الەمدىك دەڭگەيدەگى مادەني شارا شىعىس جانە تۇركى دۇنيەسى ءبىرتۋار تۇلعاسىنىڭ 300 جىلدىق تورقالى تويىنا ارنالعان. القالى عىلىمي جيىنعا قازاقستان اتىنان مادەنيەت جانە اقپارات ءمينيسترى ايدا بالاەۆا, سونداي-اق ءبىر توپ تانىمال عالىم قاتىسادى. ەكى ەل اراسىنداعى ءوزارا ارىپتەستىك اياسىندا وتەتىن شارالار قازاقستان-تۇرىكمەنستان باۋىرلاستىق قارىم-قاتىناسىنىڭ جاڭا كەزەڭىن ايقىنداماق. وزدەرىڭىزگە ءمالىم, تۇرىكمەنستان پرەزيدەنتى سەردار بەردىمۇحامەدوۆتىڭ ەلىمىزگە كەلگەن ارنايى ساپارى مەن قازاقستان پرەزيدەنتى قاسىم-جومارت توقاەۆتىڭ اشحاباتقا ارنايى ساپارىندا, سونداي-اق وسى شاھاردا وتكەن كاسپي سامميتىندە عاسىرلار بويى قالىپتاسقان دوستىق ءارى تاتۋ كورشىلىك قارىم-قاتىناستى ارتتىرۋعا قاتىستى ەلەۋلى ءىس-جوسپارلار بەلگىلەنگەن بولاتىن. سول باسقوسۋلاردا ەكىجاقتى ستراتەگيالىق ارىپتەستىكتى ودان ءارى نىعايتۋ, قازىرگى جاۋاپتى كەزەڭ مەن دامۋ ۇردىستەرى اياسىندا ورتالىق ازيادا جانە حالىقارالىق ارەنادا مەملەكەتارالىق ىنتىماقتاستىقتىڭ ناقتى باعدارلارىن ايقىنداۋ, قازاقستان-تۇرىكمەنستان ساياسي سۇحباتتاستىعىن, ساۋدا-ەكونوميكالىق سەرىكتەستىگىن كەشەندى ورىستەتۋ ەكى مەملەكەتتىڭ ۇزاقمەرزىمدى مۇددەسىنە نەگىزدەلەتىنى ايتىلعان ەدى. الەمدىك دەڭگەيدەگى تۇلعا ماقتىمق ۇلىنىڭ ءۇش عاسىرلىق مەرەيتويى – وسى بايلانىستىڭ مادەني-عىلىمي باعدارىن ايقىندايدى. شارا اياسىندا «قازاق گازەتتەرى» سەرىكتەستىگىنە كىرەتىن «Egemen Qazaqstan» گازەتى مەن «Türkmenistan» گازەتى, قوس ەلدىڭ بالالار باسىلىمى اراسىندا ىنتىماقتاستىق ماسەلەلەر, ورتاق اقپاراتتىق جوبالار تالقىلانباق.
