تاسقىن باستالعان العاشقى كۇننەن-اق اسسامبلەيا ستيحيالىق قۇبىلىستارمەن كۇرەستىڭ باسى-قاسىندا بەلسەندى قىزمەت اتقارىپ جاتىر. قايىرىمدىلىق جانە گۋمانيتارلىق كومەكتەردى جيناۋ, ەۆاكۋاتسيالاۋدى ۇيىمداستىرۋ جانە ازاماتتاردى حاباردار ەتۋمەن اينالىساتىن 43 مىڭ قازاقستاندىق ەرىكتىنىڭ 12 مىڭى – ەتنومادەني بىرلەستىكتەردىڭ مۇشەسى. «جۇرەكتەن – جۇرەككە» اكتسياسى اياسىندا وڭىرلەرگە 1 500 توننادان استام ازىق-ت ۇلىك پەن ەڭ قاجەتتى تاۋارلار جونەلتىلدى.
«اسسامبلەيا – كەيبىر ادامدار ايتىپ جۇرگەندەي, جاساندى ۇيىم ەمەس. اسسامبلەيا – ەل بىرلىگىن ءىس جۇزىندە ورنىقتىرا تۇسەتىن ءتيىمدى قۇرىلىم. بۇگىندە بۇل – كونستيتۋتسيالىق مارتەبەسى بار ماڭىزدى قوعامدىق ورگان», دەدى پرەزيدەنت. سونداي-اق بارشامىزدىڭ كۇش-جىگەرىمىزدى بىرىكتىرۋگە ءتيىس بىرقاتار مىندەتتى اتادى.
پرەزيدەنت بالالاردى ىرگەلى قۇندىلىقتار نەگىزىندە تاربيەلەۋگە باسا نازار اۋدارۋ قاجەت ەكەنىن اتاپ ءوتتى. «جاستارىمىز ءاردايىم العا ۇمتىلۋى قاجەت. ولاردىڭ دۇنيەتانىمى وتكەندى, بۇگىندى جانە بولاشاقتى ءبىرتۇتاس ۇلتىمىزدىڭ ەش بولىنبەيتىن ورتاق مۇراسى رەتىندە ەموتسياسىز, ساياسي استارسىز شىنايى قابىلداۋعا نەگىزدەلۋى وتە ماڭىزدى», دەدى مەملەكەت باسشىسى.
سونداي-اق ول وتانداستارىمىزدىڭ وزگەلەردىڭ تەرىس ىقپالىنا تۇسپەي, ءوز يدەولوگيامىزعا سۇيەنۋى كەرەكتىگىنە نازار اۋداردى. يدەولوگيانىڭ نەگىزى – ەل تاۋەلسىزدىگى.
بىرلىك مەملەكەتتىك ساياساتتىڭ نەگىزگى باعىتى جانە ۇلتتىق بىرەگەيلىكتى نىعايتۋدىڭ قۋاتتى فاكتورى بولىپ قالا بەرەدى. ال وتاننىڭ ورتاق ەكەنىن سەزىنۋ – جالپى ازاماتتىق سانانىڭ نەگىزى. باسىم باعىتتاردىڭ قاتارىندا قوعامدا ەتنوستىق ەرەكشەلىك نەگىزىندە وقشاۋلانۋدىڭ كەز كەلگەن تۇرىنە, ارانداتۋلارعا جانە ازاماتتاردى مادەني, تىلدىك, ەتنوستىق نەمەسە ءدىني بەلگىلەرى بويىنشا كەمسىتۋ ارەكەتتەرىنە توزبەۋ اتموسفەراسىن قالىپتاستىرۋ ماسەلەلەرى بار.
ءتىل ماسەلەسى وزەكتى بولىپ قالا بەرەدى. ء«بىز وسى اسا شەتىن ماسەلەگە كەلگەندە سىرتقى-ىشكى فاكتورلاردى ەسكەرە وتىرىپ, ستراتەگيالىق ۇستامدىلىق جانە تولەرانتتىق تانىتۋىمىز قاجەت», دەگەن مەملەكەت باسشىسىنىڭ پىكىرىمەن كەلىسەمىز.
پرەزيدەنتتىڭ الدىمىزعا قويىپ وتىرعان مىندەتتەرىن وتانداستارىمىز ورىنداي الادى دەپ سەنەمىن. بىرلىكتىڭ ارقاسىندا ءبىز ءادىل قازاقستاندى – مۇمكىندىكتەرى تەڭ قۋاتتى مەملەكەتتى قۇرا الامىز.
ايدا بالاەۆا,
مادەنيەت جانە اقپارات ءمينيسترى
