سۋرەتتى تۇسىرگەن – جانگەلدى ابدىعالىم
بيىل قاراعاندى وبلىسىندا جەرگىلىكتى جەلى قۇرامىنا كىرەتىن 571 شاقىرىم اۆتوموبيل جولى جوندەلەدى. بۇل تۋرالى وبلىس اكىمدىگىندە وتكەن كەڭەستە جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ماقسۇت قوجانوۆ ايتتى.
– وبلىستىق ماڭىزى بار 178 شاقىرىم جولدى, قالالار مەن اۋدانداردا 281 شاقىرىم جانە «اۋىل – ەل بەسىگى» ارنايى جوباسى بويىنشا 112 شاقىرىم جول بولىگىن جوندەۋ جوسپاردا بار. «ساكەن سەيفۋللين – وسپەن – اقادىر» اۆتوجولىنىڭ 26 شاقىرىمىندا, سونداي-اق «اقسۋ – ايۋلى – اقتوعاي» اۆتوجولىنىڭ 57 شاقىرىمىندا ورتاشا جوندەۋ جۇمىستارى جۇرگىزىلەدى. «قارقارالى – قوياندى» ۋچاسكەسىنە ورتاشا جوندەۋ جۇمىستارى جالعاسىپ جاتىر, – دەدى ماقسۇت قوجانوۆ.
قالا ىشىندەگى جول قۇرىلىسى جۇمىستارىندا كىدىرىس جوق. بيىل 128 شاقىرىم جول جوندەلەدى. ناتيجەسىندە, جول توسەمىنىڭ نورماتيۆتىك جاعدايداعى ۇلەسى 72-دەن 79%-عا دەيىن ۇلعايادى.
پيچۋگين – نوۆوسەلوۆ كوشەلەرىندە بىلتىر باستالعان كۇردەلى جوندەۋ جۇمىستارى جالعاسىن تاۋىپ جاتىر. بارلىعى 4,8 شاقىرىم جول توسەمىن جاڭارتۋ قاجەت. تەمىرجول ۆوكزالىنان تەرەشكوۆا كوشەسىنە دەيىن, 7-ماگيسترالعا شىعار جولعا دەيىن اسفالتتالادى.
بىلتىر وسى جولداعى سۋ جانە كارىز جەلىلەرى قايتا قۇرىلعان ەدى. مۇنداي شارۋا الداعى ۋاقىتتا قانداي دا ءبىر سۋ, كارىز جەلىسىنەن اپات بولعان جاعدايدا, جاڭا اسفالتتى قايتا قوپارماۋ ءۇشىن جاسالىپ وتىر. مۇنىمەن قوسا, تەرەشكوۆ كوشەسىندەگى اينالما جولدان پريگورودناياعا دەيىن اسفالتبەتوننىڭ تومەنگى قاباتى توسەلدى. ەندى ونداعى جول قاباتى تولىعىمەن اۋىستىرىلادى.
– قاراعاندىدا جول جوندەۋ ماۋسىمى باستالدى. قىم-قۋىت قالا تىرشىلىگىندە جاياۋ جۇرگىنشىلەر جولىنىڭ قۇرىلىسى جونىندە ايتىلعان سىن-ەسكەرتپەلەردى نەگىزگە الامىز. جول قوزعالىسىن تەحنيكالىق رەتتەۋدى جايلاستىرۋ راسىندا ساۋاتتى كوزقاراستى تالاپ ەتەتىندەي. نوسەرلى كارىز جەلىلەرىن سالۋ مەجەلەندى. كەزەڭ-كەزەڭىمەن قارجىلاندىرۋ جۇيەسىن نىسانا ەتتىك. بۇل – ۇتىمدى ءتاسىل. تۇتاستاي العاندا, قالا بويىنشا 128 شاقىرىم جوندەلمەك. ول ءۇشىن 24 ملرد تەڭگە قاراستىرىلدى. جۇمىس ۇدەرىسىنە 5 ساتىلى باقىلاۋ امالى ىسكە اسىرىلادى. جول اكتيۆتەرى ساپاسىنىڭ ۇلتتىق ورتالىعىنىڭ زەرتحاناسى باقىلايدى. سونى تەحنولوگيانى ءساتتى ەنگىزىپ جاتىرمىز دەپ وي ايتۋعا بولادى. ونىڭ تيىمدىلىگىن ۋاقىت كورسەتەدى. بيىل ورتالىق كوشەلەردى ءبىر ەڭسەرىپ الساق, ودان كەيىن حالىق نازارى تۇسكەن جەرلەرگە ءمان بەرەمىز. بيىل جوندەۋ جۇمىستارىنىڭ جوسپارى – 128 شاقىرىم – 2 قۇرىلىس نىسانى, 2 كۇردەلى جوندەۋ, 1 رەكونسترۋكتسيا, 127 ورتا جوندەۋ ۋچاسكەسى, – دەيدى قالا اكىمىنىڭ ورىنباسارى رۇستەم قوجاقاپانوۆ.
