ەرەن تۇلعانى ەسكە الۋ جيىنىنا اسكەري سالانىڭ ارداگەرلەرى, اسكەري وقۋ ورىندارىنىڭ كۋرسانتتارى مەن قايراتكەردىڭ تۋىستارى قاتىستى. ەڭ اۋەلى جيىلعان جۇرتشىلىق ارميا گەنەرالىن ءبىر مينۋت ۇنسىزدىكپەن ەسكە الىپ, ساربازدار سالتاناتتى مارشپەن ءجۇرىپ ءوتتى. ەسكەرتكىش تاقتا الدىندا شاكىرتتەرى ءسوز سويلەپ, باتىر رۋحىنا قۇرمەت كورسەتتى.
– ومىردەن كوشسە دە, كوڭىلدەن وشپەيتىن ادامدار بولادى. ساعادات نۇرماعامبەتوۆ تە ءدال سونداي, ەشقاشان ۇمىتىلمايتىن الىپ تۇلعا. ول – سوعىستى باسىنان وتكەردى, تاعدىردىڭ تالاي تار سوقپاعىنان ءوتتى. بىراق سوعان قاراماستان, ناعىز اسكەري ماماننىڭ ۇلگىسى بولا ءبىلدى. قول استىنداعىلاردىڭ بارىنە قامقورلىق تانىتىپ جۇرەتىن, ادامگەرشىلىگى, كىسىگە دەگەن قۇرمەتى مول جان ەدى, – دەپ الدى وتستاۆكاداعى گەنەرال-مايور پاۆەل نوۆيكوۆ.
وفيتسەرلەر وداعى بىرلەستىگىنىڭ وكىلدەرى, قارۋلى كۇشتەردىڭ ارداگەرلەرى مەن قالا تۇرعىندارى ماڭگىلىك الاۋعا گۇل شوعىن قويدى. ساعادات نۇرماعامبەتوۆتىڭ ءومىر جولىنا قاتىستى مول ماعلۇماتقا تولى بەينەبايان كوپشىلىك نازارىنا ۇسىنىلدى. عيبراتتى عۇمىرىن وتانعا قىزمەت ەتۋگە ارناعان تۇلعانىڭ مەرەيتويى جىل كولەمىندە تويلانادى. جىل باسىنان بەرى الماتىدا باتىردىڭ 100 جىلدىعىنا ارنالعان بىرنەشە سپورتتىق جانە اسكەري شارالار ءوتتى.
– تاريحتى جاسايتىن تۇلعالار. ءاربىر سالانىڭ كوشباسىندا كاسىبي بىلىگى, ءبىلىمى مەن تانىمى ۇشقىر ازاماتتار جۇرسە يگى. ساعادات نۇرماعامبەتوۆتىڭ بىلىكتىلىگىنىڭ, قىراعىلىعىنىڭ ارقاسىندا ەلىمىزدە ارمياعا قاتىستى ماڭىزدى شەشىمدەر قابىلداندى. ءوز ءىسىنىڭ حاس شەبەرى بولعانى سول, ول ءتىپتى پولك كومانديرلەرىنىڭ تەگىن جاتقا بىلەتىن. اسكەري سالانىڭ الەۋەتىن كوتەرۋگە, قازاق ارمياسىنىڭ قۋاتتى كۇشكە اينالۋىنا قاجىرلى ۇلەس قوسقان قاھارماندى كەيىنگىلەر ۇمىتپاۋعا ءتيىس, – دەيدى وتستاۆكاداعى گەنەرال-مايور ماحمۇت تەلەعۇسوۆ.
الماتى
