12 مامىر كۇنى باستالعان III Elorda Cup ءتۋرنيرى 18 مامىردا مارەسىنە جەتتى. جارىس قورىتىندىسى بويىنشا 24 سالماقتا جەڭىمپازدار انىقتالىپ, سەگىز بوكسشى بىلتىرعى چەمپيوندىق اتاعىن قورعاپ قالدى.
تۋريزم جانە سپورت مينيسترلىگىنىڭ ءباسپاسوز قىزمەتى حابارلاعانداي, جارىسقا الىس-جاقىن ەلدەردەن كەلگەندەردىڭ اراسىندا 10 الەم چەمپيونى, 20-عا جۋىق پاريج وليمپياداسى جولداماسىنىڭ يەگەرلەرى جۇلدەگە تالاستى. التى كۇنگە جالعاسقان باسەكەدە 14 بوكسشىمىز التىن مەدال جەڭىپ, ەل بوكسشىلارى (ەرلەر جانە قىزدار) كوماندالىق ەسەپتە توپ جاردى.
– حالىقارالىق جارىسقا جەرلەستەرىمىز بىرنەشە قۇراممەن قاتىستى. پاريج وليمپياداسىندا ەل نامىسىن قورعايتىن بوكسشىلارىمىز تورتجىلدىقتىڭ ماڭىزدى دوداسى الدىنداعى سوڭعى دايىندىق جەكپە-جەكتەرىن وتكىزسە, جاس بوكسشىلارعا ۇلكەن تاجىريبە الاڭى, باپكەرلىك قۇرامعا وزدەرىن دالەلدەۋ ءۇشىن زور مۇمكىندىك بولدى. حالىقارالىق سايىستا توپ جارعان بىلعارى قولعاپ شەبەرلەرىن جارقىن جەڭىسىمەن قۇتتىقتايمىن, – دەدى تۋريزم جانە سپورت ءمينيسترى ەرمەك مارجىقپاەۆ.
ءدۇبىرلى دودادا 155 جەكپە-جەك وتكىزىلىپ, 13 ايقاس تەحنيكالىق نوكاۋتپەن اياقتالدى. ءتورت كەزدەسۋدە نوكاۋت تىركەلدى. سونداي كەرەمەت نوكاۋتتىڭ ءبىرىن 75 كيلوداعى تيمۋر نۇرسەيىتوۆ جاسادى. جەرلەسىمىز وزبەك بوكسشىسى ساردور شومۋرودوۆتى سۇلاتىپ, جارىستى ەرتە اياقتادى. ال جارتىلاي فينالدا بىلتىرعى الەم چەمپيوناتىنىڭ قولا جۇلدەگەرى الوحون ابدۋللاەۆتان باسىم ءتۇستى.
– بۇل دودانىڭ تانىمالدىلىعى ۋاقىت وتكەن سايىن ارتىپ جاتىر. وسى جولى دا قارسىلاستارىم وتە مىقتى. ءبىرىنشى جەكپە-جەگىمدە وزبەكستان سپورتشىسىن نوكاۋتقا جىبەرگەنىم الەۋمەتتىك جەلىدە كەڭ تارادى. جارتىلاي فينالدا بىلتىرعى الەم چەمپيوناتىنىڭ قولا جۇلدەگەرى الوحون ابدۋللاەۆتان ايلامدى اسىردىم. بۇعان دەيىن ناۋرىز ايىندا ازەربايجانداعى «جىبەك جولى» جارىسىندا العاشقى اينالىمدا وزبەك بوكسشىسىنا جول بەرىپ ەدىم. مىنە, ەندى سول كەتكەن ەسەنى قايتاردىم. فينالداعى قارسىلاسىم ارمات ارمان ۇلىمەن اقتاۋداعى تۋرنيردە ەسە جىبەرگەنمىن. وسى جولى رەۆانش بولدى, – دەدى ت.نۇرسەيىتوۆ.
