ەلىمىزدە سۋ تاسقىنى باستالعالى بەرى قازاقستان حالقى اسسامبلەياسى ادەتتەگىدەي بەلسەندى ءارى ۇيلەسىمدى جۇمىس ىستەپ, رەسپۋبليكالىق جانە ايماقتىق شتابتارى قۇرىلدى. ولار قايىرىمدىلىق جانە گۋمانيتارلىق كومەك جيناۋعا جۇمىلدى. سونداي-اق جۇرتتى قاۋىپسىز جەرگە كوشىرۋگە اتسالىستى. تابيعي اپات كەزىندە ەل بىرلىگى نىعايا ءتۇسىپ, حالقىمىزدىڭ ىنتىماعى مەن جوعارى ازاماتتىق جاۋاپكەرشىلىگى وسى كەزدە ايقىن كورىندى.
مەملەكەت باسشىسى سويلەگەن سوزىندە اپات بولعان وڭىرلەردە ەشكىم ەلەۋسىز قالمايتىنى, مەملەكەت شىعىندى تۇگەل وتەيتىنى, تاسقىننىڭ زاردابىن جويۋ ءۇشىن بيۋدجەت شىعىستارى قىسقارتىلاتىنى جانە مەملەكەت قارجىسىن قاتاڭ ۇنەمدەۋ رەجىمى ەنگىزىلەتىنى جونىندە ايتتى.
«جول سالىنادى, سۋ تارتىلادى. اۋىلدارىمىز مۇلدە جاڭا كەلبەتكە يە بولادى. جالپى, الەمدەگى ۇلكەن داعدارىستاردىڭ قارقىندى دامۋعا جول اشاتىنى بەلگىلى. سىن ساعاتتا جۇدىرىقتاي جۇمىلعان جۇرتىمىز وسى قالپىندا ورلەۋ, جاڭعىرۋ كەزەڭىنە قادام باسادى», دەدى ق.توقاەۆ.
سونىمەن قاتار مەملەكەت باسشىسى قازاقستان حالقى اسسامبلەياسىنىڭ مۇشەلەرىن قوعامدىق كەسەلدەرگە قارسى جۇمىس ىستەۋگە شاقىردى. ءار ادامنىڭ وي-ساناسى جانە مىنەز-قۇلقى جاقسارسا, تۇتاس قوعام جاقساراتىنىن جانە ماقسات-مۇراتى بيىك بولسا, ەلدىڭ رۋحى دا بيىك بولاتىنىن ايتتى. پرەزيدەنت ايتقانداي, ەلىمىزدىڭ مىزعىماس بىرلىگىن نىعايتىپ, جاسامپازدىق يگى ىستەردى ىنتالاندىرۋعا, مەملەكەتتىڭ ەكونوميكالىق جانە الەۋمەتتىك ورلەۋىنە ءبارىمىز ءبىر ادامداي اتسالىسايىق.
سۇلتانبەك ماكەجانوۆ,
سەنات دەپۋتاتى
