باتىس قازاقستان وبلىستىق توتەنشە جاعدايلار دەپارتامەنتىنىڭ اعا ينجەنەرى نۇرجان تولەۋىشتىڭ ايتۋىنشا, وڭىردە ءبورلى اۋدانىنىڭ – 9, بايتەرەك اۋدانىنىڭ – 20, تەرەكتى اۋدانىنىڭ – 19, اقجايىق اۋدانىنىڭ – 32 ەلدى مەكەنىنە, ورال قالاسىنىڭ 4 اۋدانىنا ناقتى قاۋىپ بار.
جايىق وزەنىنىڭ سۋى قارقىندى كوتەرىلىپ جاتىر, قاۋىپتى دەڭگەيگە جەتۋى جاقىن. بارلىق كۇش-قۇرال قازىر وزەن بويىندا, تاسقىننىڭ الدىن الۋعا جۇمىلدىرىلعان. ورالعا ەلىمىزدىڭ 7 وبلىسىنان كومەك كەلىپ, جوعارىداعى ەلدىمەكەندەرگە بولىنگەن.
«قازىر گەودەزيستەر جۇمىس ىستەپ جاتىر, قالانىڭ تومەن ورنالاسقان اۋداندارىن انىقتاپ, حالىقتى كوشىرىپ جاتىر», دەدى توتەنشەلىكتەر وكىلى.
ءساۋىردىڭ 15-ءى كۇنى جايىق وزەنى جاعالاۋىندا ورنالاسقان بىرنەشە ەلدىمەكەنگە ەۆاكۋاتسيا جاريالاندى. ەڭ الدىمەن بالالار مەن انالار, قاريالار, مۇمكىندىگى شەكتەۋلى جاندار قاۋىپتى ايماقتان شىعۋ, ءۇي جانۋارلارىن ۋاقىتشا كوشىرۋ ەسكەرتىلىپ جاتىر. ورال قالاسىنىڭ اكىمى ميرجان ساتقانوۆ تا: «وزەن جايىلماسىنداعى ەلدى مەكەندەر مەن ساياجاي ۇيلەرىن سۋ باسۋ قاۋپى جوعارى. اسىرەسە ورال قالاسىنىڭ كۋرەني, ستاريتسا, كومينتەرن, سامال, جاس ناتۋراليستەر ستانساسى, وبلىستىق اۋرۋحانا اۋماعىندا تۇراتىن حالىققا ەۆاكۋاتسيا ىستەۋىمىز قاجەت. ءوزىڭىزدىڭ جانە جاقىن ادامدارىڭىزدىڭ ءومىرىن قاۋىپكە تىكپەي, شۇعىل تۇردە اعايىن-باۋىرلارىڭىزعا, دوستارىڭىزدىڭ ۇيىنە ورنالاسىڭىز. ۋاقىتشا باراتىن ءۇي بولماسا, ورال قالاسىنداعى ەۆاكۋاتسيالىق ورتالىقتاردىڭ بىرىنە كەلىڭىز», دەپ حابارلادى.
تاسقىن قاۋپىنە بايلانىستى ورال قالاسىندا سۋ باسۋ قاۋپى تونگەن №27 مەكەمەسىندە جازاسىن وتەۋشىلەر شۇعىل تۇردە وزگە وڭىرلەرگە – اقتوبە, تاراز, شىمكەنت جانە قىزىلوردا قالالارىنا كوشىرىلگەن.
مامانداردىڭ ايتۋىنشا, رەسەي فەدەراتسياسىنان سۋدىڭ مول كولەمى 1-2 كۇندە ورال قالاسىنا جەتەدى. قاۋىپتى دەڭگەي 8,5 مەتر بولسا, قازىردىڭ وزىندە جايىقتىڭ دەڭگەيى 8 مەترگە جۋىقتاپ قالدى. سۋ تاسقىنىنا قارسى جۇمىسقا جەرگىلىكتى اتقارۋشى ورگاننىڭ جانە توتەنشە جاعداي قىزمەتىنىڭ بارلىق رەسۋرسى تارتىلعان. قازىر 350 ارنايى تەحنيكا, 2000-عا جۋىق ادام تاسقىنعا توسقاۋىل قويۋعا جۇمىلدى. سونداي-اق وزگە وڭىرلەردەن, وبلىسىمىزدىڭ اۋداندارىنان كەلگەن اسكەري قىزمەتشىلەر, توتەنشەلىكتەر جانە ەرىكتىلەر بۇل جۇمىسقا بەلسەنە اتسالىسىپ جاتىر.
ورال قالاسىنداعى «باتىس» وڭىرلىك قولباسشىلىعىنىڭ ءباسپاسوز قىزمەتى قازىر وڭىردە قاراعاندى, قىزىلوردا, شىمكەنت قالالارىنان كەلگەن 1000-عا جۋىق ۇلاندىق سارباز بەن 40-تان استام تەحنيكا جۇرگەنىن حابارلادى.
