ءىس-شاراعا استانا قالاسى اكىمدىگىنىڭ وكىلدەرى, قالالىق قحا مۇشەلەرى, اقساقالدار كەڭەسىنىڭ, «اسسامبلەيا جاستارى» رقب وكىلدەرى, عالىمدار, قورعانىس مينيسترلىگىنىڭ ساعادات نۇرماعامبەتوۆ اتىنداعى اسكەري كوللەدجىنىڭ كۋرسانتتارى قاتىستى. باسقوسۋدىڭ باستى ماقساتى – اتى اڭىزعا اينالعان تۇلعانىڭ اسكەري مۇراسىن زەردەلەۋ, اتا-بابالارىمىزدىڭ ەرلىگىن ۇلىقتاۋ مەن ناسيحاتتاۋ ارقىلى وسكەلەڭ ۇرپاقتىڭ بويىندا ۇلتتىق سانا-سەزىم مەن ءپاتريوتيزمدى قالىپتاستىرۋ.
«اتامنىڭ اماناتى» قوعامدىق بىرلەستىگى باسقارما توراعاسىنىڭ ورىنباسارى ابۋباكىر سمايىلوۆ اتاپ وتكەندەي, باتىردىڭ ەل بولاشاعى ءۇشىن جاساعان ەكى ەرلىگىنىڭ ءوزى ۇلكەن قۇرمەتكە لايىق. ءبىرىنشىسى – 19 جاسىندا مايدانعا اتتانىپ, 20 جاسىندا «التىن جۇلدىز» تابىس ەتىلىپ, كەڭەس وداعىنىڭ باتىرى اتانعان. ال 21 جاسىندا ونىڭ باتالونى گيتلەردىڭ رەيح كانتسەليارياسىنىڭ عيماراتىنا جاسالعان شابۋىلعا قاتىسقان. جەڭىستەن كەيىن باتالوننىڭ جەكە قۇرامى مەملەكەتتىك ماڭىزى بار ماڭىزدى نىسانداردى كۇزەتۋ مىندەتتەرىن ورىندادى. ەكىنشى رەت كەڭەس وداعىنىڭ باتىرى اتاعىنا ۇسىنىلعانىمەن, وكىنىشكە قاراي, ەڭبەگى ەلەنبەي كەتتى. ەكىنشىسى – تاۋەلسىزدىكتىڭ تاڭى اتقان تۇستا شينەلىن قايتا كيىپ, قازاقستاننىڭ قارۋلى كۇشتەرىن قۇرۋعا بەلسەنە اتسالىستى. ەردىڭ ءتول ارميامىزدى قۇرۋداعى ەڭبەگى ولشەۋسىز. «جاقىندا عانا باتىر اتامىزعا ارنالعان «تۋمىسى بولەك تۇلعا» دەگەن عىلىمي-تاجىريبەلىك كونفەرەنتسيا ءوتتى. سول جەردە ونىڭ ءاربىر تۇلعالىق قىرىنا جەكە-جەكە توقتالىپ, ۇلكەن باعا بەرىلدى. تاريحشىلار مەن عالىمداردىڭ ايتقان ءسوزى بولاشاقتا ۇلكەن جيناق بولىپ شىعادى. وزدەرىڭىز بىلەسىزدەر, ساعادات جاستايىنان جەتىم قالىپ, وزىنەن ۇلكەن اعاسى ساعيتتىڭ قولىندا تاربيەلەنگەن. ول كىسى ءبىرىنشى بولىپ سوعىسقا اتتانىپ,1941 جىلى قازا تاپقان. ساعادات نۇرماعامبەتوۆ اعاسىنىڭ جەرلەنگەن جەرىن ءومىر بويى ىزدەپ وتكەن. باتىردىڭ قىزى ايسۇلۋ اپامىز قوعامدىق ۇيىمعا ءوتىنىش بەردى. ءبىز قازىر باتىردىڭ ارمانىن جالعاستىرىپ, ىزدەستىرۋ جۇمىسىن باستادىق. ساعيت نۇرماعامبەتوۆتىڭ قايدا جەرلەنگەنىن تاۋىپ جاتساق, ساۋاپتى ءىس بولاتىن ەدى», دەيدى ءا.سمايىلوۆ.