بۇگىندە تەمىرجول ۆوكزالىنان گوگول كوشەسىنە دەيىن جارىق باعاندارىن الىپ تاستاپ, جول توسەمىن فرەزەرلەۋ جۇرگىزىلگەن. ياعني پيچۋگين كوشەسىنىڭ 4,8 شاقىرىمدىق اۆتوجولىن كۇردەلى جوندەۋ كەزىندە, اسفالت توسەمىنىڭ جوعارعى قاباتى الىنىپ تاستالعان. «جاڭا اسفالت توسەۋ ءۇشىن جەر بەدەرىنىڭ تەگىستىگىنە اسا ءمان بەرىلدى» دەيدى ماماندار. س4 ماركالى قيىرشىق تاس ماتەريالى توسەلىپ جاتىر. بۇل قيىرشىق تاس ماركاسى درەناجدىق قاسيەتكە يە. اۋىر سالماق پەن قىتىمىر ايازعا, ءتۇرلى تەمپەراتۋرا مەن ىلعالعا ءتوزىمدى.
– وسى باعىتتاعى جۇمىسقا 10 ساۋىردەن باستاپ كىرىستىك. بۇل كوشە كوپتەن بەرى جوندەۋ كورمەگەن. بىراق ساراپتاۋ امالدارىنىڭ ناتيجەسىندە جول ساپالى سالىنعان. ءبىز ەندى مۇندا ءۇش قاباتتى توسەم جاسايمىز. بارلىق قاباتى وزدىگىنەن جولدىڭ جوعارى ساپاسى مەن بەرىكتىگىن قامتاماسىز ەتەدى. قاجەت ماتەريالدى دۇرىس تاڭداۋ جانە توسەۋ تەحنولوگياسىن ساقتاۋ جول توسەمىنىڭ وڭتايلى ونىمدىلىگى مەن بەرىكتىگىنە كەپىلدىك بولادى. بيىل جوبانى ۇتىپ العانداعى جوبا قۇنى 1,7 ملرد تەڭگە بولعان. كەيىنىرەك قازىرگى باعام مەن ساناتسيا قىزمەتىن ەسكەرە وتىرىپ, باعا 3,6 ملرد تەڭگەگە جۋىقتادى, – دەيدى «اگرودور» جشس ديرەكتورى ناتاليا مالچۋشكينا.
شاھاردىڭ وڭتۇستىك-شىعىسىندا «زامان», «اتامۇرا» تۇرعىن ءۇي كەشەندەرى بوي كوتەرگەن اۋدانداعى №1 ۋچاسكەدە جولدىڭ ءتۇبىن جايلاستىرۋ, نىعىزداۋ, توپىراق ازىرلەۋ جۇمىستارى ءجۇرىپ جاتىر. بۇرىن مۇندا اسفالت مۇلدەم بولماعان ەكەن. بۇگىندە نىسانداعى كارىز قۇدىقتارىن تازارتۋ, جول قۇرىلىسىنىڭ قۇجاتى نەگىزىندە اسفالتبەتون توسەۋدەن باسقا دا, كولىك قوزعالىسىن رەتتەۋدىڭ تەحنيكالىق قۇرالدارىن ورناتۋ جوسپاردا بار كورىنەدى. مىسالى, اۆتوبۋس ايالدامالارى مەن زاماناۋي سىرتقى جارىقتاندىرۋدىڭ ءمان-ماڭىزى جوعارى.
– قوسقاباتتى اسفالتبەتون توسەۋدى ويلاستىرىپ وتىرمىز. جاياۋ جۇرگىنشىلەر جولىن سالۋ دا ويىمىزدا بار. كارىز جۇيەسىن سالۋ ومىرشەڭ مانگە يە. جوبا قۇنى 3,2 ملرد تەڭگە شاماسىندا. بۇگىندە 300 ملن تەڭگە سوماسىنداعى قاراجات يگەرىلۋدە. توسىن جايلار كەزىكپەسە, بۇل باعىتتى قىركۇيەك ايىندا قولدانىسقا بەرۋ كوزدەلىپ وتىر. جول – بۇقارا نازارىنداعى دۇنيە. سوندىقتان تەحنيكالىق قاداعالاۋ جۇمىسىنا باسا ءمان بەرىلۋى قاجەت. تالاپ جوعارى, – دەيدى قالالىق اۆتوموبيل جولدارى سەكتورىنىڭ مەڭگەرۋشىسى ءمادى قوجانوۆ.
«بيتۋمنىڭ جارتىسى كورشىلەس رەسەيدەن, قالعانى پاۆلوداردان جەتكىزىلەدى. «بيتۋم ناشار» دەمەڭىز. ويتكەنى تيتاندى بيتۋمعا قوسپا رەتىندە قولدانامىز. بۇل – جول قۇرىلىسىنداعى ءورىستى باعىت. تيتان قوسپالارى جول توسەمىنىڭ ونىمدىلىگىن ەداۋىر جاقسارتا الادى, ولاردىڭ بەرىكتىگىن, تەمپەراتۋراعا توزىمدىلىگىن ارتتىرادى, توزۋىن جانە «قارتايۋىن» تەجەيدى», دەپ سەندىردى مەردىگەر كومپانيا وكىلى.
قاراعاندى وبلىسى
