ەلىمىزدە «تازا قازاقستان» رەسپۋبليكالىق ەكولوگيالىق اكتسياسى ءوتىپ جاتىر. بەس اپتا كولەمىندە وتكىزىلەتىن ەكولوگيالىق اپتالىقتىڭ وزىندىك ءمانى مەن مازمۇنىن ايشىقتايتىن ارنايى تاقىرىپتار بەكىتىلگەن.
تيىسىنشە, ەكولوگيالىق اكتسيانىڭ ءۇشىنشى اپتاسى «جاسىل ايماق» تاقىرىبىنا باعىتتالدى.
وسىعان وراي, بۇگىن وڭىردەگى ءبىلىم سالاسىنىڭ قىزمەتكەرلەرى قالاداعى ب.شوكەنوۆ اتىنداعى ساياباقتا اعاشتاردىڭ دىڭگەگىن اكتەپ, سول اۋماقتى قوقىستان تازارتتى.
ودان بولەك, ءبىلىم سالاسىنىڭ قىزمەتكەرلەرى ەكولوگيالىق اكتسيادا ءتۇرلى ءىس-شارالاردى وتكىزىپ, ەرەكشە بەلسەندىلىك تانىتتى. اتاپ ايتقاندا, ساياباق اۋماعىندا «كاراوكە باتتل», «باۋىرساق party» ۇيىمداستىرىلىپ, ءتۇرلى بەينەدەگى انيماتورلار تۇرعىندارعا ونەر كورسەتتى.
اتالعان ەكواكتسياعا «Amanat» پارتياسى قىزىلوردا وبلىستىق فيليالىنىڭ قىزمەتكەرلەرى, ءبىلىم سالاسىنىڭ وكىلدەرى, ۇكىمەتتىك ەمەس ۇيىمداردىڭ وكىلدەرى قاتىسىپ, ءبىلىم سالاسىنىڭ قىزمەتكەرلەرىمەن بىرگە تازالىق جۇمىستارى مەن اعاش وتىرعىزۋ جۇمىستارىنا ۇلەس قوستى.
ايتا كەتەيىك, «جاسىل ايماق» ەكولوگيالىق اپتالىعى اياسىندا قالا جانە بارلىق اۋدانداردا اعاش كوشەتتەرى وتىرعىزىلىپ, تازالىق جۇمىستارى جۇرگىزىلىپ جاتىر.
