اتىراۋ وبلىستىق جەدەل شتاب جانىنداعى زەرتتەۋشى عالىمداردىڭ جۇمىس توبى سۋ تاسقىنى جاعدايىن باقىلاپ وتىر. اتالعان توپتىڭ مۇشەسى ارمان جۇماعازيەۆتىڭ ايتۋىنشا, جايىقپەن كەلەتىن مول سۋ مامىر ايىنىڭ باسىندا وزەن ارناسىن تاسىتۋى مۇمكىن.
«سۋ تاسقىنىنا بايلانىستى كوپ جىلعى دەرەكتەردى ساراپتاۋ, ەسكەرۋ كەرەك. وسى تۇرعىدان بۇرىنعى دەرەكتەرگە جۇگىنسەك, اتىراۋ وبلىسىنىڭ اۋماعىنا تاسقىن سۋدىڭ كوپ بولىگى ادەتتە مامىر ايىنىڭ ورتاسىندا كەلگەنىن بىلەمىز. بىراق وسى جىلى رەسەي فەدەراتسياسىنان مول سۋ كەلىپ, كوكتەمگى تاسقىننىڭ ەرتە باستالۋىنا سەبەپ بولىپ وتىر. باتىس قازاقستان وبلىسىنىڭ اۋماعىمەن تومەنگە قاراي اققان سۋ اتىراۋعا شامامەن 6-7 كۇندە كەلەدى. وسىنداي بولجامعا سۇيەنسەك, 2-3 مامىر كۇندەرى جايىق وزەنىنىڭ اتىراۋ وبلىسىنداعى ارناسى تولىپ كەتۋى مۇمكىن», دەيدى عالىم ارمان جۇماعازيەۆ.
وبلىستىق جەدەل شتابتىڭ اقپاراتىنا قاراعاندا, بۇگىن, 24 ساۋىردەگى تاڭەرتەڭگى ساعات 08:00-دە جايىق وزەنىنىڭ دەڭگەيى يندەربور كەنتىنىڭ تۇسىندا 597, ماحامبەت اۋىلىندا 715 سانتيمەترگە جەتكەن. ال اتىراۋ قالاسىنداعى گيدروبەكەتتە 422 سانتيمەترگە جەتتى.
«اتىراۋدا جايىق وزەنىنىڭ قاۋىپتى دەڭگەيى – 5 مەتر 50 سم. سۋ تاسقىنىنىڭ قاۋپىنە بايلانىستى 24 ساۋىرگە دەيىن اتىراۋ قالاسىنداعى جايىق وزەنىنىڭ جاعالاۋىنا 229,6 شاقىرىم بوگەت تۇرعىزىلدى», دەپ حابارلادى وبلىستىق جەدەل شتاب وكىلدەرى.
