فوتو: astanatv.kz
«بىرنەشە كۇن بۇرىن جايىق وزەنىنەن مول سۋ كەلىپ, ماحامبەت اۋىلىنا قاۋىپ توندىرگەن ەدى. سوعان بايلانىستى, ماحامبەت پەن سارىتوعاي اۋىلدارى اراسىنداعى جول جابىلىپ, ارنايى تەحنيكالارمەن جىرىلدى. جولدىڭ ۇزىندىعى – 5 شاقىرىم. قازىر اتالعان جولدىڭ ەكى جاعىنا قورعانىس بوگەتى سالىنىپ, ۇستىنە ۇزىندىعى 12 مەترلىك بەتون پليتا قويىلدى. بۇل جولمەن جاياۋ جۇرگىنشىلەر مەن جەڭىل كولىكتەردىڭ وتۋىنە بولادى. سارىتوعاي اۋىلىنان شىعاتىن ورتاشا جانە اۋىر جۇك كولىكتەرى «سەيتەك» شايحاناسى جانىنداعى اينالما جولمەن جۇرەدى», دەدى ا.مۇحانعاليەۆ.
ونىڭ دەرەگىنە سۇيەنسەك, ماحامبەت اۋدانىندا جايىق وزەنىنىڭ جاعالاۋىنا ءار 300 مەتر سايىن 27 كەزەكشىلىك بەكەتى قويىلدى. كەزەكشىلىككە توتەنشە جاعدايلار سالاسىنىڭ ماماندارى مەن ساربازدار, مەملەكەتتىك قىزمەتكەرلەر مەن جەرگىلىكتى تۇرعىندار تارتىلدى. ولار اۋداندىق جەدەل شتابقا ساعات سايىن جايىق وزەنىندەگى احۋال تۋرالى باياندايدى.
كەشە اتىراۋ-ورال تاسجولىنان وسى اۋدانداعى تالدىكول اۋىلىنا باراتىن جولدى تاسقىن سۋ باستى. بۇل اۋىلدا قالعان تۇرعىندار ءالى دە بار.
«جولدى سۋ باسۋىنا بايلانىستى اۋىل تۇرعىندارىنىڭ اتىراۋ قالاسىمەن قاتىناسىن ۇزبەۋ ءۇشىن توتەنشە جاعدايلار دەپارتامەنتىنىڭ ماماندارى قايىقپەن تاسىمالداۋ قىزمەتىن ۇيىمداستىردى. تالدىكول اۋىلىنا سۋ باسۋ قاۋپى ءتونىپ تۇرعان جوق. اۋىلداعى بوگەتتى قوسىمشا بەكىتۋ جۇمىسى ءۇزىلىسسىز جۇرگىزىلىپ جاتىر. قازىر بۇل اۋىلدا قاۋىپسىزدىكتى قامتاماسىز ەتۋگە قورعانىس مينيسترلىگىنىڭ اسكەري بولىمىنەن 59 سارباز, توتەنشە جاعدايلار مينيسترلىگىنىڭ قۇرىلىمىنان 17 قىزمەتكەر مەن ارنايى تەحنيكالار جۇمىلدىرىلدى», دەپ حابارلادى وبلىستىق جەدەل شتاب.
بىرنەشە كۇن بۇرىن تالدىكول اۋىلىنان 217 تۇرعىن اتىراۋ قالاسىنداعى ەۆاكۋاتسيا پۋنكتىنە كوشىرىلگەن ەدى. ال 422 ادام ءوز قالاۋىمەن تۋىستارىنىڭ ۇيىنە ورنالاسقان.
سونداي-اق اتىراۋ قالاسىنا يندەربور كەنتىنەن قاتىنايتىن جول جابىلدى. وبلىستىق جەدەل شتابتىڭ اقپاراتىنا قاراعاندا, جايىق وزەنىنىڭ سول جاعالاۋىنداعى بۇل جولدىڭ جابىلۋىنا تاسقىن سۋدىڭ مولدىعى سەبەپ بولىپ وتىر.
جايىق وزەنىنىڭ وڭ جاعالاۋىنداعى اتىراۋ-ورال تاسجولىنىڭ بىرنەشە بولىگى جابىق تۇر. ناقتىلاي ايتقاندا, ماحامبەت اۋدانىنىڭ اۋماعىنداعى سارايشىق اۋىلىنىڭ جانە 71-شاقىرىم تۇسىندا شەكتەۋ قويىلعان.
تاسقىن سۋ اتىراۋ قالاسىنىڭ ماڭىنداعى سوكولوك كانالىنىڭ بوگەتىن جارىپ كەتتى. بوگەتتىڭ بۇزىلۋىنا تاسقىن سۋدىڭ كوپتىگى مەن قاتتى جەل اسەر ەتكەن.
«سوكولوك كانالى – جايىق وزەنى ارقىلى اتىراۋ قالاسىنا قاراي اعىپ كەلەتىن مول سۋدى رەتتەۋدىڭ نەگىزگى تارماعى. قالانى تاسقىن سۋدان قورعاۋ ءۇشىن كانال بويىنداعى العاشقى بوگەتكە ەكىنشى قورعانىس نىسانى سالىندى. ەكىنشى قورعانىس بوگەتىنىڭ بەرىكتىگىن قامتاماسىز ەتۋ ماقساتىندا توپىراق تولتىرىلعان قاپپەن نىعايتۋ جۇمىسى جۇرگىزىلدى. كانال بويىنداعى بوگەتتىڭ بيىكتىگى بالتىق جۇيەسىنىڭ دەڭگەيىنە سايكەس ۇلعايتىلدى. بۇل ۋچاسكەدە تاۋلىك بويى كەزەكشىلىك ۇيىمداستىرىلىپ وتىر. كانالداعى بۇزىلعان بوگەتتى قالپىنا كەلتىرۋ ءۇشىن قوسىمشا تەحنيكالار جىبەرىلدى», دەپ حابارلادى وبلىستىق جەدەل شتابتان.
اتىراۋ وبلىسى
