قر ۇلتتىق وليمپيادالىق كوميتەت اتاپ وتكەندەي, اكتسيا كەشە, 17 ساۋىردە باستالعان. ۇيىمداستىرۋشىلار بيلەت ساتىپ الىپ ۇلگەرمەگەن جانكۇيەرلەرگە سىيلىق جاساپ, وليمپيادانىڭ باستالۋىنا 100 كۇن قالۋىن اتاپ ءوتۋدى ءجون كورگەن.
وسىعان دەيىن بىرقاتار سپورت تۇرلەرىندە بيلەت ساتىلىمى توقتاتىلعان ەدى. الايدا وتكەن كۇننەن بەرى قاراي اكتسيا ارقىلى تۋريستەر مەن جانكۇيەرلەرگە وليمپيادالىق جارىستاردى كورۋگە سوڭعى مۇمكىندىك بەرىلىپ وتىر. ول ءۇشىن بارلىق سپورت تۇرلەرىنە, سونىڭ ىشىندە ورىندار تولىق ساتىلىپ كەتكەن جارىستارعا 250 مىڭ بيلەت ساتىلىمعا شىعارىلعان.
بيلەتتەردىڭ ەڭ تومەنگى باعاسى – 24 ەۋرو. ۇيىمداستىرۋشىلار مۇنداي بيلەتتەردىڭ 20 مىڭ داناسىن ۇسىنىپ وتىر. قالعاندارىنىڭ قۇنى سپورت تۇرىنە بايلانىستى بولادى جانە شامامەن 1000 ەۋروعا دەيىن بارادى.
ولاردى ءالى دە ينتەرنەت ارقىلى تەك رەسمي بيلەت پلاتفورماسىنان ساتىپ الۋعا بولادى. قوناقجايلىق پاكەتتەرى دە بار, وندا بيلەتتەرمەن بىرگە تۇرعىن ءۇي ۇسىنىلادى. جانكۇيەرلەر دەڭگەيىنە بايلانىستى كەز كەلگەن ورنالاساتىن جەردى تاڭداي الادى, ءارتۇرلى ەكسكۋرسيالار مەن ينتەراكتيۆتەرگە جازىلۋ مۇمكىندىگى دە بار.
مۇنداي پاكەتتەردى ساتىپ العاندار ءۇشىن Clubhouse24 قولجەتىمدى بولادى. بۇل – وليمپيادا وتەتىن ورىننىڭ ءارتۇرلى بولىگىندە ورنالاسقان 200 ارنايى الاڭ. جانكۇيەرلەرگە فرانتسيا تاعامدارىمەن تانىسۋ, سپورتشىلار مەن ارتىستەردىڭ ونەرىن تاماشالاۋ, جارىستاردى كورۋ جانە ت.ب. ۇسىنىلادى.
تۋريستەر پاريج تىنىسىمەن تانىسۋى ءۇشىن ساناتتار بويىنشا ارنايى پاكەتتەر جيناعى دايىندالعان: تاريح جانە مادەنيەت, تاماق پەن شاراپ, ءسان جانە ستيل, زاماناۋي پاريج, وتباسىلىق, بەلسەندى جانە ساۋىقتىرۋ دەمالىسى.
قوناقجايلىق پاكەتتەرىن On Location پلاتفورماسى ارقىلى ساتىپ الۋعا بولادى, ول ءۇش-بەس جۇلدىزدى رەيتينگى بار بىرقاتار قوناقۇيلەرمەن جانە توپتارمەن جۇمىس ىستەيدى. ونىڭ ىشىندە ويىنداردى ۇيىمداستىرۋ كوميتەتىنىڭ سەرىكتەسى Accor دا بار. ايتا كەتەرلىگى, جيىنتىققا اۋە بيلەتتەرىنىڭ قۇنى كىرمەيدى.
وليمپيادا جانە پاراليمپيادا ويىندارىنا بيلەتتەردىڭ جالپى سانى 13 ميلليوننان اسادى.
ەستەرىڭىزگە سالا كەتەيىك, 2024 جىلعى وليمپيادا ويىندارىندا سپورتتىڭ 32 سپورت تۇرىنەن 329 مەدال ءوز يەسىن تاباتىن بولادى. قازىرگە دەيىن قازاقستان سپورتشىلارى وليمپيادا ويىندارىنا 33 جولداما جەڭىپ الدى. تورتجىلدىق دودانىڭ الاۋى 26 شىلدە كۇنى تۇتانىپ, 11 تامىز كۇنى مارەسىنە جەتەدى.
