سارايىنىڭ اينالاسى اباتتاندىرىلعان. فۋتبول الاڭى, ترەناجەرلەر ورناتىلدى. بالالار دا, اتا-انالار دا جاڭا سارايدىڭ اشىلۋىنا بەك قۋانىشتى. قىزىم سوفيا 4,5 جاستا. ءبىز حورەوگرافيامەن اينالىسۋدى جوسپارلاپ وتىرمىز جانە تاعى ءبىر شىعارماشىلىق ۇيىرمەگە جازىلعىمىز كەلەدى, – دەيدى اۋدان تۇرعىنى ت.ريحتەر.
وسىنداعى مەكتەپتە 10-سىنىپ وقيتىن رامازان ورازالى بىرنەشە رەسپۋبليكالىق جانە حالىقارالىق ءان كونكۋرستارىنىڭ جەڭىمپازى. جاس ونەرپاز ەندى وقۋشىلار سارايىنا كەلىپ, شىعارماشىلىعىن ارمەن قاراي شىڭداماق نيەتى بار.
– وقۋشىلار سارايىندا بالالارعا بارلىق جاعداي جاسالعان. ءارى قاراي ءان ونەرىمەن وسىندا اينالىسقىم كەلەدى. بۇل سارايدان كوپتەگەن تالانت شىعارىنا سەنىمدىمىن, – دەيدى ونەرلى جاس ورەن.
سارايدىڭ اشىلۋىندا مەرەكەلىك باعدارلامالار ۇيىمداستىرىلىپ, سپورتتان ءتۇرلى جارىس ءوتتى.
قاراعاندى وبلىسى