ساعادات نۇرماعامبەتوۆ – باتىر عانا ەمەس, حالىقارالىق دەڭگەيدەگى تۇلعا. بۇلاي دەۋگە نەگىز كوپ. «ول – 2005 جىلى بۇۇ باس اسسامبلەياسىنىڭ بيىك مىنبەرىندە سويلەگەن الەمدەگى جالعىز مايدانگەر. سول مىنبەردە ول بەيبىتشىلىكتى ساقتاۋ, ۇلتارالىق كەلىسىم تۋرالى 6 مينۋتتىق بايانداما جاساعان. تاريحي بەينەباياندى بۇۇ-عا ارنايى حات جازىپ, ارحيۆتەن الدىردىق. ەندى الداعى ۋاقىتتا شىعاتىن جيناققا باتىردىڭ ونەگەلى ءسوزىن قالدىرساق دەيمىز. «تاسقا باسىلعان ءسوز ەشقاشان وشپەيدى» دەمەكشى, تۋمىسى بولەك تۇلعانىڭ ايتقان ۇلاعاتتى ءسوزىن قاعازعا جازىپ, كىتاپقا شىعارۋدى قولعا الىپ جاتىرمىز. ماقسات – وتكەن تاريح ارقىلى جاستاردىڭ بويىندا اسكەري-پاتريوتتىق تاربيەنى ءسىڭىرۋ. سەبەبى, وتكەنىن قادىرلەمەگەن ەلدىڭ بولاشاعى بولمايدى», دەپ تۇيىندەدى ءسوزىن ءا.سمايىلوۆ.
س.نۇرماعامبەتوۆ اتىنداعى اسكەري كوللەدجدىڭ ءۇشىنشى وقۋ ۆزۆودى, 1-كۋرس ۇلانى دانيال قۋانىشەۆ تە بولاشاقتا باتىر اتاسىنىڭ جولىن جالعاپ, قارۋلى كۇشتەر ساپىندا قىزمەت ەتۋدى ارمانداعانىن ايتتى. «قازاق ارمياسىنىڭ بەت-بەينەسى بولعان ارميا گەنەرالى ساعادات نۇرماعامبەتوۆتىڭ ءومىرى – حالقىنا قىزمەت ەتۋدىڭ وزىق ۇلگىسى. گەنەرالدىڭ تۇلا بويىندا ادامگەرشىلىك پەن پاتريوتتىق رۋحقا ءتان تۇتاس قاسيەت بار. سول ءۇشىن بالا كەزدەن ساعادات اتامىزداي باتىر, داڭقتى قولباسشى, وتان قورعاۋشى بولۋدى ارماندادىم», دەيدى ول.
گەنەرالدىڭ اسكەري ءومىر جولىن زامانداستارى اراسىندا تانىتۋعا تالپىنىپ جۇرگەن جاسۇلاندىقتىڭ تالابىنا سۇيسىندىك. بۇگىندە ول ارميا گەنەرالى تۋرالى تەست سۇراقتارىن دايىنداپ, اسكەري قىزمەتكەرلەرمەن سۇحبات قۇرىپ, مەكتەپ وقۋشىلارى اراسىندا ءتۇرلى ساۋالناما جۇرگىزگەن. باتىردىڭ ونەگەلى ءومىرى مەن ومىرشەڭ ىستەرىن ۇلگى تۇتىپ قانا قويماي, وسكەلەڭ ۇرپاققا جەتكىزۋدى باستى پارىزى سانايتىن جاس: «ساعاداتتاي ۇلى بار ەل باقىتتى. ونىڭ ەرلىگى مەن ادامگەرشىلىك قاسيەتى ءاربىر وفيتسەر مەن سەرجانتتىڭ عانا ەمەس, كەز كەلگەن ادامنىڭ بويىندا بولسا ءجون», دەيدى.
دوڭگەلەك ۇستەلگە قاتىسۋشىلار باتىر رۋحىن اسقاقتاتۋ 100 جىلدىقتىڭ اياسىندا عانا ەمەس, وسكەلەڭ ۇرپاق بويىنداعى جىگەردى وياتۋعا ءومىر بويى ازىق بولسا دەگەن تىلەگىن جەتكىزدى. بۇدان كەيىن جينالعاندار اسكەري كوللەدجدىڭ اۋماعىندا ورنالاسقان ساعادات نۇرماعامبەتوۆتىڭ ەسكەرتكىشىنە گۇل شوعىن قويدى.
