قاسيەتتى دومبىرا

ءبىرجان سال اتىنداعى مۋزىكالىق كوللەدج­دە, قازاق حاندىعىنىڭ 550 جىلدىعى مەرەكەسى اياسىندا, كوكشەتاۋ قالاسى اكىمىنىڭ كۋبوگىن ساراپقا سالعان وبلىستىق «قاسيەتتى دومبىرا» بايقاۋى وتكىزىلدى. بايقاۋدىڭ نەگىزگى ۇستانىمى قازاق حالقىنىڭ مادەنيەتىن وسكەلەڭ ۇرپاققا, ونەرسۇيەر جۇرت­شىلىققا كەڭىنەن ناسيحاتتاۋ, جاس تالانتتار مەن شەبەر ورىنداۋشىلاردىڭ جولىن اشۋ بولىپ تابىلادى. «ءاندى سۇيسەڭ, مەنشە ءسۇي», دەپ دانا اباي ايتقانداي, حال­قىمىزدىڭ قارا دومبىراسى – قازاقتىڭ ءان مەن كۇي قۇدىرەتىن اسقاقتاتقان, تاريح ءۇنىن جالعاس­تىرعان ۇلى جادىگەرىمىز. قازاقتىڭ ءانى مەن كۇيى – حالقىمىزدىڭ كونە زاماننان بەرى قالىپتاسقان اسىل قازىناسى, ۇلتتىڭ بەكزات بولمىسى, جۇرەك سىزداتقان ساعىنىشى, كوڭىلدىڭ نازىك قىلىن شەرتەر سەزىمى, مۇڭ-شەرى, قىزىق-قۋانىشى. سوندىقتان بولسا كەرەك, ۇكىلى دومبىرامىزدىڭ ءۇنى ەكى كۇن بويى كوكشە اسپانىندا اۋەلەي قالىقتاپ, جۇرەكتەردى تەربەتىپ تۇردى. بايقاۋعا كوكشەتاۋ قالاسىنىڭ, اقكول, ەرەيمەنتاۋ, ەگىندىكول جانە زەرەندى اۋداندارىنىڭ جۇيرىك 25 دومبىراشىسى قاتى­سىپ, ونەر جارىسىنىڭ كورىگىن قىزدىرا ءبىلدى. قازىلار القاسى وزا شاپقان ۇزدىكتەردى انىقتاۋ ءۇشىن از تەر توكپەگەنىن دە باي­قا­دىق. ايتكەنمەن, «جارىس مۇ­راتى – جەڭۋ», دەمەكشى شوق­تىعى بيىك دومبىراشىلارعا جۇرت­شى­لىق دۇركىرەتە قول سوعىپ, ريزا­شى­لىقتارىن ءبىلدىردى. ءسويتىپ, «ۇزدىك دومبىراشى» اتاۋىندا كوكشەتاۋلىق ماعجان كارىباەۆ, «ۇزدىك ءداستۇرلى ءانشى» – زينۋلعابيدەن نۇرماعامبەت (ەگىن­دىكول اۋدانى); «ەرەكشە داۋىس» – سەرعازى قاراقات (اقكول اۋدانى); «كورەرمەن كوزايىمى» – بايعابىلوۆ الىشەر (كوكشەتاۋ قالاسى) جەڭىمپاز اتاندى. ولارعا كۋبوك, ديپلوم جانە باعالى سىي­لىقتار تاپسىرىلدى. بايقاۋعا قاتىسۋشىلاردى قۇتتىقتاعان كوكشەتاۋ قالا­سى اكىمىنىڭ ورىنباسارى التى­ناي امىرەنوۆا «قاسيەتتى دومبى­رانىڭ» ءداستۇرلى سيپات الاتىنىن مالىمدەدى. باقبەرگەن امالبەك, «ەگەمەن قازاقستان». اقمولا وبلىسى. سۋرەتتە: بايقاۋدان كورىنىس.