فوتو: ru.freepik.com
- قازاقتىڭ تانىمال كاسىپقوي بوكسشىسى باتىر جۇكەمباەۆ (23-1, 17 كو) كەزەكتى جەكپە-جەگىندە جەڭىسكە جەتتى. اقش-تىڭ پلانت-سيتي قالاسىندا وتكەن جارىستا ول ۋكراينالىق يۆان رەدكاچپەن (24-7-1, 19 كو) جۇدىرىقتاستى. بۇل باسەكە بەسىنشى راۋندتا تەحنيكالىق نوكاۋتپەن اياقتالدى. ءسويتىپ, باتىر وزىنە تيەسىلى ءبىرىنشى جارتىلاي ورتا سالماقتاعى WBA Continental North Americas نۇسقاسىنىڭ التىن بەلبەۋىن ساقتاپ قالدى.
- شايبالى حوككەيدەن قازاقستاننىڭ ۇلتتىق قۇراماسىنىڭ باس باپكەرى اۋىستى. بۇل كۇنگە دەيىن وسى قىزمەتتى اتقارىپ كەلگەن عالىم مامبەتاليەۆتىڭ ورنىنا دەۆيد نەميروۆسكي كەلدى. كەزىندە تومەنگى نوۆگورودتىڭ «تورپەدو», ءنوۆوسىبىردىڭ «سيبير» كلۋبتارىن جاتتىقتىرعان مامان ۇلتتىق كوماندامىزبەن قوسا, استانانىڭ «بارىسىن» دا باپتايدى.
- 4-26 مامىر ارالىعىندا الماتىداعى ۇستەل تەننيسى ورتالىعىندا ورتالىق ازيا ايماعى بويىنشا ىرىكتەۋ ءتۋرنيرى وتەدى. اتالعان جارىسقا يران, قىرعىزستان, تۇرىكمەنستان, وزبەكستان, قازاقستان قۇرامالارى قاتىسادى. بۇل باسەكەدە قازاق ەلى نامىسىن الان قۇرمانعاليەۆ, ابدۋللا ماماي, قادىرالى قابدىلۋاحيتوۆ, دانيان شي, سارۆينوز مىرقادىروۆا, جانەركە كوشكىمباەۆا, ءالبينا جاقسىلىقوۆا, اليسا تسۆيگۋن سىندى سپورتشىلار قورعايدى.
- ايگىلى Forbes جۋرنالى 2024 جىلدىڭ العاشقى ايلارىندا ەڭ كوپ تابىس تاپقان سپورتشىلاردىڭ رەيتينگىن جاريالادى. كوش باسىندا – كريشتيانۋ رونالدۋ. پورتۋگاليا فۋتبولشىسىنىڭ تابىسى – 260 ملن دوللار. سونداي-اق توپ-10-دىققا دجون رام – $218 ملن, ليونەل مەسسي – $135 ملن, لەبرون دجەيمس – $128,2 ملن, ياننيس ادەتوكۋنبو – $111 ملن, كيليان مباپپە – $110 ملن, نەيمار – $108 ملن, كاريم بەنزەما – $106 ملن, ستەفەن كارري – $102 ملن, لامار دجەكسون $100,5 ملن تابىسپەن ەندى.
- پەرۋ استاناسى ليمادا اۋىر اتلەتيكادان جاسوسپىرىمدەر اراسىنداعى الەم بىرىنشىلىگى باستالدى. بۇل جارىستا قازاقستاننىڭ تۋى استىندا مىنا زىلتەمىرشىلەر ونەر كورسەتىپ جاتىر: اقجول قۇرمانبەك (67 كگ), ءالي مەدەتباەۆ (73 كگ), نۇردوس سابىر (89 كگ), بەكبولات قالي (96 كگ), ديدار ابدوللا (102 كگ), ەدىل اسقاروۆ (+102 كگ), داريا بالابايۋك (59 كگ), ايانات جۇماعالي (76 كگ), ءسانيا ورمانباەۆا (81 كگ).
