بىلتىر الەۋمەتتىك جوبالار دەنساۋلىق ساقتاۋ, حالىقتىڭ ءالسىز توبىن قولداۋ, ءبىلىم بەرۋ, وڭىرلەردى دامىتۋ, مادەنيەت جانە سپورت سالالارى بويىنشا 13 ايماقتا, سونىڭ ىشىندە «سامۇرىق-قازىنا» كومپانيالارى ورنالاسقان جەرلەردە جۇزەگە استى. «Samruk-Kazyna Trust» اقپاراتىنا سايكەس 7,2 ملرد تەڭگەگە 46 قايىرىمدىلىق جوباسى ىسكە اسىرىلىپ, جىل باسىنان بەرى 16,5 ملرد تەڭگەگە 10 جوبا قارجىلاندىرىلعان. ەلىمىز بويىنشا 524 مىڭ ادام, ونىڭ ىشىندە 81 مىڭ اۋىل تۇرعىنى كومەك الىپ, 400-گە تارتا ازامات جۇمىسپەن قامتىلدى. 10 وڭالتۋ ورتالىعى اشىلىپ, 11 سپورت كەشەنى, 26 امبەباپ سپورت-ويىن الاڭدارى سالىندى. «سالاماتتى قازاقستان» دەنساۋلىق پويىزىندا 90 مىڭعا جۋىق اۋىل تۇرعىندارىنا 1 ميلليونعا تارتا تەگىن مەديتسينالىق جانە قۇقىقتىق كومەك كورسەتىلدى. سونىمەن قاتار مۇمكىندىگى شەكتەۋلى بالالار ءۇشىن 23 قالا مەن ەلدى مەكەندە تەگىن ينكليۋزيۆتى جانە بەيىمدەلگەن سپورت سەكتسيالارىنىڭ جەلىسى جۇمىس ىستەپ جاتىر. الماتى جانە شىعىس قازاقستان وبلىسىندا 400-گە جۋىق ەرەكشە بالاعا جازعى جانە كۇزگى ينكليۋزيۆتى لاگەر ۇيىمداستىرىلدى. جاڭاوزەندىك 227 اۋىل بالاسىنا ءبىلىم گرانتى بەرىلىپ, تۇرمىسى تومەن وتباسىنان شىققان 15 مىڭ بالا وقۋ قۇرالىمەن قامتاماسىز ەتىلدى. اقتوبە وبلىسىندا العاش رەت ساعي جيەنباەۆ اتىنداعى وبلىستىق جاسوسپىرىمدەر كىتاپحاناسى جاڭعىرتۋدان ءوتىپ, كرەاتيۆ ورتالىعى رەتىندە قۇرىلدى. بۇعان دەيىن ىسكە قوسىلعان 37 وڭالتۋ ورتالىعىنان بولەك, الداعى ۋاقىتتا ءاۋتيزمى بار بالالارعا 7 ورتالىق, 5 ەرتە ارالاسۋ ورتالىعى, اقمولا, اتىراۋ, قاراعاندى, ماڭعىستاۋ, تۇركىستان وبلىستارىندا جىل سايىن 50 مىڭ ادامنىڭ سپورتپەن اينالىسۋىنا مۇمكىندىك بەرەتىن 6 ينكليۋزيۆتى سپورت كەشەنى جۇمىس ىستەيدى.
بيىل ءبىرىنشى توقساندا قورعا ءتۇرلى ۇكىمەتتىك ەمەس ۇيىم تاراپىنان جوبالاردى جۇزەگە اسىرۋعا قاتىستى 100 ءوتىنىم كەلىپ تۇسكەن. بۇل وتكەن جىلدىڭ وسى ۋاقىتىمەن سالىستىرعاندا 30 پايىزعا كوپ. ساراپتاۋدان ءوتىپ, پىسىقتالعان 26 جوبا قامقورشىلىق كەڭەسكە شىعارىلىپ, ونىڭ ىشىندە قۇنى 1,3 ملرد تەڭگەنى قۇرايتىن قوعامداعى الەۋمەتتىك ماڭىزدى ماسەلەلەردى شەشۋگە ارنالعان 8 جۇيەلى جوبا قولداۋ تاپتى. ولاردىڭ قاتارىندا الماتى قالاسىندا داۋن سيندرومى بار بالالارعا, اتىراۋ وبلىسى ميالى اۋدانىندا مۇمكىندىگى شەكتەۋلى جاندارعا ارنالعان وڭالتۋ ورتالىقتارىن سالۋ كوزدەلگەن. سونداي-اق پاۆلودار وبلىسىنىڭ سولنەچنىي كەنتىندە دەنەشىنىقتىرۋ-ساۋىقتىرۋ كەشەنىنە قايتا جوندەۋ جۇمىستارى جۇرگىزىلىپ, مۇمكىندىگى شەكتەۋلى جاندار مەن جاستاردىڭ الەۋمەتتىك ءالسىز توپتارىن تسيفرلىق داعدىلارعا وقىتاتىن ارنايى جوبا ىسكە قوسىلادى.
