فوتو: اقوردا
مەملەكەت باسشىسى قوستاناي وبلىسىنا جۇمىس ساپارى بارىسىندا سۋ تاسقىنى سالدارىن ەڭسەرۋگە جاردەمدەسكەن بيزنەس وكىلدەرىمەن جانە ەرىكتىلەرمەن جۇزدەستى. كەزدەسۋگە وڭىردەگى ماشينا جاساۋ, تاۋ-كەن, تاماق جانە اۋىل شارۋاشىلىعى ونەركاسىبى سالالارىنىڭ جەتەكشىلەرى, قازاقستان حالقى اسسامبلەياسىنىڭ جەرگىلىكتى وكىلدەرى, وبلىستىق جاستار رەسۋرستىق ورتالىعىنىڭ ەرىكتىلەرى جانە ستۋدەنتتەر قاتىستى. قاسىم-جومارت توقاەۆ شاعىن جانە ورتا بيزنەسكە قولداۋ كورسەتۋ باستى مىندەت ەكەنىن اتاپ ءوتتى.
«وسى كەزدەسۋگە ءبىراز مەتسەنات قاتىسىپ وتىر. مەن سىزدەرگە ريزاشىلىعىمدى بىلدىرەمىن. بۇل – سىزدەردىڭ جۇرەك قالاۋلارىڭىز, ازاماتتىق جاۋاپكەرشىلىكتەرىڭىزدىڭ كورىنىسى. مۇنىڭ ءبارىن ماراپات ءۇشىن ەمەس, شىنايى نيەتپەن جاسالعان يگى ءىس دەپ بىلەمىن», دەدى پرەزيدەنت.
مەملەكەت باسشىسى سۋ تاسقىنىنان زارداپ شەككەن حالىققا ناقتى كومەك كورسەتۋ ىسىندە بيزنەسمەندەردىڭ ءرولى زور ەكەنىنە ايرىقشا نازار اۋداردى.
ء«بىزدىڭ ەلىمىزدە Forbes تىزىمىنە كىرەتىن ءىرى كاسىپكەرلەر بار. ولارمەن ارنايى كەزدەسەمىز. ولار ءار وبلىسقا, اۋدانعا, ەلدى مەكەنگە بەكىتىلەدى جانە ناقتى جاۋاپكەرشىلىك جۇكتەلەدى. بۇل ءبىر جاعىنان كاسىپكەرلەردىڭ مۇددەسىنە ساي كەلەدى. ويتكەنى ولار وزدەرىنىڭ قوسقان ۇلەسىنىڭ ناقتى ناتيجەسىن كورەتىن بولادى. حالقىنا قايىرىمدىلىق جاساعان ازامات رەتىندە سىزدەردىڭ دە ەسىمدەرىڭىز مەملەكەت تاراپىنان ەلەۋسىز قالمايدى دەپ ويلايمىن», دەدى قاسىم-جومارت توقاەۆ.
سونىمەن قاتار پرەزيدەنت ەرىكتىلەرگە زور قۇرمەتپەن قارايتىنىن جانە جان-جاقتى قولداۋ كورسەتەتىنىن اتاپ ءوتىپ, ولارعا ريزاشىلىق ءبىلدىردى.
وسى كەزدەسۋدە «اگروماشحولدينگKZ» اق پرەزيدەنتى دينارا شۇكىجانوۆا سۋ تاسقىنىنان كەيىن قالاعا قونىس اۋدارعىسى كەلەتىن ادامداردى تەحنيكالىق ماماندىقتارعا وقىتىپ, ولاردىڭ جاڭا ورتاعا بەيىمدەلۋىنە جان-جاقتى قامقورلىق كورسەتۋگە دايىن ەكەنىن جەتكىزدى.
سونداي-اق «ايان-وزات» جشس ديرەكتورى ۆالەري روزۋموۆيچ قيىن-قىستاۋ كەزەڭدە ءوڭىر كاسىپكەرلەرى حالىققا بارىنشا جاردەم بەرگەنىن ايتتى.
قحا وبلىستىق فيليالىنىڭ قىزمەتكەرى ايبەك تاڭاتباەۆ سۋ تاسقىنىنىڭ سالدارىمەن كۇرەستە ەرىكتىلەردىڭ ەڭبەگى ەرەن ەكەنىن اتاپ ءوتتى.
