يتاليادا ونەر كورسەتەدى

ۇستىمىزدەگى جىلدىڭ ءساۋىر ايىندا يتاليادا وتەتىن Fiestalonia حالىقارالىق كونكۋرسىنا ەلىمىزدىڭ اتىنان سولتۇستىكقازاقستاندىق ەلۆيرا نۇرعوجينا قاتىسادى. ەسكە سالا كەتەيىك, ول وتكەن جىلدىڭ قاراشاسىندا استانادا ۇيىمداستىرىلعان, ەلىمىز بەن  رەسەي, يسپانيا, ۋكراينا جانە يتاليا مەملەكەتتەرىنەن كەلگەن 86 ءانشى سىنعا تۇسكەن Fiestalonia Kazahstan حالىقارالىق بايقاۋ­ىندا ەكىنشى دارەجەلى ديپلومعا يە بولعان ەدى. وسى جەتىستىك ءان­شىگە سوناۋ يتاليا جەرىندە ونەر كورسەتۋگە مۇمكىندىك بەرىپ وتىر. بەس جاسىنان بەرى ءان سالۋدى جانىنا سەرىك ەتكەن ونەرپاز قىز بۇگىندە قازاق ءانىن جات ەلدە ورىنداۋ ءۇشىن قىزۋ دايىندالىپ جاتىر. ونىڭ ماقساتى – بەدەلدى كونكۋرستا قازاقستاندى لايىقتى تانىتىپ, كورەرمەندى باي مادەنيەتىمىزبەن تانىستىرۋ. ە.نۇرعوجينا پەتروپاۆلداعى ونەر كوللەدجىن ءبىتىرىپ, ودان كەيىن الماتىدا مۋزىكالىق جوعارى ءبىلىم العان. قازاق, اعىلشىن, كورەي جانە فرانتسۋز اندەرىن ناقىشىنا كەلتىرە ورىنداي بىلەتىن جاس تالاپ قازىرگى تاڭدا ءوز رەپەرتۋارىن تولىقتىرۋدى كوزدەپ ءجۇر. جولدىباي بازار, «ەگەمەن قازاقستان».