جەرەبە تارتۋ ءراسىمى سامارقاننىڭ رەگيستان الاڭىندا ءوتتى. قازاقستاننىڭ ۇلتتىق قۇراماسى D توبىنا ءتۇستى. قارسىلاستارىمىز – يسپانيا, جاڭا زەلانديا جانە ليۆيا. وسىلاردىڭ اراسىندا ەڭ ازۋلىسى پيرەنەي تۇبەگىنىڭ وكىلدەرى ەكەنى داۋسىز. ولار 2000 جانە 2004 جىلدارى الەم چەمپيونى اتانىپ, جەتى رەت ەۋروپا بىرىنشىلىگىندە (1996, 2001, 2005, 2007, 2010, 2012, 2016) باس جۇلدەنى ولجالادى. 2016 جىلى جالاۋى جەلبىرەگەن دۇنيەجۇزىلىك دودانىڭ 1/8 فينالىندا يسپاندىقتارمەن جولىمىز قيىسىپ, 2:5 ەسەبىمەن ەسە جىبەرگەن ەدىك. 2018 جىلى قارت قۇرلىقتىڭ باستى جارىسىندا ولارمەن قايتا كەزدەستىك. بۇل باسەكەنىڭ نەگىزگى ۋاقىتى تەڭ اياقتالىپ, پەنالتي سوعۋ بارىسىندا قارسىلاس كوماندانىڭ باعى جاندى – 5:5 (پەنالتيدەن – 1:3). ال جاڭا زەلانديا مەن ليۆيانى ۇتۋ وتاندىق فۋتزالشىلار ءۇشىن ەڭ قيىندىق تۋعىزبايدى دەپ ويلايمىز.
وزبەكستانداعى دوپ دوداسىنىڭ وزگە توپتارىندا مىنا كوماندالار ءوزارا كۇش سىناسادى: ا توبى – وزبەكستان, نيدەرلاند, پاراگۆاي, كوستا-ريكا. ۆ توبى – برازيليا, كۋبا, حورۆاتيا, تايلاند. س توبى – ارگەنتينا, ۋكراينا, اۋعانستان, انگولا. ە توبى – پورتۋگاليا, پاناما, تاجىكستان, ماروككو. F توبى – يران, ۆەنەسۋەلا, گۆاتەمالا, فرانتسيا.
فۋتزالدان الەم چەمپيوناتى 1989 جىلدان بەرى ۇيىمداستىرىلىپ كەلەدى. بۇل جارىستا برازيليا قۇراماسى ەڭ كوپ ولجاعا كەنەلدى. وڭتۇستىك امەريكانىڭ وعلاندارى 5 رەت باس جۇلدە ولجالادى. ودان بولەك, برازيليالىقتاردىڭ قورجىنىندا 1 كۇمىس پەن 2 قولا مەدال بار. يسپانيانىڭ ورەندەرى بەس باسەكەنىڭ فينالىنا شىعىپ, ەكى رەت توپ جاردى. پيرەنەي تۇبەگىنىڭ تۇلەكتەرى تاعى ءبىر جارىستى ءۇشىنشى ورىنمەن قورىتىندىلادى. ارگەنتينا (1 التىن, 1 كۇمىس) مەن پورتۋگاليا (1 التىن, 1 قولا) قۇرامالارى ءبىر-ءبىر رەتتەن تەڭدەسسىز دەپ تانىلدى. سونداي-اق جۇلدە العاندار قاتارىندا نيدەرلاند (1 كۇمىس), اقش (1 كۇمىس, 1 قولا), يتاليا (1 كۇمىس, 2 قولا), رەسەي (1 كۇمىس, 1 قولا) جانە يران (1 قولا) قۇرامالارى بار.
سوڭعى الەم چەمپيوناتى وسىدان ءۇش جىل بۇرىن ليتۆادا ۇيىمداستىرىلدى. بالتىق جاعالاۋىندا پورتۋگاليانىڭ ويىنشىلارى الدارىنا جان سالمادى. فينالدا ولار ارگەنتينانى 2:1 ەسەبىمەن ۇتتى. قولا مەدال ءۇشىن ماتچتا برازيليا مەن قازاقستان قۇرامالارى كۇش سىناستى. بۇل باسەكە 4:2 ەسەبىمەن برازيليالىقتاردىڭ پايداسىنا شەشىلدى. ناتيجەسىندە, ليتۆاداعى دوپ دوداسىن وتانداستارىمىز ءتورتىنشى ورىنمەن قورىتىندىلادى.
ال بۇعان دەيىن قازاقستاننىڭ فۋتزالشىلارى دۇنيەجۇزىلىك دوداعا تاعى ەكى رەت قاتىسقان ەدى. تارقاتىپ ايتساق, 2000 جىلى گۆاتەمالادا توپتىق تۋرنيردە سۇرىنسەك, 2016 جىلى كولۋمبياداعى جارىستىڭ 1/8 فينالدىق مەجەسىندە يسپانياعا (2:5) ەسە جىبەردىك.
