ۇمىتىلماس ۇلتتىق بەينە

«قاراگوز» بالەتى سىنشىلار تاراپىنان جوعارى باعاعا يە بولۋدا بالەت ونەرى سىنشىلارى مەن ساراپشىلارى نازارىن اۋدارتىپ وتىرعان «قاراگوز» سپەكتاكلى «استانا وپەرا» تەاترىنىڭ نەگىزگى ساحناسىندا بيىل تۇڭعىش رەت قويىلعان ۇلتتىق تۋىندى بولىپ سانالادى. باس پارتيانى «استانا وپەرا» بالەتىنىڭ جەتەكشى ءسوليسى انەل رۇستەموۆا, باستى كەيىپكەرلەر – سىرىم مەن نارشانىڭ بەينەسىن تالانتتى ءبيشى-ارتىستەر ارمان ورازوۆ پەن قازاقستاننىڭ ەڭبەك سىڭىرگەن قايراتكەرى, «استانا وپەرا» بالەتىنىڭ جەتەكشى ءسوليسى تايىر گاتاۋوۆ سومداسا, قازاقستاننىڭ ەڭبەك سىڭىرگەن قايراتكەرى, «استانا وپەرا» تەاترىنىڭ جەتەكشى ءسوليسى گاۋھار ۋسينا قاراگوزدىڭ اجەسى ءمورجاننىڭ ءرولىن وينايدى. تۇساۋى جاقىندا عانا كەسىلگەن ۇلتتىق بالەت بۇقارالىق اقپارات قۇرالدارىندا, سونداي-اق بالەت سىنشىلارى اراسىندا ۇلكەن قىزىعۋشىلىق تۋعىزۋدا. پەداگوگيكا عىلىمدارىنىڭ دوكتورى, قازۇوۋ پروفەسسورى ايگۇل كۇلبەكوۆا ءوزى­نىڭ «كلاسسيكاعا – ەرەكشە قارىم-قاتىناس» اتتى ماقالاسىندا بالەت­تىك سپەكتاكل كوركەمدىك تۇر­عىدان كەلىستى بەزەندىرىلۋىمەن كورەر­مەندى تاڭ قالدىرعانىن ايتادى. «كوستيۋمدەر, تۇستەر, جارىق, دەكوراتسيالار – بارلىعى كورەرمەننىڭ قابىلداۋ قابىلەتىن ەسەلەي تۇسەتىنى ءسوزسىز. قويۋشى سۋرەتشىلەر – سوفيا تاسماعامبەتوۆا مەن پاۆەل دراگۋنوۆ حورەوگرافتىڭ يدەياسىن تولىعىمەن جۇزەگە اسىرعان دەۋگە نەگىز بار» دەيدى عالىم پرەمەرا تۋرالى ويلارىن ورتاعا سالىپ. ونەرتانۋ دوكتورى, پ.ي.چاي­كوۆسكي اتىنداعى ماسكەۋ كونسەرۆاتورياسىنىڭ پروفەسسورى ەلەنا دولينسكايا, ءار كەيىپكەرگە وزىنە ءتان قيمىل-ارەكەت تۇرلەرى بەكىتىلگەن حورەوگرافيا ءتىلى الدىن-الا ۇلەستىرىلگەنىن تىلگە تيەك ەتەدى. ول: «قاراگوز پلاستيكاسىنىڭ جۇمساقتىعى اسىرەسە اداجيو, بالەت­تىڭ ليريكالىق شارىقتاۋ شەگىندە ايرىقشا كورىنىس تابادى. نارشا – قاراگوز – سىرىم ماحاببات ۇشتىگىندە ەكى كەيىپكەردىڭ دە جەكە حورەوگرافيالىق بوياۋى قانىق شىققان دەسەك, قاراگوزدى قاتتى جاقسى كورەتىن اجەسى ءمورجان مىنەزى كۇردەلى, الايدا اتا-بابا زاڭدارىن بەرىك ۇستانعان كەيىپكەر رەتىندە ايرىقشا كوزگە تۇسەدى» دەپ جازدى ءوز پىكىرىندە. ەسكە سالا كەتەيىك, كومپوزيتور عازيزا جۇبانوۆا بالەتتى مۇحتار اۋەزوۆتىڭ «قاراگوز» دراماسىنىڭ جەلىسى بويىنشا 1987 جىلى جازعان بولاتىن. بالەتتىڭ تۇساۋكەسەرى «استانا وپەرادا» 2014 جىلى 5 جەلتوقساندا 2 بولىممەن جانە 9 كورىنىسپەن, سونداي-اق رەكۆيەمدەگىدەي پرولوگىمەن جانە ەپيلوگىمەن ءوتتى. مۋزىكالىق رەداكتسيانى «استانا وپەرا» تەاترىنىڭ مۋزىكالىق جەتەكشىسى, قازاق­ستاننىڭ ەڭبەك سىڭىرگەن قايراتكەرى ابزال مۇحيتدينوۆ جانە بالەتتى قويعان ۆاكيل ۋسمانوۆ (الماتى حورەوگرافيالىق ۋچيليششەسىنىڭ تۇلەگى, ۇزاق جىلدار بويى ماسكەۋدە جۇمىس ىستەپ, 1988 جىلى ءوزىنىڭ ماسكەۋلىك ۆ.ۋسمانوۆ حورەوگرافيا تەاترىن قۇرعان) جاساعانى كوپشىلىكتى بەيجاي قالدىرمايدى. قوس شەبەردىڭ يدەياسى ۇلتتىق جوبانىڭ ءساتتى تۇيىندەلۋىنە قىزمەت ەتۋىنىڭ ارقاسىندا قاراگوزدىڭ كلاسسيكالىق ۇلگىدەگى تاعى ءبىر ۇمىتىلماس بەينەسى دۇنيەگە كەلدى دەپ سەنىمدى تۇردە ويىمىزدى شەگەلەي الامىز. سالتانات اسكەربەكقىزى. سۋرەتتە: «قاراگوز» بالەتىنەن كورىنىس.