بۇل كۇندەرى مارقاكول اۋدانىنىڭ بوران اۋىلىندا ورنالاسقان گيدروبەكەتتەگى سۋ دەڭگەيىنىڭ كورسەتكىشى بويىنشا قارا ەرتىس وزەنىنىڭ دەڭگەيى 543 سانتيمەتردى قۇراعان. بۇل قاۋىپتى دەڭگەيدەن 18 سانتيمەترگە جوعارى دەسەدى ماماندار.
قازىرگى تاڭدا شقو اكىمدىگى جانە تجد جاعدايدى باقىلاۋعا الىپ, شۇعىل شارالار قولدانىپ جاتىر. جاعدايدى باقىلاۋدا ۇستاۋ كەرەكتىگى جەرگىلىكتى جەردەگى اتقارۋشى بيلىككە, پوليتسيا جانە پروكۋراتۋرا ورگاندارىنا الدىن الا ەسكەرتىلدى.
ايتا كەتەيىك, اۋىلدىڭ تومەنگى تۇسىندا وتكەن جىلى ۇزىندىعى 400 مەتر, بيىكتىگى 675 سانتيمەتر بولاتىنداي بوگەت سالىنعان. ول بوگەتتىڭ بيىكتىگى قازىر قاۋىپتى دەڭگەيدەن 1,5 مەتر جوعارى بولعاندىقتان, ءالى دە 70 سانتيمەترگە جۋىق ارالىق بار.
قاۋىپتىڭ الدىن الۋ ءۇشىن قارا ەرتىس وزەنىنىڭ دەڭگەيى ءار 4 ساعات سايىن ولشەنىپ, تاۋلىك بويى باقىلاۋ ۇيىمداستىرىلدى. اۋدان اكىمى رۇستەمبەك كەمەشوۆتىڭ ايتۋىنشا, اۋىل ماڭىنداعى ۇزىندىعى 60 مەتر بولاتىن بوگەتتى كۇشەيتۋ جۇمىستارى جۇرگىزىلىپ جاتىر.
– قىتايدان قايتا-قايتا سۋ كوبەيتىپ جاتىر. وزەننىڭ جاعالاۋىنداعى بوگەندەردى كۇشەيتىپ جاتىرمىز. كەشەلى بەرى كانالداردىڭ بويىن كۇشەيتتىك. تارباعاتاي, زايسان, كۇرشىم, سامار, ۇلكەن نارىن اۋداندارىنان تەحنيكالار كومەككە كەلدى. 31 تەحنيكا, 80 ادام جۇمىس ىستەپ ءجۇر. وبلىستان 17 توننا ديزەل وتىنى جەتكىزىلدى. قاۋىپتىڭ الدىن الۋ ءۇشىن ۇلكەن جۇمىستار جۇرگىزىلىپ جاتىر, – دەيدى ر.كەمەشوۆ.
سونىمەن قاتار توتەنشە جاعدايلار قىزمەتكەرلەرى دە جۇمىلدى. سامار 1 000 قاپ, كۇرشىم 500 قاپ ينەرتتى ماتەريال جەتكىزىپ بەردى. ودان بولەك, كورشىلەس كۇرشىم اۋدانى 1 توننا جانار-جاعارمايمەن قامتىدى. جەرگىلىكتى بيلىك كومەككە كەلگەن ازاماتتاردى ورنالاستىرىپ, اس-سۋلارىن ازىرلەپ قويدى. توقەتەرى, جۇدىرىقتاي جۇمىلعان كۇش توپان سۋدىڭ اۋىلعا كىرمەۋى ءۇشىن كۇنى-ءتۇنى جانتالاسا ەڭبەكتەنىپ جاتىر.
توتەنشە جاعداي بولا قالسا, تۇرعىنداردى ۋاقىتشا ورنالاستىرۋ ورىندارى دا ازىرلەندى. ول تۋرالى اۋىلدىقتارعا ەسكەرتىلدى. قازىرگى تاڭدا جەرگىلىكتى باسشىلىق ءتيىستى ورگاندارعا ساعات سايىن ەسەپ بەرىپ وتىر.
شىعىس قازاقستان وبلىسى,
مارقاكول اۋدانى,
بوران اۋىلى
