فوتو: portkkm.ru
ەسكە سالايىق, ۇكىمەت 19 الەۋمەتتىك ماڭىزى بار تاۋارلاردىڭ ءتىزىمىن بەكىتكەنى ءمالىم. وندا ساۋدا قىزمەتىن رەتتەۋ تۋرالى زاڭمەن 15 پايىز ساۋدا ۇستەمەسى قاراستىرىلعان, ال اتالعان مولشەردەن اسىپ كەتۋ – زاڭنامانى بۇزۋ بولىپ سانالادى, ونداي جاعدايدا دەپارتامەنت ءتيىستى شارا قابىلدايدى.
«مىسالى, ۇستەمەنى ءتىپتى 30 پايىزدان اسىرعان كۇنباعىس مايىن ساتاتىن دۇكەنگە ايىپپۇل سالىندى», دەدى قوستاناي وبلىسى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى باسشىسىنىڭ ورىنباسارى ازامات سابىرجان.
سونىمەن قاتار اتالعان وبلىس دۇكەندەرىندە 15% جوعارى ۇستەمەمەن قانت, تاۋىق ەتى, جۇمىرتقا ونىمدەرىن ساتقان 21 كاسىپكەرگە ايىپپۇل سالىندى. بىلتىر اتالعان ۇستەمەنى اسىرا پايدالانعانى ءۇشىن جازاعا تارتىلعان 55 دۇكەننىڭ باسىم بولىگى قوستاناي, رۋدنىي قالالارىندا ورنالاسقان ەدى. سونداي-اق مامانداردىڭ ايتۋىنشا, بىلتىر بۇزۋشىلىقتاردىڭ كوبى ۇلكەن سۋپەرماركەتتەردە تىركەلسە, قازىرگى ۋاقىتتا بۇزۋشىلىقتار ءۇي ماڭى دۇكەندەرى اراسىندا كوبىرەك بايقالادى.
سونىمەن قاتار ەتيكەتكاداعى باعادان جوعارى باعاعا تاۋار ساتقان بيزنەس يەلەرىنە ايىپپۇل سالىندى.
«باعالار ادامدارعا كورىنۋى ءتيىس جانە سايكەسىنشە ادام تولەگەن كەزدە باعانىڭ چەكپەن بىردەيلىگىن سالىستىرۋ كەرەك. بيىل ءۇش جارىم اي ىشىندە دەپارتامەنت وسىنداي 24 اكىمشىلىك ءىس قوزعادى», دەدى ازامات سابىرجان.
اتالعان ايىپپۇلداردى سالۋعا تۇتىنۋشىلاردىڭ وتىنىشتەرى نەگىز بولعان ەكەن, ولار بۇل فاكتىلەردى فوتو جانە چەكتەر ارقىلى راستاعان. ساۋدا دەپارتامەنتى ەسكەرتكەندەي, ەگەر ساتىپ الۋشىلار بۇزۋشىلىقتاردى بايقاسا, ە-otinish پورتالى ارقىلى شاعىم جىبەرە الادى نەمەسە قوستاناي قالاسى, ءال-فارابي داڭعىلى, 115/1 مەكەنجايى بويىنشا جۇگىنە الادى.
