بيىل عاسىرلىق مەرەيتويىن اتاپ وتەتىن, جۋرناليستەر «سپورت باسىلىمدارى اراسىنداعى بۇۇ-نىڭ باس اسسامبلەياسى» دەپ اتاپ كەتكەن AIPS كونگرەسى جىل سايىن ءتۇرلى ەلدەردە روتاتسيالىق نەگىزدە وتكىزىلەدى.
1924 جىلى قۇرىلعان AIPS – سپورت تاقىرىبىنا ماماندانعان جۋرناليستەردىڭ حالىقارالىق كاسىبي ۇيىمى. قازىرگى ۋاقىتتا ونىڭ 100-دەن استام ەلدەن 8000-عا جۋىق مۇشەسى بار. وسى جولى 96 ەلدەن كەلگەن 230-دان استام دەلەگات سپورت باسىلىمدارى فورۋمىنا قاتىستى.
86-AIPS كونگرەسى اياسىندا قازاقستان دەلەگاتسياسى 2024 جىلعى 8-14 قىركۇيەك ارالىعىندا استانادا وتەتىن V دۇنيەجۇزىلىك كوشپەلىلەر ويىندارىن تانىستىردى.
دەلەگاتسيا دۇنيەجۇزىلىك كوشپەلىلەر ويىنداردىڭ باستى ميسسياسى – الەمدىك ەتنوسپورت قوزعالىسىن دامىتۋ, جاھاندانۋ داۋىرىندە تاريحي-مادەني مۇرانى جانە الەم حالىقتارىنىڭ الۋان تۇرلىلىگىن ساقتاۋ, ەتنوسپورت تۇرلەرىن, الەم حالىقتارىنىڭ ءداستۇرلى ويىندارى مەن سايىستارىن حالىقارالىق ارەنادا ناسيحاتتاۋ, دىنارالىق جانە مادەنيەتارالىق ديالوگتى, الەم حالىقتارى اراسىنداعى ءوزارا تۇسىنىستىك, دوستىق پەن كەلىسىمدى نىعايتۋ ەكەنىن ءتۇسىندىردى. قاتىسۋشىلارعا قازاقستان بيلىگىنىڭ بۇل ءىس-شاراعا ەرەكشە ءمان بەرەتىنى دە ايتىلدى. كونگرەسس قاتىسۋشىلار تانىستىرىلىمدى زور ىقىلاسپەن تىڭدادى.
حالىقارالىق سپورت باسىلىمدارى قاۋىمداستىعىنىڭ پرەزيدەنتى دجوۆانني مەرلونىڭ پىكىرىنشە, «استانادا دۇنيەجۇزىلىك كوشپەلىلەر ويىندارىن وتكىزۋ ۇلى دالانىڭ عاسىرلار بويعى بىرەگەي مادەنيەتىمەن تانىسۋعا قولايلى مۇمكىندىك بەرەدى. سۋ تاسقىنىنا قاراماستان, قازاقستان بيلىگىنىڭ كوشپەلىلەر ويىندارىن وتكىزۋدەن باس تارتپاعانى قۋانتادى. بۇل قازاقستاندا سپورتقا زور ءمان بەرىلەتىنىن ايعاقتايدى».
– ءبىز وزىندىك كرەاتيۆتى ءستيلى بار, الەۋەتى زور قازاقستانداعى سپورت جۋرناليستيكاسىن اسقان قىزىعۋشىلىقپەن باقىلاپ وتىرمىز. قازاقستان دەلەگاتسياسى AIPS فورۋمدارىنا بەلسەندى قاتىسىپ, ونىڭ بارىسىندا ءوز باستامالارىن تۇراقتى نەگىزدە ۇسىنىپ كەلەدى, – دەپ اتاپ ءوتتى حالىقارالىق سپورت باسىلىمدارى قاۋىمداستىعى ازيا بولىمشەسىنىڭ (AIPS ASIA) باس حاتشىسى امدجاد ماليك.
– فورۋمعا قاتىسۋشىلار الاپات سۋ تاسقىنىنا بايلانىستى ەلىمىزدىڭ بىرقاتار ماڭىزدى حالىقارالىق ءىس-شارادان باس تارتىپ, بيۋدجەت قاراجاتىن ۇنەمدەگەنىنە قاراماستان, قازاقستان ءالى دە دۇنيەجۇزىلىك كوشپەلىلەر ويىندارىن وتكىزۋگە دايىن ەكەنىن قۇپتادى, – دەدى حالىقارالىق سپورت باسىلىمدارى قاۋىمداستىعى ازيا بولىمشەسىنىڭ (AIPS ASIA) اتقارۋشى كوميتەتىنىڭ مۇشەسى ءىلياس وماروۆ.
سونداي-اق AIPS كونگرەسى اياسىندا جاڭا «Sport Plus Qazaqstan» تەلەارناسىنىڭ تۇساۋكەسەرى ءوتتى. سونىمەن قاتار قازاقستاندىق دەلەگاتسيا وكىلدەرى قاۋىمداستىقتىڭ 100 جىلدىعى شەڭبەرىندە تاجىريبە الماسۋ ماقساتىندا قازاقستاندا جاس تىلشىلەر ءۇشىن (AIPS Young reports) حالىقارالىق AIPS سەمينارىن ۇيىمداستىرۋعا دايىن ەكەنىن جەتكىزدى.