وڭالتۋ قىزمەتىن دامىتۋمەن بىرگە مۇمكىندىگى شەكتەۋلى ازاماتتاردى جۇمىسپەن قامتۋ ماسەلەسىنە دە كوڭىل ءبولىنىپ وتىر. بيىل «سامۇرىق-قازىنا» توبىنداعى كومپانيالارعا 114 ەرەكشە قاجەتتىلىگى بار ازامات جۇمىسقا تۇردى. قوردىڭ QSamruk.kz بوس ورىندار پلاتفورماسىندا مۇمكىندىگى شەكتەۋلى ازاماتتار ءۇشىن ارنايى ءبولىم اشىلىپ, سۇرانىسقا يە جۇمىس ورىندارى ۇسىنىلا باستادى. ەندى «Samruk-Kazyna Trust» قورى ارقىلى مۇنداي 180 ازاماتتى AI, No Code ازىرلەۋشى, UI/UX+Web مامانى سياقتى تسيفرلىق ماماندىقتارعا وقىتۋ جوباسى باستالىپ, قاتىسۋشىلاردىڭ جۇمىسقا ورنالاسۋىنا كومەك كورسەتىلەدى.
«قور وڭىرلەردە كوپتەگەن وڭالتۋ ورتالىعىن اشىپ, ەرەكشە قاجەتتىلىگى بار جانداردى قولداۋعا باعىتتالعان جوبالاردى ىسكە اسىرىپ كەلەدى. ءبىز وڭالتۋدان وتكەن ەرەكشە بالالاردىڭ بولاشاعىن ەسكەرىپ, ولاردىڭ ءارى قاراي الەۋمەتتەنۋىنە, ەڭبەكپەن قامتىلۋىنا نازار اۋدارۋىمىز كەرەك. وسى باعىتتا سۇرانىستاعى كاسىپتەرگە وقىتۋ مەن جۇمىسقا ورنالاستىرۋ باستاماسىن قولعا الىپ وتىرمىز», دەيدى «سامۇرىق-قازىنا» قورىنىڭ كورپوراتيۆتىك باسقارۋ, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ.
بىرنەشە جىلدان بەرى بالالاردىڭ كوپتەن كۇتەتىن سۇيىكتى جوباسىنا اينالعان «تۋعان ەلگە ساياحات» تۋريستىك پويىزىمەن بيىل 400 بالا قامتىلماق. ولار 12 كۇن ىشىندە استانا, بۋراباي, الماتى, تاراز, تۇركىستان, بايقوڭىر سىندى قالالاردىڭ تاريحىمەن تانىسىپ, تانىمال ورىنداردى ارالايدى.
«بۇل جولى جوباعا سۋ تاسقىنىنان زارداپ شەككەن وڭىرلەردەگى الەۋمەتتىك ءالسىز وتباسىلاردىڭ جانە قوردىڭ ەنشىلەس كاسىپورىن قىزمەتكەرلەرىنىڭ بالالارى قاتىستىرىلادى. جالپى, «سامۇرىق-قازىنا» كومپانيالارى توبىنىڭ اتىنان تابيعي اپات سالدارىمەن كۇرەسكە 15 ملرد تەڭگە باعىتتالادى. سونىمەن قاتار قور كاسىپورىندارى تاراپىنان زارداپ شەككەن وڭىرلەردى قولداۋعا قوسىمشا شارالار قولعا الىنىپ جاتىر», دەدى «Samruk-Kazyna Trust» قورىنىڭ باس ديرەكتورى الفيا اديەۆا.
الەۋمەتتىك سالانى ودان ءارى دامىتۋ مەن قايىرىمدىلىق جوبالارىمەن كوپشىلىكتى قامتۋ ماقساتىندا قور جىل باسىنان بەرى بەلدى بيزنەس وكىلدەرىمەن سەرىكتەستىكتى نىعايتىپ, ءىرى كاسىپورىندارمەن جانە قوعامدىق ۇيىمدارمەن ىنتىماقتاستىق ورناتقان. قازىرگى ۋاقىتتا «شەلل قازاقستان», «وڭتۇستىك تاۋ-كەن-حيميا كومپانياسى», «قازاقمىس» كاسىپورىندارىمەن, سونداي-اق «قازاقستان حالقىنا» قورىمەن ينكليۋزيا, سپورت, حالىقتىڭ الەۋمەتتىك وسال توپتارىن قولداۋعا باعىتتالعان بىرقاتار جوبانى ىسكە اسىرۋ جوسپارلانىپ وتىر.
