«حالىق زاڭگەرى» اكتسياسى ءداستۇرلى تۇردە 2016 جىلدان بەرى ءوتىپ كەلەدى. كۇنى بۇگىنگە دەيىن وسى ءىس-شاراعا 8 مىڭنان استام ۇزدىك ساراپشى مەن ءتۇرلى مەملەكەتتىك ورگان وكىلدەرى قاتىسىپ, قۇقىقتىق كومەككە جۇگىنگەن 165 مىڭنان استام تۇرعىن كەڭەس العان.
سىبايلاس جەمقورلىققا قارسى قىزمەت اگەنتتىگى پرەۆەنتسيا قىزمەتى باسشىسىنىڭ ورىنباسارى جىگەر بايگەلديننىڭ ايتۋىنشا, «حالىق زاڭگەرى» رەسپۋبليكالىق اكتسياسىنىڭ باستى ماقساتى – حالىقتىڭ قۇقىقتىق ساۋاتتىلىعىن ارتتىرۋ, تەگىن قۇقىقتىق كومەك كورسەتۋ.
«ناۋقانعا قالامىزدىڭ 80-گە جۋىق بىلىكتى زاڭگەرى مەن مەملەكەت قىزمەتشىسى جينالىپ وتىر. سونىمەن قاتار زاڭگەرلەر تۇرعىنداردان تۇسكەن قۇقىقتىق سۇراقتار بويىنشا تۇسىندىرمە جۇمىستارىن جۇرگىزىلىپ جاتىر. سىبايلاس جەمقورلىققا قارسى ءىس-قيمىل اگەنتتىگى بۇل اكتسياعا جىل سايىن بەلسەندى قاتىسادى. ويتكەنى تۇرعىندارعا قۇقىقتىق كومەك كورسەتۋ پرەۆەنتسيا جۇمىسىنىڭ ءبىر باعىتى سانالادى. جۇرتشىلىق كوبىنە-كوپ جەر, پيك, ميب ماسەلەلەرىمەن كەلىپ جاتىر. وسى ناۋقاندا تۇسكەن سۇرانىستار بويىنشا تۇرعىندارعا ءتيىستى كەڭەس بەرەمىز. ماسەلەنىڭ شەشىم تابۋىن سوڭىنا دەيىن باقىلايمىز», دەيدى ج.بايگەلدين.
ناۋقان باستالاردا كەڭەس الۋعا كەلگەندەر كوپ بولدى. ءار ادامعا جەكە ادۆوكاتتار, مەملەكەت قىزمەتشىلەرى مەن نوتاريۋستار كومەك كورسەتتى. بىرىنەن شىعىپ, ەكىنشى مامانعا جۇگىنگەن تۇرعىندار جەتەرلىك. ولاردىڭ ىشىندە تۇرعىن ءۇي, مۇراگەرلىكتى زاڭنامالىق رەتتەۋ, الاياقتىق, جەكە تۇلعالاردىڭ بانكروتتىق راسىمدەرى, اليمەنت سىندى ماسەلەلەرمەن جۇگىنگەندەر قاراسى قالىڭ. مىسالى, استانا قالاسى تۇرعىن ءۇي جانە تۇرعىن ءۇي ينسپەكتسيا باسقارماسىنىڭ مامانى ساپار ءادىلجاننىڭ ايتۋىنشا, قاراپايىم, ءۇي كەزەگىن بىلۋگە كەلەتىندەردىڭ ءوزى از ەمەس كورىنەدى.
«تۇرعىن ءۇي ماسەلەسى بويىنشا كەڭەس الۋعا كەلەتىندەر جىل سايىن كوبەيىپ جاتىر. ازاماتتار اراسىندا تۇرعىن ءۇي كەزەگى بويىنشا, اتاپ ايتقاندا, كەزەككە تۇرۋ ماسەلەسىنە قاتىستى سۇراقتار كوپ. وسىعان قوسا مەملەكەتتىك تۇرعىن ءۇي باعدارلامالارىنا قاتىستى سۇراقتار ءتۇستى. قويىلعان ساۋالدارعا تولىق جاۋاپ بەرۋگە تىرىستىق. دەگەنمەن ءبىرلى-ەكىلى شەشىمىن تاپپاعان سۇراق بولدى. الدا ولار بويىنشا بايلانىسقا شىعىپ, رەسمي جاۋاپ قايتارامىز. بىزگە كەلگەن ءار ادامنىڭ ءوتىنىشى جەردە قالمايدى», دەيدى س.ءادىلجان.
اكتسيا بارىسىندا تەگىن كەڭەس الۋعا كەلگەن ءاربىر تۇرعىنعا ماماندار قۇقىقتىق, زاڭگەرلىك كومەك كورسەتتى. ال كەيبىر كۇردەلى ماسەلەلەرگە قاتىستى ساۋالداردى قۇزىرلى ورگاندار تىركەپ, سوڭىنا دەيىن جەتكىزۋگە ۋادە بەردى.
جانيا ءابىل,
ل.ن.گۋميلەۆ اتىنداعى ەۇۋ ستۋدەنتى
