بالالارعا ارنالعان العاشقى كىتابىنان باستاپ ءومىر اتتى «سونارعا» «وشپەيتىن ىزدەر» باسىپ قالدىرعان ساكەن ءجۇنىسوۆتىڭ شىعارماشىلىعى – كول-كوسىر مۇرا. ءبىر شەتتە كوركەم شىعارمالارى اتالىپ جاتسا, ءبىر شەتتە پەسالارى قويىلىپ جاتادى. وسىعان ساي عىلىمي كەڭەسكە جينالعاندار جان-جاقتى تۇلعانىڭ ءار قىرىنا توقتالىپ, ءتۇرلى ەڭبەگىن تارقاتىپ ايتىپ, ەستەلىكتەرىمەن ءبولىستى. سان قىرلى ساناتكەردىڭ زامانىندا تەلەارنالارعا بەرگەن سۇحباتتارىنان ۇزىندىلەر كورسەتىلىپ, ادەبي كوركەم تۋىندىلارىنىڭ ەرەكشەلىكتەرى دە قوزعالماي قالمادى.
جازۋشىنىڭ 90 جىلدىعىنا ورايلاستىرىلعان بۇل ءبىرىنشى شارا ەمەس. بۇعان دەيىن استانا قالاسى اكىمدىگىنىڭ قولداۋىمەن «جاستار» تەاترىندا ساكەن ءجۇنىسوۆتى ەسكە الۋعا ارنالعان ادەبي-سازدى كەش وتكەنىن جيىندى جۇرگىزگەن قازاقستان جازۋشىلار وداعىنىڭ حاتشىسى, بۇل ۇيىمنىڭ استانا قالالىق فيليالىنىڭ ديرەكتورى داۋلەتكەرەي كاپ ۇلى اتاپ ءوتتى. «ساكەن ءجۇنىسوۆتىڭ قازاق ادەبيەتىنە سىڭىرگەن ەڭبەگى ۇشان-تەڭىز. ونىڭ ەلىمىزدىڭ ماڭىزدى كەزەڭدەرىن بەينەلەگەن سۇبەلى شىعارمالارى – قۇنىن جويمايتىن قۇندىلىقتاردىڭ ءبىرى, حالىق ءومىرىنىڭ كوركەم شەجىرەسى. ساكەن – تەك جازۋشى عانا ەمەس, وعان قوسا تانىمال قوعام قايراتكەرى. استانانىڭ ىرگەسىن قالاۋعا دا وزىندىك ۇلەس قوسقان تۇلعالاردىڭ ءبىرى», دەدى «قازاق گازەتتەرى» سەرىكتەستىگىنىڭ باس ديرەكتورى, اكادەميك ديحان قامزابەك ۇلى.
ادەبيەتتانۋشى عالىم, پروفەسسور سەرىك نەگيموۆ قالامگەردىڭ ءومىر جولىنان اڭگىمە قوزعادى. قازاق مەملەكەتتىك ۋنيۆەرسيتەتىن بىتىرەردە ساكەن اعا قازاق ءان ماتىندەرى جونىندە ديپلومدىق جۇمىس جازادى. ديپلوم جەتەكشىسى زەينوللا قابدولوۆ, ال وپپونەنتى مۇحتار اۋەزوۆ بولسا كەرەك. جۇمىس ەكەۋىنە قاتتى ۇناعان. جالپى, جاس تالانتقا ۇلى مۇحتاردىڭ ىقىلاسى تۇسكەنىن ەسكە الدى س.نەگيموۆ. «جاپانداعى جالعىز ءۇي» رومانى ءۇشىن قۋعىندالعانىن جانە قوستى.
جازۋشى-دراماتۋرگ التىنشاش جاعانوۆا, جازۋشى ءمادي ايىمبەتوۆ, جۋرناليست-جازۋشى جابال ەرعاليەۆ ساكەن ءجۇنىسوۆ تۋرالى ەستەلىكتەرىمەن ءبولىستى. جازۋشى-دراماتۋرگ, مەملەكەتتىك سىيلىقتىڭ لاۋرەاتى روزا مۇقانوۆا 60-جىلدار قازاق ادەبيەتىنىڭ التىن داۋىرىنە اينالعانىن ەسكە الىپ, بۇل ۋاقىتتا ادەبيەتكە كەلگەن قالامگەرلەردىڭ قارىم-قاتىناسىنا توقتالدى. بەلگىلى اقىن, ادەبيەتتانۋشى عالىم ەربولات بايات ۇلى قالامگەرلەردىڭ شەتەلدەگى قانداستاردى قولداۋىنا توقتالىپ, بۇل ماسەلەگە ساكەن ءجۇنىسوۆ سەرگەك قاراعانىن, سول ماقساتتا موڭعولياعا ارنايى بارعانىن ايتتى. جازۋشى-دراماتۋرگ جارىلقاپ بەيسەنباي ۇلى ساكەن ءجۇنىسوۆ مۇراسىن عىلىمي اينالىمعا اينالدىرۋ ماسەلەسىن قوزعادى.
ءسوز اراسىندا تولىمبەك ءابدىرايىم ۇلىنىڭ ايتۋىمەن ساكەن ءجۇنىسوۆتىڭ بۋرابايدا قۇرىلىسى بىتپەي قالعان ءۇيىنىڭ ماسەلەسى دە كوتەرىلدى. جازۋشى نەسىپ ءجۇنىسباي ۇلى «اقان سەرى» رومانىنىڭ ومىرشەڭدىگى مەن قۇندىلىعىن بەزبەندەپ, باسقا دا تۇلعالار ءبىرتۋار قالامگەردىڭ شىعارماشىلىعى مەن ەرەكشە قاسيەتتەرى تۋراسىندا سويلەدى. جيىن سوڭىندا جازۋشىنىڭ قارىنداسى روزا ءجۇنىسوۆا جينالعاندارعا العىس ايتتى.
