فوتو: قر تجم
ءمينيستردىڭ ايتۋىنشا, جايىق بويىنداعى 84 ەلدى مەكەندى سۋ باسۋ قاۋپى سەيىلدى.
«جايىقتىڭ قاتەرلى تولقىنى باتىس قازاقستان وڭىرىنەن ءوتىپ, اتىراۋ وبلىسىنا جىلجىدى. دەسە دە جايىق بويىنداعى 84 ەلدى مەكەندى سۋ باسۋ قاۋپى جوق. الدىن الۋ شارالارىنا دەر كەزىندە كىرىستىك دەپ ايتسام ارتىق ەتپەس. بۇگىنگى كۇنگە دەيىن قانشاما شاقىرىم بوگەت سالىنعانىن وزدەرىڭىز دە كوردىڭىزدەر. بۇكىل ەل بولىپ جۇمىلىپ, ارنايى تەحنيكا, كۇش قۇرىلىمدارى كەلىپ جاتىر. ەرىكتىلەر مەن احۋالعا بەيجاي قارامايتىن ازاماتتار دا قارعىن سۋمەن كۇرەسكە اتسالىستى», دەدى شىڭعىس ءارىنوۆ.
وسى تۇستا مينيستر وسىناۋ قيىن ساتتە قالىس قالماي, زارداپ شەككەندەرگە قول ۇشىن سوزعان بارشا ازاماتقا العىس ايتتى.
«وسى ءساتتى پايدالانىپ, قۇتقارۋشىلارعا, قارۋلى كۇشتەردىڭ, ىشكى ىستەر مينيسترلىگىنىڭ, ۇلتتىق قاۋىپسىزدىك كوميتەتىنىڭ, مەملەكەتتىك كۇزەت قىزمەتىنىڭ وكىلدەرىنە, بارلىق كۇشتىك قۇرىلىمداردىڭ ساربازدارىنا ريزاشىلىعىمدى بىلدىرەمىن. سونداي-اق قاجەتتى جابدىقتار مەن ارنايى تەحنيكالاردى تاسىمالداۋعا اتسالىسقان قتج ۇلتتىق كومپانياسىنىڭ وكىلدەرىنە, تاسقىنمەن كۇرەسكە اتسالىسقان ادامدارعا العىسىم شەكسىز», دەدى مينيستر.
