قازاق دارىگەرى «مەديتسينا مارشالى» اتاندى

دەنساۋلىق ساقتاۋ سالاسىنداعى جەتىستىكتەرى ءۇشىن ۇلتتىق عىلىمي مەديتسينالىق ورتالىعىنا فرانتسيانىڭ بەدەلدى ناگراداسى – ناپولەون وردەنى بەرىلسە, ال ونىڭ ديرەكتورى اباي بايگەنجين «مەديتسينا مارشالى» اتاعىنا لايىقتى دەپ تانىلدى. دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ءباسپاسوز قىزمەتى اتاپ كور­سەت­كەندەي, اتالمىش وردەن – ەكونوميكا, ءبىلىم جانە مەديتسينا سالالارىندا ەرەكشە ەڭ­بەگى­مەن كوزگە تۇسكەن ۇجىمدار مەن جەكەلەگەن تۇلعالارعا بەرىلەتىن, 1801 جىلى ناپولەون بوناپارتتىڭ دەكرەتى بويىنشا تاعايىندالعان ماراپات اتاۋى. ول  1886 جىلى گۋستاۆ ەي­فەلگە ء(وزى اتتاس مۇنارا قۇرىلىسى ءۇشىن), 1833 جىلى بەن فۋرنەيروعا (گيدراۆليكالىق تۋربينانى ويلاپ تاپقانى ءۇشىن), 1873 جىلى لۋي پاستەرگە ء(وزىنىڭ ەسىمىن يەلەنگەن فەرمەنتيزاتسيا ءۇردىسىن ويلاپ تاپقانى ءۇشىن) تابىس ەتىلگەن. بۇدان بولەك, وعان يە بولعانداردىڭ قاتارىندا «ميشلەن», «پەجو», «داسسو», «ماترا», «رەنو» سىندى الەمگە ايگىلى,  ۇلتتىق جانە حالىقارالىق دەڭگەيدە ىرگەلى جەتىستىكتەرگە جەتكەن كومپانيالاردىڭ باسشىلارى بار. «ۇلتتىق عىلىمي مەديتسينالىق ورتالىعى» اق-تىڭ (ۇعمو) باس ديرەكتورى ا.بايگەنجين: «عىلىم سالاسىنداعى كورنەكتى جەتىستىكتەر ءۇشىن 2012 جىلى ءبىزدىڭ ورتالىققا ناپولەون ەسىمىمەن اتالاتىن التىن مەدال بەرىلگەن-ءدى. مىنە, فرانتسيا مەملەكەتى تاعى دا ەڭبەگىمىزدى ەلەپ, ناپولەون وردەنىن ۇسىنىپ وتىر. مۇنداي سىيلىقتاردى بۇعان دەيىن شۆەيتساريا مەن ۇلىبريتانيادان العان ەدىك. بۇل – عىلىمى دامىعان ەلدەردىڭ ءبىزدى باعالاعانى, دالىرەگى, قازاقستاننىڭ مەديتسينا سالاسىنداعى جالپى جەتىستىگىن  مويىنداۋى», – دەيدى. تانىستىرا كەتەيىك, «مەديتسينا مارشالى» اتانعان اباي بايگەنجين – بۇكىل سانالى عۇمىرىن دەنساۋلىق ساقتاۋ سالاسىنا ارناعان بەلگىلى ازامات. ول 1970 جىلى الماتى مەملەكەتتىك مەديتسينالىق ينستيتۋتىن «ەمدەۋ ءىسى» ماماندىعى بويىنشا بىتىرگەننەن كەيىن, دەنساۋلىق ساقتاۋ جۇيەسىندە ءتۇرلى قىزمەتتەر اتقارعان. اتاپ ايتساق, ا. بايگەنجين ءار جىلداردا الماتى قالالىق جەدەل مەديتسينالىق كومەك كلينيكالىق اۋرۋحاناسى باس دارىگەرىنىڭ ورىنباسارى, «الاتاۋ» ءساناتوريىنىڭ باس دارىگەرى, الماتى ايماقتىق دياگنوستيكالىق ورتالىقتىڭ ديرەكتورى, مەملەكەتتىك اەروعارىش كومپانياسىنىڭ ۆيتسە-پرەزيدەنتى, قازاقستان رەسپۋبليكاسى ۇكىمەتى جانىنداعى مىندەتتى مەديتسينالىق ساقتاندىرۋ قورى باس ديرەكتورىنىڭ ورىنباسارى, استانا قالاسىنداعى رەسپۋبليكالىق كلينيكالىق اۋرۋحانانىڭ ديرەكتورى سىندى جاۋاپتى قىزمەتتەردى ابىرويمەن اتقاردى. 2004 جىلدان باستاپ قازىرگى ۋاقىتقا دەيىن «ۇلتتىق عىلىمي مەديتسينالىق ورتالىعى» اق-تىڭ (ۇعمو) باس ديرەكتورى. سونداي-اق, ول مەديتسينا عىلىمدارىنىڭ دوكتورى, پروفەسسور, «پاراسات» وردەنىنىڭ يەگەرى. جولدىباي بازار, «ەگەمەن قازاقستان».