وليمپيا ويىندارىنا ءار ەلدەن ءار سالماق بويىنشا تەك ءبىر سپورتشى قاتىساتىنىن ەسكەرسەك, 60 كگ دەيىنگى سالماق دارەجەسىندە ءۇش دزيۋدوشى, اتاپ ايتقاندا, ەلدوس سمەتوۆ, نۇرقانات سەرىكباەۆ جانە ماعجان شامشادين وليمپيادالىق رەيتينگتە جولداما يەگەرلەرى تىزىمىندە بولدى. سوندىقتاندا ءوزارا ىرىكتەۋ بەلدەسۋى ۇيىمداستىرىلدى.
ەلدوس سمەتوۆتىڭ بۇل – ءۇشىنشى وليمپياداسى. جەرلەسىمىز 2016 جىلى ريو وليمپياداسىندا التىنعا ءبىر قادام قالعاندا ءسۇرىندى. فينالدا رەسەيلىك بەسلان مۋدرانوۆقا قوسىمشا ۋاقىتتا «ۆازاري» ادىسىمەن جەڭىلدى. توكيو وليمپياداسى جارتىلاي فينالىندا تاتامي يەسى ناوحيسا تاكاتودان قوسىمشا ۋاقىتتا ەسەسى كەتىپ, قولا مەدالدى قاناعات تۇتقانىن كوزىمىزبەن كوردىك. ەندى مىنە, 32 جاستاعى ە.سمەتوۆ ءۇشىنشى مۇمكىندىككە يە بولىپ وتىر.
بايراقتى باسەكەگە قازاقستان ۇلتتىق قۇراما كومانداسىنان سەگىز دزيۋدوشى قاتىسادى. ونىڭ جەتەۋى – ءوز سالماق دارەجەلەرىندە جەكەلەي سايىسقا قاتىسسا, ءبىر سپورتشى ارالاس-كوماندالىق جارىستىڭ ليتسەنزياسىنا يە بولدى.
ايەلدەر: ابيبا ابۋجاقىنوۆا (48 كگ), كاميلا بەرلىقاش (+78 كگ), ەسميگۇل كۋيۋلوۆا (ارالاس-كوماندالىق جارىس).
ەرلەر: ەلدوس سمەتوۆ (60 كگ), عۇسمان قىرعىزباەۆ (66 كگ), دانيار شامشاەۆ (73 كگ), ابىلايحان جۇبانازار (81 كگ), نۇرلىحان شارحان (-100 كگ).
پاريجدە وتەتىن ءXXXIIى جازعى وليمپيا ويىندارىندا دزيۋدو بويىنشا جارىستار 27 شىلدە مەن 3 تامىز ارالىعىنا جوسپارلانعان.
