فوتو: ن.بايبۋلين
پالاتا توراعاسى زاڭ مەملەكەت باسشىسىنىڭ تاپسىرمالارىنا وراي, عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا بەلگىلەنگەن مىندەتتەردى ىسكە اسىرۋ ءۇشىن ازىرلەنگەنىن, سونداي-اق وعان پارلامەنت دەپۋتاتتارى باستاماشى بولعانىن اتاپ ءوتتى.
«اتالعان زاڭ عىلىمي-پەداگوگيكالىق جانە عىلىمي-زەرتتەۋ جۇمىستارىمەن اينالىساتىن مۇعالىمدەردىڭ نەگىزگى جالاقىسىنا قوسىمشا اقى بەلگىلەۋدى كوزدەيدى. سونداي-اق جەتەكشى عالىمدارعا عىلىمي جۇمىستاردى اياقتاۋ ءۇشىن اقىلى شىعارماشىلىق دەمالىس الۋ قۇقىعى قاراستىرىلدى. مەرزىمدى اسكەري قىزمەتتى وتكەرگەن ازاماتتارعا دا جوعارى وقۋ ورىندارىنا ءتۇسۋ كەزىندە جەڭىلدىكتەر بەرىلەدى. ماقۇلدانعان زاڭ وتاندىق عىلىمدى جانە ەلىمىزدىڭ ءبىلىم بەرۋ جۇيەسىن ودان ءارى دامىتۋعا وڭ سەپتىگىن تيگىزەدى دەپ سەنەمىز», دەدى ماۋلەن اشىمباەۆ.
سونىمەن قاتار پالاتا وتىرىسىندا سەناتورلار «قر-نىڭ ۇكىمەتى مەن تۇركيا رەسپۋبليكاسىنىڭ ۇكىمەتى اراسىنداعى حالىقارالىق قۇرامداستىرىلعان جۇك تاسىمالدارى تۋرالى كەلىسىمدى راتيفيكاتسيالاۋ تۋرالى» زاڭدى قاراپ, ماقۇلدادى. كەلىسىم كولىكتىڭ ءارتۇرلى تۇرلەرىن پايدالانا وتىرىپ, حالىقارالىق جۇك تاسىمالدارىن جەڭىلدەتۋگە, سونداي-اق قازاقستان – تۇركيا اراسىنداعى ترانزيتتىك-كولىكتىك الەۋەتتى جانە ساۋدا-ەكونوميكالىق قاتىناستاردى دامىتۋعا ارنالعان.
سونداي-اق سەنات دەپۋتاتتارى «قر-نىڭ كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكىنشى وقىلىمدا قارادى. دەپۋتاتتار باستاماشى بولعان قۇجات اتالعان سالا بويىنشا زاڭنامانى جەتىلدىرۋدى كوزدەيدى. ناقتى ايتقاندا, كامەلەتكە تولماعانداردىڭ جىنىستىق قول سۇعىلماۋشىلىعىنا قارسى قىلمىستارى ءۇشىن سوتتالعان شەتەلدىكتەردىڭ ەلىمىزگە كىرۋىنە جانە قازاقستان ازاماتتىعىن الۋىنا شەكتەۋ ەنگىزۋ قاراستىرىلعان. ودان بولەك, ەكسترەميستىك نەمەسە تەرروريستىك ارەكەتتەرگە قاتىسى بار شەتەلدىكتەردىڭ ەلگە كىرۋىنە تىيىم سالىنادى.
تالقىلاۋ كەزىندە سەناتورلار زاڭدى كونتسەپتۋالدى تۇرعىدا قولداپ, وعان بىرقاتار تۇزەتۋ ەنگىزۋدى ۇسىندى. وسىعان بايلانىستى سەنات دەپۋتاتتارى ۇسىنعان 11 تۇزەتۋمەن زاڭدى ماجىلىسكە قايتارۋ تۋرالى شەشىم قابىلداندى. سوعان سايكەس قىلمىستىق-اتقارۋ جۇيەسى مەكەمەلەرىندەگى بەينەباقىلاۋ جۇيەلەرىن جانە وزگە دە م ۇلىكتى قاساقانا جويعانى نەمەسە بۇلدىرگەنى ءۇشىن, سونداي-اق, ادام ءوزىنىڭ قىزمەتتىك بابىن پايدالانىپ قىلمىس جاساسا, قىلمىستىق جاۋاپتىلىق قاتاڭداتىلىپ, جازانىڭ بالامالى تۇرلەرى الىنىپ تاستالادى. بۇل نورما قىلمىستىق-اتقارۋ جۇيەسىنىڭ, تەرگەۋ يزولياتورلارىنىڭ جانە ۋاقىتشا ۇستاۋ يزولياتورلارىنىڭ قىزمەتكەرلەرىنە قاتىستى ەكەنىن اتاپ وتكەن ءجون.
ودان بولەك, ىشكى كوشىپ-قونۋدى ىنتالاندىرۋ ماقساتىندا قونىس اۋدارۋشىلارعا شارۋا نەمەسە فەرما قوجالىعىن جۇرگىزۋ ءۇشىن كونكۋرستان تىس تارتىپپەن بەس جىلعا دەيىنگى مەرزىمگە جەردى جالعا بەرۋ قاراستىرىلعان. زاڭ «قانداس» مارتەبەسىن بەرۋ ءراسىمىن جەتىلدىرۋدى دە كوزدەيدى.
سونداي-اق پالاتا وتىرىسىندا سەناتورلار ءالي بەكتاەۆ, اسەم راحمەتوۆا, عالياسقار سارىباەۆ, ءلاززات قالتاەۆا وزدەرىنىڭ دەپۋتاتتىق ساۋالدارىن جولدادى.
