فوتولار: م.تاجكۋرانوۆ.
«وزدەرىڭىزگە ءمالىم, « ۇلى دالا جورىعى» مارافون-بايگەcىن مەملەكەت باسشىسى نازارىندا ۇستاپ, ۇنەمى قولداۋ كورسەتىپ كەلەدى. كۇنى كەشە «AMANAT» پارتياسى فراكتسياسى دەپۋتاتتارى كوتەرگەن قازاق جىلقىلارى تۇقىمىن ساقتاۋ جانە مولايتۋ تۋرالى زاڭ جوباسى ءبىرىنشى وقىلىمدا ماقۇلداندى. وسى ارقىلى مەملەكەت اسىل تۇقىمدى جىلقىلارىمىزدى قورعاۋ ءۇشىن بار جاعدايدى جاسايتىن بولادى», دەدى «AMANAT» پارتياسىنىڭ اتقارۋشى حاتشىسى داۋلەت كارىبەك.
بەس كۇنگە سوزىلعان جارىستىڭ قورىتىندىسى بويىنشا مارە سىزىعىن ءبىرىنشى بولىپ جەتىسۋ وبلىسى كومانداسى كەسىپ ءوتتى, جالپى ۋاقىتى 32 ساعات 40 مينۋت 18 سەكۋندتى قۇرادى. ەكىنشى ورىن ماڭعىستاۋ وبلىسى شاباندوزدارىنا (33 ساعات 05 مين. 30 سەك.), ءۇشىنشى ورىن الماتى قالاسى كومانداسىنا (33 ساعات 31 مين. 08 سەك.) بۇيىردى. ءتورتىنشى ورىندى جامبىل وبلىسى قۇراماسى (34 ساعات 22 مين. 03 سەك.), بەسىنشى ورىندى استانا قالاسىنىڭ كومانداسى (37 ساعات 10 مين. 32 سەك) يەلەندى.
ءۇشىنشى ماۋسىمدا 500 شاقىرىمدى ەڭسەرىپ ۇزدىك اتانعان شاباندوزدار: جەتىسۋ وبلىسىنان ماۋلەتحان ەرالى (32 ساعات 24 مين. 42 سەك), قوستاناي وبلىسىنان مۇحامبەتوۆ ءاليحان (32 ساعات 32 مين. 08 سەك), سونداي-اق شىعىس قازاقستان وبلىسىنىڭ ەكى شاباندوزى – ءابىش ەترەكوۆ (34 ساعات 01 مين. 37 سەك) جانە دۋلات جۇماشوۆ (34 ساعات 53 مين. 37 سەك).
بيىل پاۆلودار – استانا باعىتىنداعى مارافون-بايگەگە بارلىعى 19 كوماندا قاتىسقانىمەن, ولاردىڭ 11-ءى عانا جارىس قاشىقتىعىن تولىق ءجۇرىپ ءوتتى.
«بۇگىندە « ۇلى دالا جورىعى» مارافون-بايگەسى ءدۇبىرلى دودا عانا ەمەس, سونىمەن قاتار كوشپەندىلەر مادەنيەتىن ىلگەرىلەتۋدىڭ بىرەگەي جوباسىنا اينالدى. قىركۇيەك ايىندا شاباندوزدارىمىزدى جاڭا جارىس كۇتىپ تۇر. ولار V دۇنيەجۇزىلىك كوشپەندىلەر ويىندارى قارساڭىندا حالىقارالىق مارافونعا قاتىسادى. بۇل – بۇكىل الەمگە شاباندوزدارىمىزدىڭ ەپتىلىگى مەن شەبەرلىگىن, سونداي-اق قازاق جىلقىلارىنىڭ توزىمدىلىگىن كورسەتۋدىڭ تاماشا مۇمكىندىگى», دەدى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.
العاشقى ءۇش جۇلدەگەر كوماندا 2-7 قىركۇيەك ارالىعىندا وتەتىن « ۇلى دالا جورىعى» كۇزگى حالىقارالىق مارافونىنا ليتسەنزيا الادى.
« ۇلى دالا جورىعىنىڭ» باس سەرىكتەسى – ۇلتتىق سپورت تۇرلەرى قاۋىمداستىعى. سونداي-اق جارىسقا «AMANAT» پارتياسى, پاۆلودار, اقمولا وبلىستارى اكىمدىكتەرى, تۋريزم جانە سپورت مينيسترلىگى قولداۋ كورسەتتى.
