الدىمەن, مەكەمەگە قاراستى «قاجىمۇقان» سپورت كەشەنىندە بوكستان جانە دزيۋدودان شەبەرلىك ساباقتارى ءوتتى. وسى ويىنداردىڭ تۇلەكتەرى – بوكستان الەم جانە ازيا چەمپيونى مەرەي اقشالوۆ جانە دزيۋدودان ازيا چەمپيونى, الەم كۋبوگى يەگەرى, وليمپيادا ويىندارىنىڭ قاتىسۋشىسى ايبەك يماشەۆ بالالارمەن ءوز شەبەرلىكتەرىمەن ءبولىستى. ماستەر-كلاسستاردان كەيىن اۆتوگراف-سەسسيا ورىن الدى.
«پۋت ك وليمپۋ» ءبىلىم باعدارلاماسىنىڭ سالتاناتتى اشىلۋىندا «دەتي ازي» حالىقارالىق كوميتەتىنىڭ پرەزيدەنتى ۆلاديمير ماكسيموۆ جينالعان قاتىسۋشىلارعا ساتتىلىك تىلەپ پىكىر ءبىلدىردى.
قارىمتا ءسوز كەزەگىندە ق.مۇڭايتپاسوۆ وقۋ-سپورتتىق ورداسىنىڭ باسشىسى مەرەي اقشالوۆ ۇيىمداستىرۋشىلارعا العىس ايتىپ, سالت-داستۇرىمىزگە ساي, الىستان ات تەرلەتىپ كەلگەن مارتەبەلى قوناقتىڭ يىعىنا شاپان جاۋىپ, ارنايى قۇرمەت كورسەتتى.
سودان كەيىن, سپورتشىلار (14-16 جاسار) ءۇش توپقا ءبولىنىپ, ءبىلىم باعدارلاماسى بويىنشا دوپينگكە قارسى ءىس-ارەكەتتەر جولى, سپورتتىق پسيحولوگيانى دامىتۋ جولدارى جانە ويىنداردىڭ تاريحى تۋرالى ساباقتار مەن تەستتەرگە قاتىستى.
ءىس-شارا سوڭىندا, قاتىسۋشىلارعا وسى حالىقارالىق ۇيىمنىڭ سەرتيفيكاتى تاپسىرىلدى.
ساحا (ياكۋتيا) رەسپۋبليكاسىنىڭ قازاقستانداعى كۇندەرى بۇگىندە جالعاسىن تاۋىپ, باسقا دا ءىس-شارالار وتەدى.
