جىلداعىداي جۇرتشىلىق تاڭ اتىسىمەن ەلىمىزدىڭ رامىزدەرى ورنالاسقان قازاقستان تاۋىنا كوتەرىلىپ, ءانۇرانىمىزدى شىرقادى. قالانىڭ ەڭ بيىك نۇكتەسىندە كوك تۋدى جەلبىرەتىپ سۋرەتكە ءتۇستى.
– ەلىمىزدىڭ وركەندەپ دامۋى, كوك تۋىمىزدىڭ ماڭگى جەلبىرەپ تۇرۋى ءۇشىن بىزدەي بولاشاق ماماندار ەل ەرتەڭىنە سەرگەك قاراسا ەكەن دەيمىن. وقۋىمىزدى تامامداعان سوڭ وتان دەپ ەڭبەك ەتۋگە ءتيىسپىز, – دەيدى اۆتوماتتاندىرۋ ماماندىعى بويىنشا ءبىلىم الىپ جاتقان ستۋدەنت تەمىرلان ايتقازين.
ءانۇران شىرقاۋ سىندى ءىس-شارا وبلىستىڭ ءار اۋدانىندا ۇيىمداستىرىلدى. ال قىزىققا تولى «Quest-simvol» ويىنى وسكەمەندە عانا ءوتتى. ۇيىمداستىرۋشى قالا جاستارى مەن «ەستىلەر» ۇيىمى. بۇرىن-سوڭدى بولماعان تانىمدىق ويىنعا قالا جاستارى قىزىعۋشىلىقپەن قاتىستى. كوماندالار الەۋمەتتىك جەلى ارقىلى كۇنى بۇرىن تىركەلىپ, قاتىسۋعا نيەت ءبىلدىردى. ويىننىڭ ەرەجەسى دە كوپشىلىكتى ەلەڭ ەتكىزدى. قىسقاشا ايتساق, 3-5 ادامنان قۇرىلعان 9 كوماندا قالانىڭ ءار نۇكتەسىندە سارى جەيدە كيگەن اگەنتتەردى تاۋىپ, جاسىرعان سۇراقتارىنا جاۋاپ بەرۋگە ءتيىس. ولارعا جەتۋى ءۇشىن ترانسپورتتىڭ كەز كەلگەن ءتۇرىن پايدالاندى. ءبىرىنشى جەتىپ, جاسىرعان سۇراعىنا جاۋاپ بەرگەن كوماندا كەلەسى اگەنتتى ىزدەۋگە كىرىسكەن.
– كوماندالاردىڭ ىشىندە استانادان كەلگەن قوناقتار دا بولدى. ويىن رامىزدەر كۇنىنە ورايلاستىرىلعاندىقتان, سۇراقتارىمىز دا قالا ىشىندەگى بەلگىلى جەرلەرگە قاتىستى بولدى. ءدوپ تاۋىپ, شاپشاڭدىق تانىتقاندارى مەجەلى جەرگە جينالدى. شارشاپ-شالدىعىپ جەتكەن ولاردى ءتاتتى-دامدىمەن كۇتىپ الدىق. ال جەڭىمپاز كوماندا كەشكى كونتسەرتتە ماراپاتتالدى, – دەدى ءىس-شارانى ۇيىمداستىرۋشى ايان قالىمبەك. قاتىسقان توعىز كوماندا قالانىڭ بەلگىلەنگەن ءار نۇكتەسىنە قاراي اسىققان. قويىلعان سۇراقتار دا سان ءتۇرلى.
– ەڭ الدىمەن ۇيىمداستىرۋشى جاستارعا العىس ايتامىن. ويىن وتە قىزىقتى بولدى. كوماندامىزبەن قالانىڭ ءار نۇكتەسىن ارالاپ ءجۇرىپ, اگەنتتەر ۇسىنعان سۇراققا جاۋاپ بەردىك. وسىمەن توقتاپ قالماي, تاعى دا جالعاسىن تاپسا ەكەن, – دەيدى ويىنعا بەلسەنە قاتىسقان ارۋناز ەرمەك.
رامىزدەر مەرەكەسى كەشكىلىك كونتسەرتكە ۇلاستى. قورىتىندى ءىس-شارادا «Quest-simvol» ويىنىنىڭ جەڭىمپازدارى ماراپاتتالدى. ءان اۋەلەپ, كۇي كۇمبىرلەگەن كوڭىلدى كەش بيىلعى مەيرامنىڭ نۇكتەسىن قويدى.
شىعىس قازاقستان وبلىسى