ساربازدار ەل باسىنا كۇن تۋعان ساتتە ويلانباستان كومەككە ۇمتىلىپ, ەرلىكتىڭ ەرەن ۇلگىسىن كورسەتىپ جاتىر. 14 ءساۋىر كۇنى ورال قالاسى مانىڭداعى ەلدى مەكەن تۇرعىندارىن ەۆاكۋاتسيالاۋ بارىسىندا 30-عا جۋىق ادام وتىرعان جۇك كولىگى تاسقىن سۋدىڭ ورتاسىندا قالىپ قويدى. سول جەردە كەزەكشىلىكتە تۇرعان ۇلتتىق ۇلان 5517 اسكەري ءبولىمىنىڭ قىزمەتكەرى ماۋلەن مارلەنوۆ جەدەل قيمىلدادى. ءوزىنىڭ جۇك كولىگىمەن توپان سۋدىڭ ورتاسىنا قويىپ كەتىپ, باتىپ قالعان كولىكتى قاۋىپسىز جەرگە سۇيرەپ شىعاردى. مۇنداي وقيعا كوپ.
ءساۋىردىڭ 15-ىنەن باستاپ جايىق وزەنىنىڭ جاعالاۋىندا ورنالاسقان اقجايىق, ءبورلى, بايتەرەك, تەرەكتى اۋداندارىنىڭ جانە ورال قالاسىنىڭ ورتا ءبىلىم بەرۋ, كاسىپتىك-تەحنيكالىق جانە قوسىمشا ءبىلىم بەرۋ ۇيىمدارى قاشىقتان وقۋعا كوشكەنىن حابارلاعان ەدىك. بۇل باستاماعا ماحامبەت اتىنداعى باتىس قازاقستان ۋنيۆەرسيتەتى دە قوسىلىپ, ستۋدەنتتەردى ەرىكتىلەر قاتارىنا قوسىلۋعا شاقىردى.
بۇل كۇندەرى ورال قالاسىندا بارلىق كۇش, بارلىق نيەت تاسقىن سۋدىڭ الدىن الۋعا باعىتتالىپ جاتىر. وبلىس ورتالىعىنداعى ورتالىق مەشىتتە جاماعات توپان سۋدىڭ قايتىپ, حالىق زارداپ شەكپەسىن دەگەن نيەتپەن «قاجەت نامازىن» وقىدى. ناماز الدىندا ءوڭىردىڭ باس يمامى سامات الىباەۆ جاماعاتتى بىرلىككە شاقىرىپ, تاسقىننىڭ الدىن الۋعا ءبىر كىسىدەي جۇمىلۋعا شاقىردى.
باتىس قازاقستانداعى الاپات سۋ تاسقىنىنىڭ بەتىن قايتارۋعا ەلىمىزدىڭ 7 وبلىسىنان كومەك كەلدى دەگەنبىز. وسى كۇندەرى رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى قالا ماڭىنداعى ساياجاي الاپتارىنان تۇرعىندار مەن ءۇي جانۋارلارىن تاۋلىك بويى قاۋىپسىز جەرگە كوشىرىپ جاتىر.
كەشە الماتى وبلىسىنان كەلگەن 150-دەن استام تەحنيكا, ونىڭ ىشىندە تيەۋ, ينجەنەرلىك, جۇك جانە سۋ تاسيتىن تەحنيكالارى جانە موتورلى قايىقتار ءتيىستى جەرگە جونەلتىلدى. باتىس قازاقستان جانە اقتوبە وبلىسىنىڭ تجد قۇتقارۋشىلارى تەرەكتى اۋدانى توقپاي اۋىلىندا جاعالاۋدى نىعايتىپ جاتسا, قىزىلوردا وبلىسىنان كەلگەن توتەنشەلىكتەر توبى ورال قالاسىنداعى جايىق وزەنىنىڭ جاعالاۋىن كوتەرىپ جاتىر. ال تجم-نىڭ 52859 اسكەري ءبولىمى ساربازدارى وسى ساعاتتا بايتەرەك اۋدانىنا قاراستى يانۆارتسەۆ ەلدى مەكەنىندە ءجۇر. ايتا كەتەيىك, رەسەي ايماعىنان كەلە جاتقان الاپات تاسقىندى العاش قارسى الاتىن دا وسىلار.
وبلىستا جاريالانعان توتەنشە جاعدايعا بايلانىستى سۋ تاسقىنىنان زارداپ شەككەندەرگە ارناپ 28 ناۋرىز – 15 ءساۋىر ارالىعىندا «اقجايىق» قورىنىڭ ەسەپ شوتىنا 146.656.993 تەڭگە قاراجات ءتۇسىپتى.
وڭىردە سۋ تاسقىنىنان زارداپ شەككەن ازاماتتارعا جان-جاقتى كومەك جاسالىپ جاتىر. جەرگىلىكتى بيۋدجەت ەسەبىنەن 677 وتباسىعا بىرجولعى الەۋمەتتىك كومەك رەتىندە 125 ملن تەڭگە قارجى تولەنگەن.
ءساۋىردىڭ 15-ءى كۇنى قازاقستان حالقى اسسامبلەياسىنىڭ شىمكەنت قالاسىنداعى قحا وكىلدەرى مەن ەرىكتىلەرىنەن «جۇرەكتەن-جۇرەككە» رەسپۋبليكالىق جوباسى اياسىندا كەزەكتى گۋمانيتارلىق كومەك كەرۋەنى كەلىپ جەتتى.
باتىس قازاقستان وبلىسى
