اتاپ ايتساق, جارتىلاي اۋىر سالماقتاعى ساڭلاقتاردىڭ رەيتينگىندە نۇربەك ورالباي ەكىنشى ورىندى يەلەنگەن. 23 جاستاعى استانالىق بىلعارى قولعاپ شەبەرى 2018 جىلى بۋداپەشتتە وتكەن جاستار اراسىنداعى الەم بىرىنشىلىگىندە باس جۇلدەنى ولجالاپ, كوپشىلىكتىڭ نازارىنا ىلىكتى. ەرەسەكتەر دۋىنا قوسىلعاننان كەيىن دە نۇربەك بيىك بەلەستەردى باعىندىردى. 2022 جىلى ول امماندا ۇيىمداستىرىلعان ازيا بىرىنشىلىگىندە كۇمىسپەن كۇپتەلسە, بىلتىر تاشكەنتتە الەم چەمپيونى اتاندى. سونىمەن قاتار بيىل ورالباي پاريج وليمپياداسىندا ونەر كورسەتەدى.
وسىدان بەس جىل بۇرىن ەكاتەرينبۋرگتەگى دۇنيەجۇزىلىك دودادا دارالانىپ, التىن تۇعىرعا كوتەرىلگەن بەكزات نۇرداۋلەتوۆ سەگىزىنشى ساتىعا جايعاستى. ۇلتتىق قۇراما ساپىنداعى ءوز ورنىن نۇربەك ورالبايعا بوساتقان 25 جاستاعى جاڭاوزەننىڭ تۋماسى بۇل كۇندەرى كاسىپقوي رينگتە باق سىناپ ءجۇر. ازىرگە اياق الىسى جامان ەمەس. كۇنى بۇگىنگى دەيىن التى جەكپە-جەك وتكىزىپ, بارلىعىندا جەڭىس تۇعىرىنان كورىندى.
ۇزدىكتەر تىزىمىندە توقتاربەك تاڭاتقان التىنشى ورىنعا تابان تىرەدى. قىتاي ەلىنىڭ اتىنان ونەر كورسەتىپ جۇرگەن 27 جاستاعى قانداسىمىزدىڭ دا باعىندىرعان بەلەسى ءبىر توبە. ول – ازيا ويىندارىنىڭ جەڭىمپازى, الەم چەمپيوناتىنىڭ كۇمىس جۇلدەگەرى. توقتاربەك 2021 جىلى توكيودا الاۋى تۇتانعان وليمپياداعا دا قاتىستى. بىراق بۇل جارىستا قانداسىمىزدىڭ جولى بولمادى.
80 كگ سالماق دارەجەسىندە الەكساندر حيجنياك كوش باستاپ تۇر. توكيو وليمپياداسىنىڭ كۇمىس جۇلدەگەرى, الەم جانە ەۋروپا چەمپيونى, ەۋروپا ويىندارىنىڭ ەكى دۇركىن جەڭىمپازى 28 جاستاعى ۋكراينانىڭ ماقتانىشى قازىرگى كەزدە پاريجدەگى ءدۇبىرلى دوداعا قىزۋ دايىندالىپ جاتىر. سونداي-اق توپ-10 بوكسشىنىڭ قاتارىنا يمام حاتاەۆ (رەسەي), كاللۋم پيتەرس (اۋستراليا), ارلەن لوپەس (كۋبا), تۇرابەك حابيبۋللاەۆ (وزبەكستان), كەلين كەسسيدي (يرلانديا), سالۆاتورە كاۆاللارو (يتاليا) سىندى بوكسشىلار ەنىپ وتىر.
الماتى
