فوتو: freepik.com
مامىر-ماۋسىم ايلارى – جەردى شەگىرتكەگە قارسى وڭدەۋ ءۇشىن ەڭ قولايلى مەرزىم. ءدال وسى ۋاقىتتا شەگىرتكە جۇمىرتقالارى كوبەيەدى.
«بولجامىمىز بويىنشا شەگىرتكەگە قارسى ءىس-شارالار تەمپەراتۋرا +25-30 گرادۋسقا دەيىن كوتەرىلىپ, جەرناسىلدەردىڭ جاپپاي كوبەيەتىن ساتىندە, ەلدىڭ وڭتۇستىگى مەن باتىسىندا 20 مامىردان, سولتۇستىگى مەن شىعىسىندا جانە ورتالىعىندا 30 مامىردان باستاپ قولعا الىنادى. زيانكەستەرمەن كۇرەسۋ ءۇشىن 2,46 ملن گا اۋماقتى وڭدەۋگە ارنالعان پەستيتسيدتەر قورى ساتىپ الىندى. بارلىعى 2,5 ملن گا قاجەت. قازىردىڭ وزىندە 1,9 ملن گا اۋماقتى حيميالىق وڭدەۋ بويىنشا قىزمەتتەرگە شارت جاسالدى. قالعانى بويىنشا كونكۋرستىق راسىمدەر جالعاسىپ جاتىر. وڭدەۋ تەحنيكاسى ايماقتاردا ورنالاسقان, پەستيتسيدتەر قاجەت بولعان جاعدايدا ساقتاۋ قويمالارىنان جەتكىزىلەدى. ءتيىستى جۇمىستاردى باستاۋ ءۇشىن جەرناسىلدەردىڭ جاپپاي ءوسۋ جانە دامۋ كەزەڭىنىڭ باستالۋىن كۇتەمىز», دەدى اۋىل شارۋاشىلىعى ۆيتسە-ءمينيسترى ازات سۇلتانوۆ.
تۇركىستان وبلىسى 16 ساۋىردەن باستاپ ءبىرىنشى بولىپ اسا قاۋىپتى ماروككو شەگىرتكەسىنەن تازارتۋدى باستادى. وڭدەلەتىن جالپى اۋدانى – 272 مىڭ گا. بۇگىنگى تاڭدا جوسپارلانعان اۋماقتىڭ 88% وڭدەلدى. بۇل – 240,3 مىڭ گا القاپ. حيميالىق وڭدەۋ جەردەن (101 بىرلىك) جانە اۋەدەن (6 بىرلىك) ارنايى تەحنيكامەن جۇرگىزىلەدى. قولدانىلاتىن پرەپاراتتار, «پيلاركينگ ۆ.ك.» (14,3 مىڭ گا), «تيامەترين س.ك.» (189,8 مىڭ گا), «كارات سۋپەر ك.ە.» (18,2 مىڭ گا), «اتسەت 200 ر.ن» (18 مىڭ گا).
اۋىل شارۋاشىلىعى ءمينيسترى ايداربەك ساپاروۆ كەڭەستە بارلىق ءوڭىر مونيتورينگتىك ءىس-شارالار ءۇشىن تەحنيكانى بەلسەندى قولدانۋعا ءتيىس ەكەنىن اتاپ ءوتتى.
زيانكەستەرمەن كۇرەستە جەرناسىلدەردىڭ ورنالاسقان جەرىن ۋاقىتىندا ءارى ناقتى تاۋىپ, جويۋ – وتە ماڭىزدى. شەگىرتكەنىڭ بولجامدى تارالۋ اۋقىمىن (2,5 ملن گا) ەسكەرە وتىرىپ, مونيتورينگ ءداستۇرلى ادىستەردەن بولەك, درونداردىڭ كومەگىمەن دە جۇرگىزىلەدى. تاجىريبە كورسەتكەندەي, درونداردى قولدانۋ زيانكەستەردى باقىلاۋ شارالارىن 5-10 ەسە جىلدامداتادى. سوندىقتان اكىمدىكتەرگە مۇمكىندىگىنشە دەرناسىلدەردىڭ ورنالاسقان جەرىن انىقتاۋ ءۇشىن درونداردى پايدالانۋ ۇسىنىلادى.
شەكارا ماڭىنداعى شەگىرتكەگە قاتىستى جاعداي ۇنەمى قاداعالانىپ وتىرادى. شەكارالاس ەلدەردىڭ اۋىل شارۋاشىلىعى سالالارى اراسىندا مونيتورينگ جوسپارلارى جاسالدى. اتاپ ايتقاندا, وزبەكستاندىق جانە رەسەيلىك ماماندارمەن بىرلەسكەن زەرتتەۋلەر جۇرگىزىلىپ جاتىر.
«بۇل جۇمىستاردان كۇتەتىن جالعىز ناتيجەمىز – شەگىرتكەلەردىڭ تارالىپ كەتپەۋى. سوندىقتان ءبىر اپتا ىشىندە شەگىرتكەگە قارسى جەدەل جۇمىس ءۇشىن مەنىڭ باسشىلىعىممەن ۇكىمەتتە ورتالىق كوميسسيا جانە وبلىستاردا اكىم ورىنباسارلارى جەتەكشىلىك ەتەتىن وڭىرلىك كوميسسيالاردى قۇرامىز. ءبىز قالىپتاسقان تاسىلدەرگە سۇيەنبەي, اۋماقتاردى مۇقيات زەرتتەۋ جانە جەردى وڭدەۋ ءۇشىن بارلىق قاجەتتى رەسۋرستى, اسىرەسە ادام رەسۋرسىن قوسامىز. ەڭبەك بيرجاسىنان ادامداردى تارتىڭىزدار. ەرتەڭنەن باستاپ بارلىق اشم باسشىلارى قاجەتتى ءىس-شارالاردى باقىلاۋ ءۇشىن شەگىرتكەنىڭ تارالۋ قاۋپى جوعارى ايماقتارعا بارادى. شەگىرتكەنىڭ تارالۋ قاۋپى تولىعىمەن جويىلعانعا دەيىن ءار اپتا سايىن جەرگىلىكتى جاعدايدى باقىلاپ, بارلىق ءوڭىردى تىڭدايتىن بولامىن», دەدى ۆيتسە-پرەمەر.
