قارۋلى كۇشتەردىڭ بۇل اسكەر ءتۇرى باتىس ستراتەگيالىق باعىتىندا قول سۇعىلماۋشىلىقتى, ەلىمىزدىڭ اۋماقتىق تۇتاستىعىن قورعاۋعا ارنالعان. كاسپي تەڭىزىنىڭ قازاقستاندىق سەكتورىنداعى مەملەكەتتىڭ اۋماقتىق تۇتاستىعىن كوزدىڭ قاراشىعىنداي قورعاۋ, ەل ەگەمەندىگى مەن ەكونوميكالىق مۇددەلەرىن ساقتاۋ سىندى اۋقىمدى مىندەتتەردى ورىندايدى. تەڭىزدە ءجۇزۋدىڭ ناۆيگاتسيالىق-گيدروگرافيالىق قاۋىپسىزدىگىن قامتاماسىز ەتەدى, توتەنشە جاعدايلار مينيسترلىگىنىڭ قىزمەتتەرىمەن بىرگە ىزدەستىرۋ-قۇتقارۋ جۇمىستارىن جۇرگىزەدى, مەملەكەتتىك ورگاندارعا تابيعاتتى قورعاۋ جانە باقىلاۋ فۋنكتسيالارىن جۇزەگە اسىرۋ كەزىندە كومەك كورسەتەدى.
قازىرگى كەزەڭدە اسكەري-تەڭىز كۇشتەرىنە جاعالاۋداعى بايلانىس, تەڭىز جاياۋ اسكەرلەرى, ارنايى ماقساتتاعى جانە قامتاماسىز ەتۋ بولىمشەلەرى كىرەدى. اسكەري كەمەلەر زاماناۋي قارۋ-جاراقپەن جاساقتالعان.
بيىل «بىرلەستىك-2024» وقۋ-جاتتىعۋىن وتكىزۋ جوسپارلانعان. جاتتىعۋ بارىسىندا تەڭىزدەگى كورىنىستەر, دەسانت ءتۇسىرۋ, بىرلەسكەن ارتيللەريالىق اتىستار مەن جاۋىنگەرلىك جاتتىعۋلار پىسىقتالادى. اسكەري-تەڭىز كۇشتەرىنىڭ قۇرامىندا وتاندىق جانە شەتەلدىك سوڭعى ۇلگىدەگى كەمەلەر بار. ەلدىڭ قورعانىس-ونەركاسىپتىك كەشەنى بۇل اسكەردى زاماناۋي تەحنيكامەن قامتاماسىز ەتەدى.
بىلتىردان بەرى اۋە قورعانىسى كۇشتەرىنىڭ اسكەري ينستيتۋتىندا اسكەري تەڭىزشىلەردى «اسكەري ىستەگى تەڭىز تەحنيكاسى جانە تەحنولوگيالار» ماماندىعى بويىنشا دايارلاۋ جۇزەگە اسىرىلىپ كەلەدى. تەڭىز ماماندىعىنىڭ نەگىزدەرىن بولاشاق شتۋرماندار مەن مەحانيكتەر اقتوبە اسكەري وقۋ ورنىنداعى اسكەري-تەڭىز پاندەرى كافەدراسىندا, ال بەيىندىك پاندەردى ءۇشىنشى-بەسىنشى كۋرستاردا – اقتاۋ قالاسىنىڭ ش.ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىنىڭ بازاسىندا مەڭگەرەدى. اسكەري تەڭىزشىلەردى اقتاۋ قالاسى اسكەري-تەڭىز كۇشتەرىنىڭ وقۋ-جاتتىعۋ ورتالىعىندا دا وقىتادى, وندا جاس بۋىن كەمە قىزمەتىنىڭ ۇيىمداستىرىلۋىمەن جانە ولاردىڭ قۇرىلىسىمەن تانىسادى.
اسكەري-تەڭىز كۇشتەرى وفيتسەرلەرىنىڭ بىلىكتىلىگىن ارتتىرۋ جانە وقىتۋ گەرمانيا, قىتاي, رەسەي, اقش, تۇركيا جانە وڭتۇستىك كورەيانىڭ جەتەكشى اسكەري وقۋ ورىندارىندا ۇيىمداستىرىلادى.
كاسىبي شەبەرلىك, جانقيارلىق قىزمەت جانە رۋحتىڭ بەرىكتىگى – اسكەري تەڭىزشىلەردى ەرەكشەلەيتىن قاسيەتتەر. ولارعا ەلدىڭ بىرلىگىن, اۋماقتىڭ تۇتاستىعىن جانە ەكونوميكالىق مۇددەلەردى قورعاۋ جونىندە اسا جاۋاپتى مىندەتتەر جۇكتەلگەن. اسكەري تەڭىزشىلەر قۇرىلعان ۋاقىتتان بەرگى وتىز جىلدان استام ۋاقىت ىشىندە قارت كاسپيدىڭ اتىرابىندا ۇيىمداستىرىلعان بارلىق كەشەندى جاتتىعۋدا وزدەرىن بىلىكتى مامان رەتىندە تانىتتى, جۇكتەلگەن وقۋ-جاتتىعۋ, جاۋىنگەرلىك مىندەتتەردى ابىرويمەن ورىندادى. اسكەري-تەڭىز كۇشتەرى الداعى ۋاقىتتا دا كاسپي تەڭىزى سەكتورىندا ەگەمەن ەلىمىزدىڭ تىنىشتىعى مەن قاۋىپسىزدىگىن, تاۋەلسىزدىگى مەن ەل تۇتاستىعىن ساقتاۋ جولىندا قاپىسىز قىزمەت ەتە بەرەتىن بولادى.
