استانا تورىنەن العاشقى ساپارىن باستاپ, ەلىمىزدىڭ بارلىق ايماعىندا ورنالاسقان اسكەري بولىمدەردى ارالاپ شىققان «جەڭىسكە قۇرمەت» مارافوندىق اكتسياسىنىڭ مارتەبەلى جالاۋى الماتى قالاسىنا جەتكىزىلگەن ەدى.
ۇلى جەڭىستىڭ 70 جىلدىعى مەن دوستاستىق ەلدەرىندەگى ارداگەرلەر جىلىنا وراي مەملەكەت باسشىسى, قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ باستاماسىمەن وتكەن جىلعى جەلتوقسان ايىنىڭ سوڭعى كۇنىندە استانا تورىنەن شىققان پاتريوتتىق مارافون استانا, قاراعاندى, سەمەي, تاراز, اقتاۋ سەكىلدى ءىرى قالالاردا بولىپ, ۇرپاقتار جالعاستىعى مەن ۇلى جەڭىس جولىندا جانىن قيعان قاھارمان ەرلەرگە دەگەن قۇرمەتتىڭ بەلگىسى رەتىندە ءوزىنىڭ بەيبىت ميسسياسىن جەتىسۋ جەرىندە اياقتادى.
28 پانفيلوۆشىلار ساياباعىندا ورنالاسقان ماڭگىلىك الاۋ مەموريالدىق كەشەنى الدىنا جيىلعان ۇلى وتان سوعىسى مەن اۋعان سوعىسىنىڭ ارداگەرلەرى, ءتۇرلى قوعامدىق ۇيىم وكىلدەرى مەن قالا تۇرعىندارى الدىندا قازاقستان رەسپۋبليكاسى قارۋلى كۇشتەرى اەروۇتقىر اسكەرى ءبولىمىنىڭ باسشىسى, گەنەرال-مايور داۋلەت وسپانوۆ ءسوز سويلەپ, ۇلى وتان سوعىسىنىڭ ارداگەرلەرىنە جاساعان ەرلىكتەرى مەن ەل قورعاۋ ىسىندەگى ادالدىعى ءۇشىن, بولاشاق ۇرپاقتىڭ تىنىشتىعى مەن تۇراقتى ءومىر سىيلاۋعا قوسقان ۇلەستەرى ءۇشىن العىس ايتىپ, ولارعا سىي-سياپات جاسادى.
«نۇر وتان» پارتياسى الماتى قالالىق فيليالى توراعاسىنىڭ ءبىرىنشى ورىنباسارى كەنجەحان ماتىجانوۆ قالا ارداگەرلەرىنىڭ قوعامدىق جۇمىستار مەن جاس ۇرپاقتى اسكەري-پاتريوتتىق رۋحتا ءتاربيەلەۋ ىسىنە دە اتسالىسىپ وتىرعان ەڭبەكتەرىن تىلگە تيەك ەتىپ, وتانعا دەگەن ادالدىعى مەن قالتقىسىز قىزمەتىنە ريزاشىلىعىن ءبىلدىردى.
– جەڭىس جولىندا جانىن دا, قانىن دا اياماعان اتا-اپالارىمىزدىڭ ەرلىك ىستەرى بۇگىنگى ۇرپاق – بىزدەر ءۇشىن ۇلكەن قۇرمەتكە لايىق كيەلى ءىس. جاس ۇرپاق ولاردىڭ ونەگەسىنەن وتاندى ءسۇيۋ, ەلگە ادال قىزمەت ەتۋ سەكىلدى كوپتەگەن قاسيەتتى ۇلگى ەتىپ الادى. اتا-اپالارىمىزدىڭ جاساعان ەرلىك ىستەرى مەن قول جەتكىزگەن جەڭىسى بۇگىنگى تىنىش ءومىر مەن وركەندەگەن قازاقستاننىڭ تۇراقتىلىعىنا نەگىز قالادى. بەرەكەلى ءومىر ءسۇرىپ وتىرعان مەرەكەلى ەلدىڭ پەرزەنتتەرى اتىنان سىزدەرگە العىسىمىزدى جەتكىزەمىز, – دەدى ك.ماتىجانوۆ سالتاناتتى شارادا سويلەگەن سوزىندە.
ءوز كەزەگىندە سوعىس ارداگەرلەرى قازاقستان قارۋلى كۇشتەرىنىڭ ساربازدارىنا باتالارىن بەرىپ, ەلىمىزدىڭ تىنىشتىعى مەن تۇراقتىلىعى, وتانىمىزدىڭ شەكاراسى مەن تۇتاستىعىن ساقتاۋدا ايانباي ەڭبەك ەتۋلەرىن اماناتتاپ, ەلباسى نۇرسۇلتان نازارباەۆتىڭ ارداگەرلەر مەن قاريالارعا جاساپ وتىرعان قامقورلىعىنا ريزاشىلىعىن ءبىلدىردى.
سالتاناتتى شارا بارىسىندا داڭق مەموريالى الدىنداعى ماڭگىلىك الاۋعا گۇل شوقتارى قويىلىپ, پاتريوتتىق مارافوننىڭ مارتەبەلى بەلگىسى – اسكەري جالاۋدى سالتاناتتى كۇزەت اسكەرلەرى قازاقستان رەسپۋبليكاسى قورعانىس مينيسترلىگىنىڭ وكىلىنە تابىستادى. اتالمىش جالاۋ استانا قالاسىندا ورنالاسقان ساعادات نۇرماعامبەتوۆ اتىنداعى «جاس ۇلان» رەسپۋبليكالىق اسكەري مەكتەبىنە ساقتاۋعا بەرىلىپ, الداعى ۋاقىتتا ارداگەرلەرگە كورسەتىلەر جوعارى قۇرمەتتىڭ بەلگىسى رەتىندە قاستەرلى تۇعىرعا قويىلاتىن بولادى.
قانات ەسكەندىر,
«ەگەمەن قازاقستان».
الماتى.
سۋرەتتى تۇسىرگەن
يۋري بەككەر.
