«جول ءجۇرىسى تۋرالى» زاڭداعى وزگەرىستەر: كولىك جۇرگىزۋشىلەرى نەنى ءبىلۋى كەرەك؟

زاڭعا قانداي وزگەرىستەر ەنگىزىلدى؟

دەنساۋلىققا زيان كەلتىرمەيتىن جازاتايىم وقيعا ءۇشىن جۇرگىزۋشى كۋالىگىنەن ايىرماۋ ۇسىنىلدى.

موپەد جۇرگىزۋشىلەرى جول قوزعالىسىنىڭ تولىققاندى قاتىسۋشىلارىمەن تەڭەستىرىلەدى.

ءماجىلىس «جول ءجۇرىسى تۋرالى» زاڭعا جانە اكىمشىلىك قۇقىقبۇزۋشىلىق تۋرالى كودەكسكە جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن تسيفرلاندىرۋ ماسەلەلەرى بويىنشا زاڭنامالىق تۇزەتۋلەردى ءبىرىنشى وقىلىمدا ماقۇلدادى.

نەگىزگى زاڭ جوباسىندا شاعىن ەلەكترلى كولىكتەر مەن كولىكتەردىڭ جەكەلەگەن تۇرلەرىنىڭ قوزعالىسىن باقىلاۋ ۇسىنىلدى. بۇل موپەدتەردى پايدالانۋعا جانە قوزعالىس ەرەجەلەرىن رەتتەۋگە مۇمكىندىك بەرەدى. ولاردىڭ جۇرگىزۋشىلەرى اكىمشىلىك قۇقىقبۇزۋشىلىق تۋرالى كودەكستە كوزدەلگەن باپتارعا سايكەس تولىق جاۋاپكەرشىلىككە تارتىلادى. اتالعان نورما ماس كۇيدە موپەد تىزگىندەگەن جۇرگىزۋشىلەر سانىن, ولاردىڭ جول اپاتتارىنا ءتۇسۋى مەن جاراقات الۋىن ازايتۋعا باعىتتالعان. سونداي-اق اكىمشىلىك قۇقىقبۇزۋشىلىق تۋرالى كودەكسكە ەنگىزىلگەن وزگەرىستەر موپەد جۇرگىزۋشىلەرىن تولىق جول قوزعالىسىنا قاتىسۋشىلارعا تەڭەستىرۋدى كوزدەيدى.

موپەد جۇرگىزۋشىلەرىنەن تالاپ ەتىلەتىن شارتتار: 

• موپەدتەردى باسقارۋ ءۇشىن جۇرگىزۋشىلەر ۋاكىلەتتى ورگاندا مىندەتتى تىركەۋدەن وتەدى;
• «ا1» ساناتىنداعى جۇرگىزۋشى كۋالىگىن الادى;
• جىل سايىنعى تەحنيكالىق بايقاۋدان وتەدى;
• جۇرگىزۋشىلەر ازاماتتىق-قۇقىقتىق جاۋاپكەرشىلىكتى مىندەتتى ساقتاندىرۋ راسىمىنەن وتەدى.

بۇدان باسقا, جەرگىلىكتى اتقارۋشى ورگاندارعا ەلەكتروساموكاتتاردى پايدالانۋ ءتارتىبىن انىقتاۋ وكىلەتتىگىن بەرۋ قاراستىرىلىپ وتىر. بۇل اكىمدىكتەرگە ءار وڭىردەگى جول ينفراقۇرىلىمىن دامىتۋ شارتتارىنا قاراي قوزعالىس جىلدامدىعىن, رۇقسات ەتىلگەن ورىنداردى جانە ەلەكتروساموكاتتاردىڭ جۇمىس ءتارتىبىن انىقتاۋعا مۇمكىندىك بەرەدى.

جول ەرەجەسىن بۇزعاندار 7 جىلعا دەيىن قۇجات الا المايدى

زاڭ جوباسى قابىلدانعاننان كەيىن جۇرگىزۋشى كۋالىگى جوق جانە ونى الماي تۇرىپ كولىك قۇرالىن باسقارعان, سونداي-اق تىزگىن باسىندا الكوگول نەمەسە ەسىرتكى قولدانعان تۇلعالار جەتى جىلعا دەيىن ەمتيحان تاپسىرۋ مۇمكىندىگىنەن ايىرىلادى.

قازىر ولار اكىمشىلىك جازانى وتەپ, ەمتيحاندى وڭاي تاپسىرىپ ءجۇر, جۇرگىزۋشى كۋالىگىن دە الا الادى. وسىعان ۇقساس ايىپتار بويىنشا جاۋاپقا تارتىلعان جۇرگىزۋشىلەر 7 جىلعا كولىك جۇرگىزۋ قۇقىعىنان ايىرىلادى.

اۆتوجولداردا ورتاشا جانە ماكسيمالدى جىلدامدىق ەنگىزىلەدى

نەگىزگى زاڭ جوباسىنا كولىك قۇرالدارىنىڭ ورتاشا جانە ماكسيمالدى جىلدامدىعى ۇعىمدارى ەنگىزىلگەن.

بۇل تۇزەتۋلەر سەرتيفيكاتسيالانعان ارنايى باقىلاۋ-ولشەۋ قۇرالدارى مەن قۇرىلعىلارى ورناتىلاتىن جولدىڭ بارلىق ۋچاسكەسىندە جۇرگىزۋشىلەردىڭ جىلدامدىعىن تومەندەتۋگە, سونداي-اق جىلدامدىقتى شەكتەن اسىرىپ جىبەرۋگە بايلانىستى اپاتتار سانىن ازايتۋعا باعىتتالعان.

بۇل رەتتە «ورتاشا جىلدامدىق» كورسەتىلگەن قۇرىلعىلار مەن قۇرالدار ارقىلى جولداردىڭ ءتۇزۋ ۋچاسكەلەرىندە جانە اينالما جولدارى جوق قالا سىرتىندا اۆتوماتتى تۇردە ەسەپتەلەدى.

قازىرگى ۋاقىتتا اكىمشىلىك قۇقىق بۇزۋشىلىق تۋرالى كودەكسكە سايكەس ەرەجە بۇزۋشىلارعا بەلگىلەنگەن جىلدامدىقتى اسىرعانى ءۇشىن كەلەسى كولەمدە ايىپپۇل بەلگىلەنگەن:

• ساعاتىنا 10-نان 20 شاقىرىمعا دەيىن – 5 اەك (18 460 تەڭگە);
• ساعاتىنا 20-دان 40 شاقىرىمعا دەيىن – 10 اەك-كە (36 920 تەڭگە);
• ساعاتىنا 40 جانە ودان دا كوپ كيلومەتردە – 20 اەك (73 840 تەڭگە);
• جىل ىشىندە بەلگىلەنگەن مولشەردە جىلدامدىقتى قايتا اسىرعانى ۇشىن – 30 اەك-كە (110 760 تەڭگە).

ەندى اكىمشىلىك قۇقىقبۇزۋشىلىق تۋرالى كودەكسكە كولىك قۇرالدارىندا بەلگىلەنگەن جىلدامدىقتى 60 جانە ودان دا كوپ كم/ساعاتىنا اسىرعانى ءۇشىن 40 اەك كولەمىندە ايىپپۇل تۇرىندەگى قاتاڭ اكىمشىلىك جاۋاپكەرشىلىك ەنگىزۋ كوزدەلگەن.