اتالعان تۋرنيردە 11 جەكپە-جەكتە قارسىلاس رينگكە شىقپادى. ناتيجەسىندە, ساكەن بيبوسىنوۆ, كاريم سەركەباەۆ, ماحمۇد سابىرحان, قامشىبەك قوڭقاباەۆ فينالدا جۇدىرىقتاسپاي-اق چەمپيون اتاندى.
– ءبىزدىڭ باستى ماقساتىمىز – وليمپيادا. سوندىقتان قۇراماداعى بوكسشىلارىمىز جاراقات الىپ قالماۋ ءۇشىن فينالدا ونەر كورسەتپەدى. تەك نۇربەك ورالباي عانا فينالدا سىنعا ءتۇستى, جەڭىسكە جەتتى. جىگىتتەرگە كوڭىلىم تولادى. الداعى ۋاقىتتا قۇراما جاتتىعۋىندا كەمشىلىكتەرمەن جۇمىس ىستەپ, وليمپياداعا دايىن بولىپ بارامىز, – دەدى بوكستان قازاقستاننىڭ قۇراماسىنىڭ باس باپكەرى مىرزاعالي ايتجانوۆ.
ءبىر قىزىعى, وليمپيادا جولداماسىنىڭ يەگەرلەرى نۇربەك ورالباي, ايبەك ورالباي جاڭا سالماقتا ونەر كورسەتتى. نۇربەك 86 كگ سالماقتا چەمپيون اتانسا, ايبەك اسا اۋىر سالماقتا كۇمىس جۇلدەنى قاناعات تۇتتى.
بىلتىر وزبەكستان چەمپيوناتىن ءوز كوزىمىزبەن كورگەن ەدىك. سوندا 71 كگ سالماقتىڭ جارتىلاي فينالىندا قانداسىمىز امان قونىسبەكوۆ الەم چەمپيونى اسادحوجا مۋيدىنحوجاەۆتى قۋىپ ءجۇرىپ ساباسا دا, ءتىپتى, نوكداۋنعا جىبەرسە دە تورەشىلەر جەڭىستى اسادحوجاعا بەرگەن ەدى. سول جارىستان كەيىن امان بىزگە تورەشىلەردىڭ شەشىمىنە ريزا ەمەس ەكەنىن ايتىپ ەدى. ەندى, مىنە, اماندى Elorda Cup تۋرنيرىندە قايتا جولىقتىردىق. ول اتاجۇرتىنا ءبىرجولا كەلىپتى. بۇگىندە مىرزاعالي ايتجانوۆتىڭ شاكىرتى. امان تۋرنيردە ۇزدىك ۇشتىكتەن كورىندى.
ەرلەر:
قازاقستان – 9 التىن, 8 كۇمىس, 14 قولا
وزبەكستان – 1 التىن, 2 كۇمىس, 2 قولا
قىتاي – 1 التىن, 1 كۇمىس
ايەلدەر:
قازاقستان – 5 التىن, 5 كۇمىس, 11 قولا
قىتاي – 4 التىن, 1 قولا
ءۇندىستان – 2 التىن, 2 كۇمىس, 4 قولا
چەمپيون اتانعان جەرلەستەرىمىز
ەرلەر:
51 كگ. ساكەن بيبوسىنوۆ
54 كگ. كاريم سەركەباەۆ
57 كگ. ماحمۇد سابىرحان
60 كگ. تالعات سىرىمبەتوۆ
67 كگ. نۇربەك مۋرسال
75 كگ. تيمۋر نۇرسەيىتوۆ
86 كگ. نۇربەك ورالباي
92 كگ. ساعىندىق توعامباي
+92 كگ. قامشىبەك قوڭقاباەۆ
ايەلدەر:
57 كگ. كارينا يبراگيموۆا
60 كگ. ۆيكتوريا گرافەەۆا
63 كگ. ايدا ابىكەەۆا
70 كگ. مادينا نۇرىشەۆا
+81 كگ. ەلدانا تاليپوۆا
ەڭ ۇزدىك بوكسشىلار:
+92 كگ. قامشىبەك قوڭقاباەۆ
54 كگ. يۋان چانگ
