جىل جەتىستىگى جەتەرلىك

دزيۋدو – جەر جۇزىنە ەڭ تانىمال سپورت ءتۇرىنىڭ ءبىرى. بۇگىندە سپورتتىڭ بۇل تۇرىنەن دۇنيەجۇزىنىڭ كوپتەگەن ەلدەرىندە ۇلتتىق فەدەراتسيالار جۇمىس ىستەپ, كۇنشىعىس ەلىنىڭ ءتول كۇرەسىن دامىتىپ جاتىر. ءبىزدىڭ ەلدە دە دزيۋدو كۇرەسىمەن اينالىساتىن جاستاردىڭ قاتارى جىل سايىن كوبەيىپ كەلەدى. وسى ورايدا دزيۋدو فەدەراتسياسىنىڭ جاستاردى سپورتقا تارتىپ, كۇرەستىڭ بۇل ءتۇرىن دامىتۋدا جاساپ جاتقان جۇمىسىن ايتا كەتكەنىمىز ءجون. جاقىندا ءبىز «دزيۋدو فەدەراتسياسى» رەسپۋبليكالىق قوعامدىق بىرلەستىگىنىڭ ءبىرىنشى ۆيتسە-پرەزيدەنتى ماراتبەك مىقتىبەكوۆپەن وتكەن جىلى ەلىمىزدە دەيۋدونى دامىتۋ ءۇشىن قانداي جۇمىستار جاسالعانى تۋرالى اڭگىمەلەسكەن ەدىك. – بىلتىر ۇلتتىق قۇرا­مانى جارىستارعا دايىنداۋ ماقساتىندا قانداي جۇمىس جۇرگىزىلدى؟ – الدىمەن ۇلتتىق قۇرامانىڭ دايىندىعىنا بايلانىستى ايتارىم, ءبىز كەڭەسشى-جاتتىقتىرۋشى رەتىندە بەلگيالىق بەلگىلى باپكەر الەكساندر ياتسكەۆيچتى شاقىردىق. ول كەزىندە 10-نان استام وليمپيا ويىندارىنىڭ جانە الەم ءبىرىن­شىلىكتەرىنىڭ جۇلدەگەرلەرىن جانە 50-گە جۋىق ەۋروپا چەمپيوندارى مەن جۇلدەگەرلەرىن دايىنداعان جاتتىقتىرۋشى. ءوزى وليمپيا ويىندارىنىڭ جانە الەم ءبىرىن­شىلىكتەرىنىڭ جۇلدەگەرى, ءۇش دۇركىن ەۋروپا چەمپيونى. قازىر ەۋروپا دزيۋدو وداعىنىڭ سپورت ديرەكتورى قىزمەتىن اتقارادى. وسى بىلىكتى مامانمەن اقىلداسا كەلە, ەرلەر ۇلتتىق قۇراماسىنىڭ 2014 جانە 2015 جىلدارعا ارنالعان جاتتىعۋ جوسپارى جاسالدى. – جالپى العاندا, بىلتىر ەلىمىزدە قانشا جارىس وتكىزىلدى؟ – وتكەن جىلى ءارتۇرلى جاستاعى سپورتشىلار اراسىندا 4 ەل ءبىرىن­شىلىگى وتكىزىلدى. ەرەسەكتەر اراسىندا باسقا مەملەكەتتەردەن كەلگەن سپورتشىلاردىڭ قاتىسۋىمەن 5 تۋرنير, جاستار جانە جاسوسىپىرىمدەر اراسىندا 6 جارىس, ونىڭ ىشىندە قاراعاندى قالاسىندا وتكىزىلگەن جاسوسپىرىمدەر اراسىنداعى ازيا اشىق كۋبوگىن اتاپ وتكەن ءجون. ارينە, ەڭ ۇلكەن جارىسىمىز استانادا وتكىزىلگەن گران-پري. وعان 40-قا جۋىق مەملەكەتتەن 300-گە تارتا سپورتشى قاتىستى. وسى تۋرنيردە ءبىزدىڭ دزيۋدوشىلار 2 التىن, 2 كۇمىس جانە 3 قولا مەدال يەگەرى اتاندى. جارىستىڭ ۇيىمداستىرىلۋ دارەجەسى حالىقارالىق دزيۋدو فەدەراتسياسى تاراپىنان جوعارى باعالاندى. – وڭىرلەردەگى سپورت مەكتەپ­تەرىنە فەدەراتسيا تاراپىنان قان­داي دا ءبىر كومەك كورسەتىلە مە؟ – دزيۋدو فەدەراتسياسى وبلىس­تارداعى سپورت مەكتەپتەرىنىڭ ماتەريالدىق-تەحنيكالىق بازالارىن نىعايتۋ جولىندا دا جۇمىس جاساۋدا. ەكى جىل ىشىندە دزيۋدو بولىمشەلەرى مەن ءتۇرلى مەكتەپتەرگە 13 كومپلەكت تاتامي مەن 178 كومپلەكت كيمونو بەرىلدى. – جاتتىقتىرۋشىلار مەن تورەشىلەردىڭ بىلىكتىلىگىن ارتتىرۋ ماقساتىندا قانداي جۇمىس جۇرگىزىلۋدە؟ – فەدەراتسيا سپورتشىلار مەن تورەشىلەردىڭ جانە باپكەرلەردىڭ بىلىكتىلىگىن ارتتىرۋ ءۇشىن ەرەكشە كوڭىل بولۋدە. حالىقارالىق سەمينارلار مەن بىلىكتىلىگىن ارتتىرۋ كۋرس­تارىندا 30-عا تارتا جات­تىقتىرۋشى مەن تورەشى وقىپ كەلدى. وڭىرلەردە وتاندىق جانە شەتەلدىك بىلىكتى مامانداردى تارتىپ, سەمينارلار وتكىزۋ ارقىلى كادرلاردى وقىتۋعا كوڭىل بولىنۋدە. وسى باعىتتا 2014 جىلى ەلىمىزدە 7 سەمينار وتكىزىلدى. ۇلتتىق قۇراما ساپىنداعى سپورت­شىلاردى وقىتۋعا ءجىتى كوڭىل بولىنۋدە. بارلىعى ءتۇرلى جوعارى جانە باسقا دا وقۋ ورىندارىندا وقيدى, بىرقاتارى ءبىلىم وشاقتارىن ءبىتىرىپ ۇلگەرگەن. – سپورتشىلارعا قانداي مەديتسينالىق كومەك كورسە­تىلۋدە؟ – فەدەراتسيا جۇمىسىنىڭ نەگىزگى باعىتتارىنىڭ ءبىرى – سپورت­شىلاردىڭ اۋرۋلارىنىڭ الدىن الۋ, ءتۇرلى جاراقاتتان كەيىن ولاردى ەلىمىزدىڭ جانە شەتەلدىك ەمحانالاردا ەمدەتۋ. كونفەدەراتسيانىڭ كومەگىنىڭ ارقاسىندا بيىل يسلام بوزباەۆ پەن ليم سەرگەي شەتەلدەن ساپالى مەديتسينالىق كومەك الىپ, بەيىمدەلۋ ۇستىندە. دوپينگكە قارسى ورتالىقپەن بىرلەسە تىيىم سالىنعان پرەپاراتتاردى قولدانباۋ جونىندە تۇسىندىرمە جۇمىستارى جۇرگىزىلۋدە. بىرنەشە كەلەڭسىز جاعدايدىڭ ورىن الۋىن, سپورتشىلار مەن باپكەر­لەردىڭ تىيىم سالىنعان پرەپاراتتار مەن سۋسىنداردىڭ جانە تاعامعا قوساتىن زاتتاردىڭ ءتىزىمىن تولىق بىلمەۋىنەن بولدى. – قازاقستاندا دزيۋدو كۇرەسىن جاستار اراسىندا ناسيحاتتاۋدا قانداي جۇمىستار جۇرگىزىلىپ جاتىر؟ – ەلىمىزدە دزيۋدونى ناسيحاتتاۋ باعىتىندا اۋقىمدى جۇمىس جاسالۋدا. فەدەراتسيانىڭ رەسمي سايتى جۇمىس ىستەۋدە. جاقىندا الەم بىرىنشىلىگىنىڭ سايتىن ىسكە قوستىق, وتكىزىلەتىن شارالاردىڭ بارلىعى اقپارات قۇرالدارىندا جاريالانىپ وتىرادى. فەدەراتسيانىڭ «قازسپورت» تەلەارناسىمەن تىعىز جۇمىسىن ەرەكشە اتاپ ءوتۋ كەرەك. وسى ارنادان جانكۇيەرلەرىمىز جا­رىستار مەن دزيۋدوشىلار تۋرالى ماتەريالداردى كورە الادى. – دزيۋدونى دامىتۋدا سپورت­تىق جەكپە-جەك جانە كۇش قولدا­نىلاتىن سپورت ءتۇر­لەرى كونفە­دەراتسياسىنىڭ ءرولى قانداي؟ – كونفەدەراتسيا قۇرىلعاننان بەرى ماتەريالدىق جانە قارجىلىق ماسەلەلەر تولىققاندى شەشىلدى. وقۋ-جاتتىعۋ وتكىزەتىن سپورتتىق بازالار سانى كوبەيىپ, ولاردى جاب­دىقتاۋ جاعى دا جوعارى دەڭگەيگە كوتەرىلدى. – بيىلعا قانداي نەگىزگى شارالار جوسپارلانىپ وتىر؟ – قازاقستان ءۇشىن حالىق­ارالىق دزيۋدو فەدەراتسياسىنىڭ استانا قالاسىندا دزيۋدو كۇرەسىنەن الەم بىرىنشىلىگىن وتكىزۋ قۇقىعى بەرىل­گەندىگىنىڭ ءوزى ما­ڭىزدى. بۇل دزيۋدونىڭ ەلىمىزدە ءارى قاراي نا­سيحات­تالۋىنا مۇمكىندىك بەرمەك. 2013 جىلدىڭ قىركۇيەگىندە حالىق­ارالىق دزيۋدو فەدەرا­تسيا­سىنىڭ پرەزيدەنتى ماريۋس ۆيزەر, قازاقستان دزيۋدو فەدەراتسيا­سىنىڭ پرەزيدەنتى كەڭەس راقىشەۆ جانە الماتى قالاسىنىڭ اكىمى احمەتجان ەسىموۆ دزيۋدو ورتالى­عىنىڭ قۇرى­لىسىنا ساتتىلىك تىلەپ, العاشقى كىرپىشىن قالاعان ەدى. ەندى وسى سپورت ورداسىنىڭ قۇرىلىسىن وسى جىلى اياقتاۋ جوسپارلانىپ وتىر. – اڭگىمەڭىزگە راحمەت. اڭگىمەلەسكەن داستان كەنجالين, «ەگەمەن قازاقستان».