فوتو:t.me/sputnik_kyrgyzstan
قىرعىزستان دەنساۋلىق ساقتاۋ مينيسترلىگىنىڭ مالىمەتىنشە, شەتەلدىكتەرمەن بولعان جاپپاي توبەلەستىڭ سالدارىنان 41 زارداپ شەگۋشى مەديتسينالىق كومەككە جۇگىنگەن.
زارداپ شەككەن 11 ادام اۋرۋحانادا ەم قابىلداپ جاتىر. قالالىق جەدەل جاردەم اۋرۋحاناسىندا ەكى ناۋقاس جاتىر. بىرەۋى باس سۇيەگىنىڭ جابىق جاراقاتىن العان, ەكىنشىسىنىڭ جامباس سۇيەگى سىنعان. ناۋقاستاردىڭ جاعدايى تۇراقتى دەپ باعالاندى.
ءبىر زارداپ شەگۋشى ۇلتتىق اۋرۋحانانىڭ جاق-بەت حيرۋرگياسى بولىمىندە ەمدەلۋىن جالعاستىرىپ جاتىر. ونىڭ جاعدايى سالىستىرمالى تۇردە قاناعاتتانارلىق دەپ باعالاندى.
دەنساۋلىق ساقتاۋ مينيسترلىگى 19 مامىردا تاعى سەگىز شەتەلدىكتىڭ مەديتسينالىق كومەككە جۇگىنىپ, حالىقارالىق مەديتسينا ۋنيۆەرسيتەتىنىڭ كلينيكاسىنا جاتقىزىلعانىن اتاپ ءوتتى. ەكەۋىنىڭ مۇرنى سىنعان, قالعاندارىندا جابىق باس جاراقاتتارى, كوگەرگەن جانە سىدىرىلعان دەگەن دياگنوز قويىلعان. ولاردىڭ بارلىعى دارىگەرلەردىڭ باقىلاۋىندا, جاعدايى سالىستىرمالى تۇردە قاناعاتتانارلىق دەپ باعالانىپ وتىر. ولاردىڭ قال-جاعدايىن بىلۋگە قىرعىزستاننىڭ دەنساۋلىق ساقتاۋ ءمينيسترى الىمقادىر بەيشەناليەۆ باردى.
«پرەزيدەنت سادىر جاپاروۆتىڭ وكىمىمەن زارداپ شەككەندەردى ەمدەۋگە جانە قاجەتتى ءدارى-دارمەكپەن قامتاماسىز ەتۋگە جۇمسالاتىن بارلىق شىعىندار تەگىن بولادى», دەدى دەنساۋلىق ساقتاۋ ءمينيسترى الىمقادىر بەيشەناليەۆ.
ال, ءبىلىم جانە عىلىم ۆيتسە-ءمينيسترى راسۋل ابازبەك ۋلۋ قىرعىزستانداعى شەتەلدىك ستۋدەنتتەر ۋاقىتشا ونلاين وقىتۋعا كوشكەنىن ايتتى. ونىڭ ايتۋىنشا, ءبىر اپتادان بەرى قاشىقتان وقىتۋ تۋرالى بۇيرىق شىققان. مۇنداي شارالار ستۋدەنتتەردىڭ جاتاقحانادا جانە باسقا دا تۇرعىلىقتى جەرىندە تۇرۋ مۇمكىندىگىن قامتاماسىز ەتۋ ءۇشىن قولعا الىنعان.
ەستەرىڭىزگە سالا كەتەيىك, 18 مامىرعا قاراعان ءتۇنى بىشكەكتە جەرگىلىكتى تۇرعىندار مەن شەتەلدىك ستۋدەنتتەردىڭ اراسىندا قاقتىعىس بولعان. جاتاقحانالاردىڭ بىرىندە شەتەلدىكتەرمەن توبەلەس بولعانىن ەستىگەن بىرنەشە ءجۇز ادام توبەلەسپەك بولعان.
