فوتو: ن.بايبۋلين
استانادا جاقسىلىق ۇشكەمپىروۆ اتىنداعى جەكپە-جەك سارايىندا ءوتىپ جاتقان جارىستا جەكەلەي سىننان بولەك, العاش رەت كوماندالىق جانە جۇپتىق سايىستاردا جەڭىمپازدار انىقتالادى.
قاتىسۋشىلارعا ساتتىلىك تىلەگەن ماۋلەن اشىمباەۆ بوچچادان سپورتشىلارىمىزدىڭ شەبەرلىكتەرى شىڭدالىپ, سەنىمدىلىكتەرى كۇشەيىپ, ءىرى جەڭىستەرگە قۇلشىنىسى ارتىپ كەلە جاتقانىن اتاپ ءوتتى.
«جۋىردا فينليانديادا وتكەن جارىستا ۇلتتىق قۇرامامىزدىڭ مۇشەلەرى قۋانىش اسقاربەكوۆ, يتيانا شىڭعىسحانوۆا, الەكساندر قۇرمانتاەۆ العاش رەت قولا مەدال جەڭىپ الدى. بۇل – جىل وتكەن سايىن سپورتشىلارىمىزدىڭ كاسىبي دەڭگەيى ءوسىپ كەلە جاتقانىن كورسەتەدى. از ۋاقىت ىشىندە اتالعان سپورتتان جارىق جۇلدىزدارىمىزدىڭ شىققانىنا جانە ءار جارىس سايىن قاتىسۋشىلار قاتارى كوبەيىپ كەلە جاتقانىنا قۋانىشتىمىن. بارشاڭىزدى ماقتان تۇتامىز. مەملەكەت باسشىسى قازاقستاندا ينكليۋزيانى دامىتۋعا ۇنەمى باسا ءمان بەرىپ كەلەدى. جەتىستىكتەرىمىز – وسىنداي قولداۋدىڭ جانە ۇلكەن كوماندانىڭ بىرلەسكەن جۇمىسىنىڭ ناتيجەسى», دەگەن ماۋلەن اشىمباەۆ سپورتشىلارعا, ولاردىڭ اتا-انالارى مەن جاتتىقتىرۋشىلارعا العىس ءبىلدىردى.
ايتا كەتسەك, فينليانديانىڭ لاحتي قالاسىندا وتكەن سايىستا قۋانىش اسقاربەكوۆ جەكەلەي سىندا قولا مەدال ولجالادى. سونداي-اق كوماندالىق جارىستا دا قۋانىش اسقاربەكوۆ, يتيانا شىڭعىسحانوۆا, الەكساندر قۇرمانتاەۆ ۇزدىك ۇشتىكتەن كورىندى. ودان بولەك, جەكەلەي سىندا يتيانا شىڭعىسحانوۆا – ءتورتىنشى, مەرۋەرت تىلەبالدى – بەسىنشى, بالجان بولەكپاەۆا – التىنشى, تەمىرلان التىنسارى سەگىزىنشى ورىن العانىن اتاپ وتكەن ءجون.
«سوڭعى جىلداردا ەلىمىزدە بوچچا قارقىندى دامىپ كەلەدى, تۇراقتى اينالىساتىندار قاتارى شامامەن 20 پايىزعا ارتىپ وتىر. بۇل – ەرەكشە قاجەتتىلىگى بار مىڭداعان ازاماتقا سپورتپەن شۇعىلدانۋعا, جاڭا دوستار تابۋعا جانە حالىقارالىق ارەنالاردا ۇلكەن جەتىستىكتەرگە جەتۋگە جول اشادى. بوچچانىڭ وسىلاي كەڭىنەن تانىلىپ, جاڭا قوزعالىسقا اينالىپ كەلە جاتقانىنا قۋانىشتىمىن. بۇل رەتتە سىزدەر ۇلكەن ۇلگى كورسەتىپ كەلەسىزدەر», دەدى فەدەراتسيا پرەزيدەنتى.
بىلتىر ەل چەمپيوناتىنا 10 وڭىردەن 50-گە جۋىق سپورتشى كەلسە, بيىل 12 وڭىردەن 89 سپورتشى قاتىسۋعا ءوتىنىم بەرگەن. قازىرگى ۋاقىتتا 10 وبلىستا بوچچا فەدەراتسياسى فيليالدارى جۇمىس ىستەيدى. ال, 12 وڭىردە بوچچا ۇيىرمەلەرى بار.
سونىمەن قاتار, بۇگىن فەدەراتسيا كونفەرەنتسياسىنىڭ كەزەكتەن تىس وتىرىسى ءوتتى. وندا قاتىسۋشىلار ينكليۋزيۆتى سپورت تۇرلەرىن ودان ءارى دامىتۋدىڭ وزەكتى ماسەلەلەرىن, ونىڭ ىشىندە جاتتىعۋ بازاسىن دامىتۋ, قارجىلاندىرۋ, سپورتشىلار اراسىندا باسەكەلەستىكتى ارتتىرۋ, تاجىريبە جيناقتاۋ جانە تاعى باسقا باسىمدىقتاردى تالقىلادى.
