ول روبوت-قوندىرعىنىڭ اتى «وزىمە كومەكتەسە المايمىن» دەپ اتالادى. روبوتتىڭ قۇرىلىمى – وتە قىزىق. ول – گيدراۆليكالىق سۇيىقتىقسىز جۇمىس ىستەي المايدى, بىلايشا ايتار بولساق, «ولەدى». ادامنىڭ جانى سەكىلدى. ونىڭ باعدارلاماسى سۇيىقتىقتى ۇستاپ تۇرۋعا تىرىساتىنداي جاسالعان. ال سۇيىقتىق ونىڭ جانىنان قۇلديلاپ اعىپ كەتەتىندەي جۇيەلەنگەن. قانعا ۇقسايدى. روبوتتىڭ ميى سۇيىقتىق تاۋسىلسا, ءوزىنىڭ دە ىستەن شىعاتىنىن بىلەدى, ۇزدىكسىز وزىنە قايتارىپ وتىرادى. ەڭ قورقىنىشتىسى, باعدارلاماشىلار روبوتقا بوس ۋاقىتىندا كورەرمەندەر الدىندا «باقىت ءبيىن» بيلەتەتىن جۇيە قوسقان. قۇلتەمىر 32 ءتۇرلى قيمىل ءتۇرىن جاساي الدى. ويلاپ قاراڭىزشى, روبوت ءومىر ءۇشىن كۇرەستىڭ اراسىندا باقىت ءبيىن بيلەۋگە ءماجبۇر. جەر بەتىندە تىرشىلىك ەتىپ جۇرگەن قانشاما ادامنىڭ بەينەسى كوز الدىڭا كەلەدى. جانارىمىز كۋا بولعان, جادىمىزدا ساقتالعان...
جوبا العاش ىسكە قوسىلعان كەزدە روبوت باقىتتى بولىپتى. بيلەپتى, كوپ ۋاقىتىن كوپشىلىككە ارناپتى. ويتكەنى سۇيىقتىقتى ۇستاپ تۇرۋ وڭاي بولدى. ال ءبىراز جىل وتكەننەن كەيىن شارشاپ, كوكەيىن «ۇمىتسىزدىك» باستى. سەبەبى ءومىرىن ساقتاۋعا كۇشى جەتپەي, ءالى كەتە باستادى. ءتىپتى بيلەۋگە ۋاقىتى جەتپەدى. روبوت «عۇمىرىنىڭ سوڭعى كۇندەرىندە» ءومىردى ساقتاۋ مەن قان كەتۋ اراسىنداعى شەكسىز كۇرەس تسيكلىنە ءتۇستى. ىستەن شىعارىندا قانشاما ادام جانتالاسقا كۋا بولدى. 2019 جىلى روبوت گيدراۆليكالىق سۇيىقتىقتى تاۋىسىپ, ۇستاي الماي, جۇمىس ىستەۋىن توقتاتتى. الەم جىلادى. الەۋمەتتىك جەلى شۋلادى. بىراق ەشكىم ول روبوتتان ءوزىن كورمەدى.
امال نەشىك, ول وسىنداي تاعدىرعا باعدارلامالانعان. نە ىستەسە دە, قانشا تىرىسسا دا, ءومىرىن ساقتاي المادى. بىراق باعدارلاماشىلار روبوت ىستەن شىققاندا, بار شىندىقتى ايتتى. ەگەر ول ءومىرىن ساقتاۋ ءۇشىن جانتالاسىپ, ءريتمدى جيىلەتپەگەنىندە, تىنىشتىق قالپىن ساقتاي العاندا, ۇزاق ۋاقىت ءومىر سۇرەر ەدى. باقىت ءبيىن دە ءبىراز جىل بيلەر ەدى. ال ءبىز شە؟ ءبىز نە ىستەر ەكەنبىز؟
